Mwiubijei mudi Yehova

“Abe Yehova i mudi abe mo nkulupīle.”​—MITOTO 31:1.

NANSHA byādi mukōkekōke bininge muñeni ne mu ngitu, muntu umo wādi wīmba na diwi dilumbuluke na kutula kikulupiji kyandi mudi Yehova. Lwitabijo ludi na bushindañani, byo binenwa bya luno lwimbo lukola. Pa kupangwapangwa, uno muntu wāmwene makasa a Mwinebukomobonso bu ngabo ya kumukinga. Lwīmbo lwandi lwendelela’mba: “Koka ndeka kufwijibwa bumvu; nyongolole mu boloke bobe.”​—Mitoto 31:1.

² Mulembi-wamitoto wādi na kinyemeno​—kinyemeno kilumbuluke kashaa! Tukokeja kupatanya pa bintu bikwabo, inoko uno mwanda i wa bine: Yehova wādi mpakala yandi, nsakwa yandi. Kikulupiji kyandi kyādi kīmanine pa bipanda bibidi bikomokomo. Kibajinji, i lwitabijo lwandi kelukafwijibwa bumvu na Yehova, ne kyabubidi, i boloke bwa Yehova; kishintulula’mba kakokejapo nansha dimo kuleka bengidi bandi. Yehova ke Leza po ukokeja kufwija bengidi bandi bakikokeji bumvu; kajilulangapo milao yandi mhm. Ino, i Leza wa bubinebine ne upalanga mpalo ku boba batula kikulupiji mudi aye pakubulwa budimbidimbi. Kumfulo, lwitabijo lukapalwanga mpalo! Kunyongololwa kukafikidila!​—Mitoto 31:​5, 6

³ Na kulupula ñimbo yandi na mawi meshileshile, kushilwila ku diwi dya munshi-munshi dilombola bulanda ne kubulwa nsangaji, kufikija ne ku diwi ditunduke dilombola kikulupiji, mulembi-wamitoto wādi na bukomo munda mwandi. Wātumbije Yehova pamwanda wa buswe bwandi bukwatañene na bijila. Wādi wīmba’mba: “Atōtwe Yehova; ke-muntu wanombola kanye ka [buswe, NW] lwandi lwa kutendelwa mu kibundi kikomo.”​—Mitoto 31:21.

Basapudi ba Bulopwe Tuīmba Tukomokomo

⁴ Dyalelo, binenwa bya luno lwimbo lwa mitoto bikidi kadi monka na buluji. Ñimbo ya lutendelo lwa Yehova keikokejapo kujikilwa mashinda na kīnkwa nandi umbi nansha umo, na kimpengele nansha kimo, nansha ke na bufudile bwine bwa kubulwa lupeto; bine, kanye-kabuswe bwa Yehova i kelombole mu muswelo utulumukwa bininge ku bantu bandi. Mu mwaka wa mingilo wapityile’u, tuīmba tukomokomo twāimbile musapu wa Bulopwe bwa Leza na diwi ditunduke kujokoloka ntanda yonso, twadi 4 709 889, mu matanda 231. Umbikalo wa Yehova kupityila mudi Kristu Yesu i kinyemeno kyabo kekikokeja kukebafwija bumvu nansha dimo. Mwaka wapityile, bano basapudi ba Bulopwe badi mu bipwilo 73 070 bapityije buvule bwa nsaa 1 057 041 972 mu mwingilo wa busapudi. Kino kyalupwile bipá bya bantu 296 004 bepēne kudi Yehova ne kwikilombola na kubatyijibwa mu mema. Kyādi kyakutendelwa bininge ku bonso batenwe ku Kitango kya Matanda mavule “Bufundiji bwa Leza” kyalongelwe mu Kiev, mu ntanda ya Ukraine, mu kweji wamwanda wapityile’u. Bānwene kintu kyakutendelwa kekyamwekele kashaa mu mānga yonso ya ba Tumoni twa Yehova: kubatyijibwa kwa kibalwa kikatampe mpata kya bakristu babine musunsa umo abo-bonso pamo! Ka na mokinenenwe mu bupolofeto budi mu Isaya 54:​2, 3, kibalwa kya bantu ba Leza kyendanga kivudilako mu muswelo kewamwekele kashaa.

⁵ Inoko, kukidi bantu bakwabo basaka kukabikalwa na Bulopwe bwa Leza batengele kwiya kwilunga ku kitango kya tuno tuīmba. Mwaka wapityile, ku Kivulukilo kya lufu lwa Yesu, kwatenwe kibalwa kyakutulumukwa bininge kya bantu 11 865 765. Tukulupile’mba, mu uno mwaka wa mingilo, bavule umbukata mwabo basakubwanya bisakibwa mwanda wa bashilule kwimba lwimbo lwa Bulopwe ku njibo ne njibo. Ino mpangiko ya bikaya kumeso ikaletelanga walwana na bubinebine, Satana Dyabola, bukalabale bukatampe!​—Kusokwelwa 12:​12, 17.

⁶ Satana ukaloñanga bukomo mwanda wa kujika bakwabo baleke kulunga mawi abo ku mawi a kino kitango kya tuīmba tukomokomo. Kimfwa, mu Thailande, basapudi batananga kibalwa kikatampe kya bantu bakambakanibwa na bibanda. Inoko na bukwashi bwa Yehova, bavule bakubulwa budimbidimbi pano i balekelelwe na bibanda. Muntu umo wādi na kilokoloko kikatampe kya kusaka kwenda kukabandila mbuki umo mwanda wa kutala mwādi ubukila; penepo waenda, pa kujoka’ko wākambakanibwe na bibanda bininge umbula bwa myaka dikumi mituntulu. Mupe umo wātompele kumupandija, ino bine kekwādipo kwalamuka. Tutu umo Kamoni ka Yehova wādi mu mwingilo wa kitatyi kyonso wāshilula kwifunda na mwine muntu’wa, ne wamusapwila’mba enka Bible dyo dishinda dimo kete dikokeja kumunyongolola mu lupusa lwa bibanda​—kwikala na buyuki bwa bubinebine bwa Kinenwa kya Leza, kulombola lwitabijo mudi Yehova Leza, ne kumwābija kupityila mu milombelo.​—1 Kodinda 2:5; Efisesa 4:​6, 7; 1 Temote 2:​3, 4.

⁷ Kupwa kwa misambo yabo, bufuku pa kwila, mwine muntu’wa wālota shandi wādi kemufwe umufunina’mba nkakuloñanga bibi shi upela kujokela mu mingilo ya bibanda. Kyandi kisaka kyashilula kususuka. Uno muntu kādipo usaka kwikala na milangwe yakubulwa kujadika, wāendelele na bwifundi bwandi bwa Bible ne washilula kutanwa ku kupwila. Difuku dimo, kitatyi kyobādi befunda, uno pania wamusapwila’mba kitatyi kimo-kimo bintu bingidijibwanga mu butōtyi bwa mishipiditu imbi bikokeja kufungwila bibanda dishinda dya kukambakanya bantu batompa kulonga bukomo bwa kunyongololwa mu lupusa lwabo. Uno muntu wavuluka’mba wādi ukilamine māni ādi wingidijanga bu manga. Penepo watyiba mbila’mba wādi ufwaninwe kwiasumbula. Tamba kitatyi kyālongolwele uno mwanda, kādipo ukikambakanibwa kadi na mishipiditu imbi. (Enzakanya na Efisesa 6:13; Yakoba 4:​7, 8.) Aye ne wandi mukaji bendelelanga biyampe mu bwifundi bwabo ne batamwanga kitatyi ne kitatyi ku kupwila mwanda wa kulonda bufundiji bwa mu Bible.

⁸ Bikambija bikwabo bikokeja kujimakanya diwi dya myanda miyampe. Pamwanda wa myanda itala lupeto isusula bantu mu Ghana, bengidi bavule kebakingilangapo. Ngikadilo ya umbūmi yenda yoneka kutabuka, i kikomo kusokola nansha bisakibwa bibajinji bya ūmbumi bine. Lelo ba Tumoni twa Yehova bekibwanyanga muswelo’ka? Bakulupīle mudi Yehova, ke mudi abo benepo mhm. Kimfwa, difuku dimo, muntu umo wāshile amvelope mulamikwe senene pa meza a njibo itundaidilwanga’mo bēni ku Bilo bya Musambo. Mu mwine amvelope’o mwādi dollard 200, mfutwa ya myeji isatu ifutwanga mwingidi wa pa kaji. Uno amvelope wāletelwe na muntu watūdile kyabuntu pakubulwa kulombola dyandi dijina, ino pangala pa kipapa pādi palembwe ino myanda: “Najimije mwingilo wami, ino Yehova waumpe mwingilo mukwabo. Namufwijako bininge pamo ne wandi Mwana Kristu Yesu. Mwanda wa kukwasha ku mwingilo wa kusambakanya myanda miyampe ya Bulopwe kumeso kwa mfulo keyafikile, naleta kino kyabuntu kityetye mu uno muvungo.”​—Enzakanya na 2 Kodinda 9:11.

⁹ Kutanwa ku kupwila kukwashanga mwanda wa kuteakanya boba belunga ku tuīmba tukomokomo tutendela Yehova. (Enzakanya na Mitoto 22:​22.) Ku mutamba wa kupōna kwa ntanda ya Hondurace, kudi kipwilo kimo kitelwa bu El Jordán. Ino lelo i mwanda’ka wa pabula udi mu kano kabumbo katyetye? I kikokeji kyabo mu muswelo wabo wa kutanwa ku kupwila. Mu basapudi 19, basapudi 12 basambukanga munonga wa mema malele bininge mwanda wa kukatanwa ku kupwila ku yenga ne yenga. Mu bushipo kekwikalangapo mwanda mukatampe, bakokeja kukilañanya luī lwa ntobwa na kulandala pa mabwe. Ino mu buyo, ngikadilo ikalanga yalamuka. Ka luī kadi katyetye, kaikala ke mulungu wa mema enda akuka bukidibukidi akoka kintu kyo kyonso mu kupita. Pakukomena bino bikambija, batutu ne bakaka bafwaninwe kuyuka kusumba senene. Kumeso kwa kusambuka luī, bekalanga batūla bisandi, byobakavwala ku kupwila, mu tina (lweso lwa kyuma) ne kupūtapo papye wa lejele. Yewa uyukile kusumba biyampe ye aye wikalanga wenda na tina umuleleja kūlu kwa mēma ne kukunkuja kibumbo babuke senene. Pa kufika senene ku mutamba mukwabo, bepampula mema, bavwala senene, ne kufika ku Njibo ya Bulopwe na dyangi tōo ne nsangaji!​—Mitoto 40:9.

Nsakwa Yotukokeja Kunyemena’mo

¹⁰ Shi ukambakanibwanga patōkelela na bibanda nansha shi udi na milangwe itamba ku nsulo mikwabo ikujonda ku mutyima, Yehova ukokeja kwikala bu mpakala yobe. Mwite kupityila mu milombelo. Utelekanga bantu bandi senene ne bakokekoke babinza bene kumo. Mulembi-wamitoto wājingulwile bubinebine bwa uno mwanda ne wāsonekele’mba: “Ela kutwi kuno ko ndi; unyongolole bukidibukidi; ngikadile bu kidibwe-kikomo, bu njibo-mikomo ya bulwi ya kumpandija. Mwanda abe wi kibibwe kyami, wi nsakwa yami, penepo, pamwanda wa dijina dyobe nkunkuje, unombole. Ñonzole mu bukonde bo bantele kufula kufula; ke-wi-muntu, abe wi nsakwa yami.”​—Mitoto 31:​2-4.

¹¹ Yehova ke kinyemenopo kya mu kitatyi kityetye tu, mhm, inoko i nsakwa keibwanika kusalwa motukokeja kunyemena na mutyima ntenke. Bengidi bandi kebabulwengapo buludiki ne madingi andi. Bukomo bwa Leza bunekenyanga bilongwa byonso bya budyumuku bingidija Satana ne bantu bandi. (Efisesa 6:​10, 11) Shi tukulupile mudi Yehova na mutyima umo, uketwepeja na makinga a Satana. (2 Petelo 2:9) Umbula bwa myaka iná yapityile’i, mwingilo wa busapudi wa ba Tumoni twa Yehova wāshitwilwe mu matanda 35. Kadi, mu bipindi bivule pano pantanda mudi ngikadilo ya politike, myanda itala lupeto ne mushikatyilo wa mu kibundi ujokeja busapudi bwa myanda miyampe kunyuma, bantu bamo-bamo badi pamo bwa mikōko pano ibavilukile mu bifuko bikwabo bya mantanda mobakokeja kwibasapwila mu bwanapabo. Kimfwa, bakwabo baikele kuvilukila mu Japon.

¹² Mu Japon, ke mudi kibalwa kikatampe kya bēni baile kwingila, ba mu mantanda a bukila-luī, ne pano i kushimikwe bipwilo bivule bya mu ndimi ya bwēni. Myanda yāfikile tutu umo wa mu kipwilo kya Kijapone ilombola bipá bilumbuluke bikokeja kulupuka mu bipindi bya ndimi ya bwēni. Wādi usaka kwenda kukakwasha kokwa kusakibwa bengidi bavule. Inoko, wādi kala wendeja bifundwa bya Bible dikumi mu kifuko kyādimo. Umo wa mu balunda nandi wamusapwila mu makayo’mba: “Shi wende mu kipindi kokwa kusakibwa bengidi bavule, usa kukendeja bifundwa bya Bible 20!” Wapebwa lupusa penepo waenda ku Hiroshima. Ino, kupwa kwa myeji iná, wākidi enka na kifundwa kya Bible kimo kete. Difuku dimo, wakapempula muntu umo mwine Brésil wādi uyukile enka ludimi lwa Kiportige kete. Uno tutu bya kādipo na muswelo wa kwisamba nandi, wāpota dibuku dimo dya mu Kiportige. Kupwa kwa kwifundamo bishima bimo-bimo bipēla mwanda wa kumona muswelo wa kushilula misambo, wākapempula mwine muntu’wa musunsa mukwabo. Kitatyi kyāmwimwine tutu mu ludimi lwa Kiportige, mwine muntu’wa wabezemuka, ne tusepo pakanwa, wamushitwila kala ku kibelo na nsangaji ne kumwita atwele. Kifundwa kya Bible kyashilula. Mafuku matyetye kupitapo, washilula kwendeja bifundwa bya Bible 22, bifundwa 14 mu Kiportige, 6 mu Kiespanye, 2 mu Kijapone!

Kusapula na Kikulupiji

¹³ Bantu ba Yehova bembanga lwimbo lwa Bulopwe na kikulupiji kyonso’mba Yehova i kinyemeno kyabo. (Mitoto 31:14) Kebakafwijibwapo bumvu​—Yehova kakebafwijapo bumvu, mwanda ukafikidijanga kinenwa kyandi. (Mitoto 31:17) Dyabola ne kibumbo kya bandemona bandi bakafwijibwanga bumvu. Bipelwe bantu ba Yehova lupusa lwa kusapula musapu wakubulwa kya ­bumvu nansha kimo, kebakwatwangapo bumvu pamwanda wa bantu bakwabo mu busapudi. Yehova ne wandi Mwana mwine, kebasakengapo bantu batōte Leza uno muswelo. Shi mityima ya bantu i miyule lwitabijo ne kutenekwa na buyampe ne kanye-kabuswe bwa Yehova, ngikadio milumbuluke ya mu mityima yabo ikatakika byakanwa byabo bisapule. (Luka 6:45) Kitatyi kyo-kyonso kyotupityija mu mwingilo wetu ku kweji ne kweji, nakampata, shi kino kitatyi kilombola’mba o mwingilo mulumbuluke otukokeja kulonga mungya bukomo bwetu, i kiyampe, kekyabumvupo mhm. Lelo kyabuntu kityetye kya mukaja-mufu mulanda kekyasangejepo Yesu ne Shandi?​—Luka 21:​1-4.

¹⁴ Ku kibalwa kikwabo kya basapudi bavule kyenda kilundilako, kutōta na muya wabo onso i ne kwingila bu bapania​—mwaka wapityile’u bafikile pa kibalwa kya bantu 890 031! Shi kino kibalwa kikale kwendelela kumeso enka uno muswelo, nankyo mwaka wiya’ko kikapita pa bantu 1 000 000. Uno mwanda ulondako ulombolanga muswelo welungile kaka uno wa mu Nigéria mu mulongo wa bapania. Wāsonekele’mba: “Kitatyi kyonadi kubwipi na kupwija masomo a ku sekondere, nāendele kukakwasha ku mwingilo wa kutekela boba bāendele kukatanwa ku masomo a bapania a ba Tumoni twa Yehova. Nāteneko ba kaka babidi bādi banunu kupitako ne nkambo wami mwana-mukaji. Kitatyi kyonayukile’mba nabo i bapania baile kutanwa ku masomo, nalanguluka amiwa-mwine’mba ‘shi bano ba kaka babidi bakokeja kuvuija mwingilo wa bu pania, lelo i kika kinkankaja kwikilonga?’ Penepo, ponapwijije masomo, nami naikala pania wa kitatyi kyonso.”

¹⁵ Bantu bonso kebakokejapo kwikala bapania, ino bakokeja kusapula. Mu Belgique kaka umo wa myaka 82 wāendele ku kapota mwita wa ntanda. Wāmwene’mba mukaja mwine njibo yādi ipotelwamo mwīta, wādi mujingwe ku mutyima bininge pamwanda wa kavutakanya ka myanda ya mapolitike yālupukile mu kine kitatyi’kya. Penepo pa kumufuta makuta a bintu byāpotele, mwine kaka’wa wakujamo kankanda Lelo i kika kikulupile ba Tumoni twa Yehova? Kaka pa kujokela ku mine njibo ipotelwangamo mwita’ya, mukaja mwine njibo’wa wamwipangula pakubulwa ne kwikaka kwine’mba lelo i kika kinena Bible pamwanda utala divita dya busatu dya ntanda yonso? Kaka wamuletela dibuku La paix et la sécurité véritable ​— comment est-ce possible? Mafuku matyetye kupitapo, uno kaka aye’tu ukitwela mu mine njibo ipotelwangamo mwita’ya, mukaja mwine njibo’wa wamwipangula bipangujo bivule. Uno kaka wātokelwe mwine mwana-mukaji’wa bininge; wamusapwila enka’mba tukokeja kushilula nobe kifundwa kya Bible, nandi waitabija. Pano, mukaja mwine njibo’wa kasakenga kubatyijibwa. Ino lelo mwine njibo ipotelwangamo mwita nandi? Wātangile kakanda’ka nandi pano wifundanga Bible.

‘Bya bupeta bya Buyampe Bwandi’

¹⁶ Umbula bwa ano mafuku amfulo apepeja bantu mityima, lelo Yehova ‘kalombolangapo kanye-kabuswe bulumbuluke’ ku boba beubija mudi aye? Pamo bwa shamuntu wa buswe ne uyukile kukinga, Yehova ubikīle bandi bāna ba pano pantanda byabupeta bya buyampe bwandi. Wibapungulwilanga madyese kumeso a bantu bonso, pamo’ka na mwikinenena mulembi-wamitoto’mba: “Ē! Ē! Ē! būmuntu [buyampe, NW] bobe kebo bukatakata bōbīkile boba bakwakamimwe. Atōtwe Yehova; ke-muntu, wanombola kanye ka lusa [buswe, NW] lwandi lwa kutendelwa mu kibundi kikomo.”​—Mitoto 31:​19, 21.

¹⁷ Bantu ba pano pantanda ponso bamonanga patōkelela kubulwa budimbidimbi kwa boba batōta Yehova, ne bekitulumukanga. Kimfwa, mu Ghana, mununu umo mwana-mulume wa myaka 96 wāendele ku bilo kobalembejanga malubo kukandikija busongi bwabo bwādi kebulale myaka 70 pakubulwa kwilembeja kumeso a Leta. Mwingidi wa Leta ulembejanga malubo wātenekelwe ku mutyima ne wamwipangula’mba: “Lelo nabubinebine ye kyosaka kulonga, na ino myaka yokodi nayo?”

¹⁸ Mwine mwana-mulume’wa wamushintulwila’mba: “Nsaka ngikale umo wa mu ba Tumoni twa Yehova ne kushilula kwingila mwingilo wa mvubu kutabuka kumeso kwa ino ntanda keyafudile​—mwingilo wa kusapula myanda miyampe ya Bulopwe bwa Leza. Uno mwingilo upānanga dishinda dya kukamona būmi bwa nyeke. Ba Tumoni twa Yehova, balemekele bijila bya Leta, kwelamo ne kijila kitala pa kulembeja busongi. Nakwisashilapo, nēmbe ku buku.” Uno mwingidi wa Leta wāshala mukanwa pululu. Walemba busongi bwabo, ne uno mununu wātaluka na nsangaji amba pano busongi bwami bubayukwa mungya bijila bya Leta.​—Enzakanya na Loma 12:2.

¹⁹ Kupwa, uno mwingidi wa Leta washala kulanguluka pa myanda yaivwene. “Ba Tumoni twa Yehova . . . mwingilo wa mvubu kutabuka . . . mfulo ya ino ntanda . . . Bulopwe bwa Leza . . . būmi bwa nyeke.” Wālangulukile bininge pa shintulwilo ya ino myanda yonso mu būmi bwa mununu wa myaka 96, wakwata mpangiko ya kukakimba ba Tumoni twa Yehova mwanda wa kumvwanija senene kino kintu. Wāitabija kifundwa kya Bible ku njibo ne wāendelela bukidibukidi. Dyalelo, uno mwingidi wa Leta i Kamoni ka Yehova kabatyijibwe. Nanshi, kitatyi kyotukōkela Yehova nansha ke mu mwanda ukokeja kumonwa na bantu bakwabo wi wakubulwa mvubu, ukokeja kukalupula bipá biyampe kotudi ne ku boba bakamona mwiendelejo wetu.​—Enzakanya na 1 Petelo 2:12.

²⁰ Banunu baleka bubinebine bwalamune būmi bwabo bekale ke bantu bakubulwa budimbidimbi baletanga kimfwa kilumbuluke ku bankasampe mu ino ntanda miyulemo budimbidimbi. Mu ntanda ya Myanmar mudi kaka umo nkasampe udi na ngikadila ya uno muswelo. Ubutwilwe mu kisaka kya balanda kadi bantu ba kwityepeja, kisaka kya bāna dikumi. Shabo, kemupebwe kala panshyo, i pania wa kitatyi kyonso. Difuku dimo ku masomo, uno kaka wāboile lumpete lupungwe na olo, ka penepa welutwala kudi wandi mwadimu mwana-mukaji. Difuku dyālondelepo, bāna bonso bādi mu masomo, mwadimu webasapwila muswelo wāboilwe luno lumpete ne wanena’mba usaka kwilujokejeja mwine’lo. Penepa wasapwila kaka nkasampe’wa’mba ēmane kumeso kwa bana bonso ba masomo ne asapule mwanda’ka walongele kino kilongwa, mwanda mwadimu wādi uyukile’mba shi bādi bankasampe bakwabo, baswile kwiluyata kelwabo. Uno kaka washintulula’mba i ­Kamoni ka Yehova ne kadi’mba wandi Leza kasakengapo bwivi nansha ke budimbidimbi bwa muswelo’ka. Masomo onso aivwene uno mwanda, uno kaka nkasampe wāpelwe kitatyi kya kupāna bukamoni ku badimu ne bāna ba masomo pamo.

²¹ Mu Belgique, mwadimu umo wesambile mu masomo mwanda umo uleta nsangaji utala pa ba Tumoni twa Yehova. Wājingulwile mwiendelejo wādi na mwana umo mu bandi bana ba masomo, uno mwana nandi wādi kaka nkasampe, wānena’mba: “Pano, nkendi na mumweno mukwabo wa myanda utala pa ba Tumoni twa Yehova. Nādi mfwatakanya’mba i bantu bakubulwa butūkanye. Ino ye abo bantu batūkanye bininge, inoko pakubulwa kujilula misoñanya yabo.” Mwaka ne mwaka, badimu bapanga mpalo ku babo bana ba masomo balumbuluke kupita. Umbukata mwayo mudi ne mpalo ipalwanga pamwanda wa mwiendelejo mulumbuluke. Mu myaka isatu yalondakene’i, mpalo ya bifuko bisatu bibajinji yāpelwe ku bāna ba ba Tumoni twa Yehova na mwine mwadimu’wa. Kino kifikilanga nyeke boba bakulupīle mu bijila bya Yehova.​—Mitoto 31:23.

²² Lwimbo lwa Mitoto 31 lufula na bino binenwa byabushindañani’mba: “Komejai mu bidyoma ne mutyima wenu ukankamane ne kukankamana, banwe bonso bakulupile mudi Yehova.” (Mitoto 31:24) Shi ke pano, byotwenda tufwena kumfulo kwa ngikadilo imbi ya Satana, Yehova kaketulekapo pakubulwa bukwashi, ukefwenya pabwipi netu ne kutula bukomo bwandi motudi. Yehova i wabinebine ne kakokejapo kubepa. Aye i ngabo yetu; i kinyemeno kyetu.​—Nkindi 18:10.

[Bipangujo]

1. I muswelo’ka ulombola Mitoto 31 buluji botufwaninwe kutudila kikulupiji mu bukomo bwa Yehova bwa kwitukinga?

2. (a) Kikulupiji kyetu kyotutudile mudi Yehova bu mpakala yetu kimanine pa bipanda’ka bibidi? (b) Yehova i Leza wa muswelo’ka?

3. Mulembi-wamitoto wātendele Yehova muswe­lo’ka?

4, 5. (a) I tuīmba’ka tukomokomo tutendela Yehova dyalelo, ne twekilongele muswelo’ka mu mwaka wa mingilo wapityile? (Tala tabulo udi pa paje 10-13) (b) Kibalwa kya bantu batenwe ku Kivulukilo kilombolanga muswelo’ka amba kukidi kadi kibalwa kikatampe kya bantu bakelunga ku mulongo wa tuīmba twa Bulopwe bwa Leza? (Tala tabulo.) (c) I ba ani mu kyenu kipwilo kakokeja kwilunga ku uno mulongo wa tuīmba?

6, 7. Shintulula muswelo wānyongolwelwe muntu umo wādi ukambakanibwa na bibanda kupityila ku bukwashi bwa Yehova.

8, 9. I bikambija’ka bikwabo binekenyanga basapudi ba Bulopwe bamo-bamo?

10. Mwanda’ka tufwaninwe kwalamukila kudi Yehova mu kitatyi kyotujondwa mutyima?

11. Shintulula mwanda’ka nsakwa ya Yehova ke kinyemenopo kya mu kitatyi kityetye.

12. I muswelo’ka wālombwele pania umo mwine Japon amba Yehova i mpakala yandi?

13. Mwanda’ka kekudipo nansha muntu umo ukokeja kutompa kwitufwija bumvu mu mwingilo wa Yehova?

14. I kika kyokokeja kunena pamwanda utala mwingilo wa bu pania? (Tala ne tabulo.)

15. Busapudi bwa kiponka na ponka bukokeja kupa bantu bakwabo muswelo wa kumona Yehova bu ngabo yabo muswelo’ka?

16. I muswelo’ka ulombola Yehova’mba utūdile bengidi bandi byabupeta bya buyampe bwandi?

17-19. Mu Ghana, i kipá’ka kiyampe kyālupukile pamwanda wa kilongwa kya mununu umo wākalembeje busongi bwandi ku bilo ya Leta?

20. Mu Myanmar, kubulwa budimbidimbi kwa kaka umo nkasampe kwamupēle muswelo’ka wa kupāna bukamoni?

21. Kitatyi kikulupila bankasampe mudi Yehova, i muswelo’ka okimwekanga mu mwiendelejo wabo?

22. I binenwa’ka bya bushindañani bifudija Mitoto 31, ne kino kitukwashanga muswelo’ka umbula bwa ano mafuku amfulo ya ino ngikadilo ya bintu?

[Bilembwa bya pa Bifwatulo]

Boba beubije mudi Yehova i babunde kibumbo kikomokomo kya tuīmba twa basapudi ba Bulopwe​—4 709 889 ba kininga!

1. Sénégal, 2. Brésil, 3. Chili, 4. Bolivie

Lelo ukivulukile’byo?

◻ Mwanda’ka tukokeja kwiubija mudi Yehova na dityima ditūke?

◻ I bukamoni’ka bulombola’mba tuīmba tukomokomo twīmbanga lutendelo lwa Bulopwe na bukankamane?

◻ Mwanda’ka tukokeja kwikala na kikulupiji kya’mba Satana kakakokejapo kukwata bengidi ba Yehova mu dikinga?

◻ I bya bupeta’ka bitudile Yehova boba beūbija mudi aye?