Twikalei na kanye ne mutyima wa lusa

“Vwalai pamo bwa batongibwe ba Leza, bapandulwemo, baswedibwe, mutyima wa lusalusa ne kanye.”​—KOLOSE 3:12.

KASHA kēkwaikele bantu basaka kukwatakanibwa pamo na mu kino kyetu kitatyi. Kudi misongo, nzala, kubulwa mingilo, buñonaona, mavita, kavutakanya, bimpengele bya kipangila, kadi kudi tununu ne tununu twa bantu bakimba bukwashi. Ino kudi mwanda mukwabo mukatampe bininge, i ngikadilo ya kumushipiditu ya bulanda idimo bantu. Satana, byāyukile’mba imushale na kakitatyi katyetye, pano ‘ongolanga bekadi ba pano pantanda bonso.’ (Kusokwelwa 12:​9, 12) Omwanda nanshi, nakampata boba badi panja pa kipwilo kyabinebine kya bwine kristu badi mu kyāka kikatampe kya kujimija bwabo būmi, ne Bible kaletangapo kikulupiji nansha kimo kitala pa kukasangulwa kwa boba bakepaibwa umbula bwa difuku dya Leza dya butyibi dikaya kumeso.​—Mateo 25:​31-33, 41, 46; 2 Tesalonika 1:​6-9.

² Ino kufikija ne mu ino nsaa yamfulo mine, Yehova Leza ukyendelela na kulombola butukanye ne mutyima wa lusalusa ku boba bakubulwa kulombola kufwijako ne ku babi. (Mateo 5:45; Luka 6:​35, 36) Wikiloñanga mu muswelo umo onka pamo’nka na mwāilaijije pa kupa muzo wa Isalela mfuto, muzo wakubulwa kikokeji. Wēbalombwele’mba: “Ami ne mūmi; i Mfumwetu Leza unena; nkidipo na nsangaji nansha mityetye mu lufu lwa mupupakane, ehe; poso’nka mupupakane’wa āluke ku dishinda dyandi ne kumona būmi; alukai, alukai ku mashinda enu mabi; lelo mwanda ka o mukafwila, a njibo ya Isalela, a?’”​—Ezekyele 33:11.

³ Kadi Yehova wālombwele mutyima wandi wa lusalusa ku babi ba mu Nineva. Yehova wātumine mupolofeto wandi Yona akebadyumune pamwanda wa konakanibwa kwādi kwibatengele. Bālondolwele bilumbuluke ku busapudi bwa Yona ne bēsashile. Kino kyātenekele Yehova ku mutyima bininge, Leza walusa, wafula ku kwimika bonakanyi bwādi bufwaninwe kuponena pa kino kibundi mu kine kitatyi’kya. (Yona 3:10; 4:11) Shi Leza wālekēle bene Nineva, nansha byobādi na kikulupiji kya kukasangulwa monka, kino kilombola’mba ukwatwanga lusa bininge pa kumona dyalelo bantu batengele kukonakanyibwa lonso fututu!​—Luka 11:32.

Mwingilo Mukatampe Ulombola Lusa

⁴ Kukwatañana na lusa lwa bu-muntu bwandi, Yehova i mupe ba Tumoni bandi mwingilo wa kwenda kukasapwila balunda nabo “myanda miyampe ya bulopwe.” (Mateo 24:14) Ne kitatyi kikalanga bantu balondolola na nsangaji ku uno mwingilo wa lupandilo Yehova ufungulanga mityima yabo mwanda wa bomvwanije musapu wa Bulopwe. (Mateo 11:25; Bilongwa 16:14) Mu kwiula Leza wabo, bakristu babine balombolanga kanye ka lusa na kujoka kukatala boba basangela musapu, na kwibakwasha, shi kudi muswelo, kupityila ku kifundwa kya Bible. Pa kino namino, mu 1993, kupita kwa miliyo ina ne kipindi ya ba Tumoni twa Yehova, mu matanda 231, bapityije miliyare imo ne kupita ya ma nsaa na kusapula ku njibo ne njibo ne na kwifunda Bible pamo na balunda-nabo. Bano bapya basangela musapu, nabo i bapebwe muswelo wa kupāna būmi bwabo kudi Yehova ne kwilunga ku mulongo wa ba Tumoni babatyijibwe. Mu uno muswelo, nabo bakekala na kiselwa kya kulonga uno mwingilo wa lusa, mwanda wa kamweno ka bana-babwanga bakaya mu mafuku akumeso bakidi bakutwe mu ntanda ya Satana yenda ku lufu.​—Mateo 28:​19, 20; Yoano 14:12.

⁵ Pano-pano ponka Yehova ukatamba pamo bwa “muntu wa bulwi.” (Divilu 15:3) Pamwanda wa lusa lwa pa dijina dyandi ne pamwanda wa bantu bandi, ukonakanya bukalabale ne ukajadika ntanda impya ya boloke. (2 Petelo 3:13) Bibajinji bikafikilwa na difuku dya bukalabale bwa Leza i Bipwilo bya Ki-kristu. Leza byākalaminepo tempelo yandi mu Yelusalema na kwīnyongolola mu makasa a mulopwe wa Babiloni, muswelo umo onka kakalamapo malongolodi a bipwilo byakubulwa kumuyukanya dyalelo na bubinebine. Leza ukatununa mityima ya bantu ba Kitango kya Bumo bwa Mizo bakashiye masala Bipwilo bya Ki-kristu ne miswelo yonso ya bipwilo bya bubela. (Kusokwelwa 17:​16, 17) Yehova wanene’mba “Ino ami nami dīso dyami kedikapandijapo, nansha kufwilapo lusa ami; ino nanshi nkaleta dishinda dyabo pa mutwe wabo.”​—Ezekyele 9:​5, 10.

⁶ Kitatyi kyonso kikebapebwa kyaba, ba Tumoni twa Yehova bakendelela na kulombola lusa lwabo ku balunda-nabo na kwibasapwila na bupyasakane musapu wa Leza wa lupandilo. Ne kyabine, shi i kyendelemo, bakwashanga kadi monka bantu badi na bisakibwa bya kungitu. Ino pa uno mwanda, kiselwa kyabo kibajinji i kya kuvuija bisakibwa bya banababo ba mukisaka kya pabwipi ne bya banababo ba mu lwitabijo. (Galatea 6:​10; 1 Temote 5:​4, 8) Mingilo mivule ya bukwashi ilongibwa na ba Tumoni twa Yehova pamwanda wa kukwasha balunda-nabo mu lwitabijo bafikilwa na bimpengele bishileshile, i kilomboji kikatampe kya mutyima wabo wa lusalusa. Inoko, bakristu kebakungangapo nka kupumbwa mwanda wa kulombola kanye ka lusa. Balombolanga bukidibukidi ino ngikadilo kukwatanãna na myanda ya umbūmi ikale miyampe nansha imbi.

Kipindi kya Bu-muntu Bupya

⁷ I kyabine amba bubi bwetu bwa kibutwila ne lupusa lubi lwingidija ntanda ya Satana bitujikilanga mashinda a kulombola kanye ne lusa. Po pamwanda Bible witudyumuna tuleke “kufuna bulobo, ne bukalabale, ne kiji, ne butukani, ne mīsambo ya bumvubumvu.” Pakyaba kya bino twibadingilwe ‘kuvwala bu-muntu bupya’​—bu-muntu bukwatañene na kimfwa kya Leza. Kintu kibajinji pa byonso, twibalombibwe kuvwala “mutyima wa lusalusa ne kanye, ne bumvu, ne kikokeji, ne kutūkija mutyima.” Bible witulombola monka muswelo mulumbuluke wa kulombola ino ngikadilo. “Kadi ne kwifudila bānwe bene na bene, ne kwilekela bitupu bānwe bene, shi umo wapi mambo ku mukwabo; monka mwemulekele aye Mfumwetu ne bānwe nenu mulongele monka.” Kikekala kipela bininge kulekela shi twikale kutamija ku banabetu ‘kanye ka lusa.’​—Kolose 3:​8-13.

⁸ Ku mutamba mukwabo nao, kupela kulekela bakwetu na lusa kukokeja kutūla mu kyāka kipwano kyetu na Yehova. Kino ye akyo kyalombwele Yesu na bukomo bonso mu kyelekejo kyandi kitala pa umpika wa kubulwa lusa, watūdilwe na mfumwandi mu kifungo “amba ponso’nka alubudidile byonso byāngapwile.” Uno umpika wādi ufwaninwe kususulwa bininge, mwanda kālombwelepo kufwila-lusa kudi umpika mulunda-nandi wādi umwilōngela. Yesu wāfudije kyelekejo kyandi na kunena’mba: “I enka namino ne Tata wa mūlu, aye ukemulongela monka, shi kadi bānwe bonso ku muntu, ku muntu, kemukalekele ne mutyima wa binebine mambo a bamwanenu.”​—Mateo 18:​34, 35.

⁹ Kanye ka lusa i kipindi kikatampe bininge kya buswe. Ne buswe i kayukeno kakuyukilapo bakristu babine. (Yoano 13:35) Omwanda nanshi, bulombodi bwa Bible butala pa bu-muntu bupya bufudija’mba: “Ebiya pa bino byonso tentekaipo lusa [buswe NW], lo lwakulamankanya lufikijije.”​—Kolose 3:14.

Lwīso​—I Kijika kya Lusa

¹⁰ Pamwanda wa ngikadila yetu ya bu-muntu ya bubi, milangwe ya lwīso ikokeja kwala miji bukidibukidi mu mityima yetu. Tutu nansha kaka ukokeja kwikala na madyese a ñeni ya kibutwila, nansha kadi padi ukokeja kwikala na bintu bya kungitu byoketudipo nabyo. Padi kadi muntu kampanda ukokeja kupebwa madyese kampanda a pabula a kumushipiditu. Shi twikale na lwīso lwa kukwatyilwa balunda netu mukao lelo tukebatala na kanye ne lusa? Padi kebibwanikapo. Mwenda mafuku, mukao ukokeja kukelombola na binenwa bya kafutululo nansha na bilongwa bya kubulwa kanye, Yesu wānenekyo’mba: “Kyakanwa kinenanga pamwanda wa myanda iyudile mu mutyima.” (Luka 6:45 NW) Bakwabo bakokeja kwitūla ku mutamba wetu ne kwalula kufutulula bakwabo. Mu uno muswelo ndoe ya mu kisaka nansha ya mu kipwilo kya bantu ba Leza ikajimina.

¹¹ Tubandaulei kyapityile mukisaka kimo kikatampe. Bana dikumi batame babajinji ba Yakoba bākwatyīlwe nkasabo Yosefa mukao mwanda shabo wādi umusenswe bininge. Kino kyebafikije ku “kwisamba nandi biyampe mpikila.” Muyamafuku, Yosefa waikele na madyese a kulota bilotwa byalupukile kudi Leza, bukamoni bwa’mba waitabijibwe na Yehova. Kino kyapele banababo ‘buluji bupite bwa kumushikwa.’ Mwanda kebāfundwilepo mukao mu mityima yabo, kemwakitenwepo kadi monka kifuko kya lusa ne kyebafikije ku bubi bukatampe.​—Ngalwilo 37:​4, 5, 11.

¹² Na mutyima wa kasusu, bapoteja Yosefa bu umpika. Mu kukimba kupūta kilongwa kibi kyobalongele, babepēle shabo’mba Yosefa waipailwe na nyama wa ntanda. Myaka mivule kupitapo, bubi bwabo bwasokwedilwe patoka kitatyi kyebatonwene nzala bende mu Edipito kukapota bidibwa. Mwimaniji wādi wimanine bidibwa, kebakimuyukilepo dikwabo amba i Yosefa, webasambile bu baile kubela ne webanena’mba kebakamulombepo bukwashi monka shi kebailepo na mukala wabo Benjamani. Mu kine kitatyi’kya Benjamani ye wādi ke mwana mukenwe na shabo, ne bayukile amba Yakoba kaketabijapo kumuleka ende.

¹³ Omwanda kitatyi kyobadi bakimene kumeso a Yosefa mutyima wabo wa munda-munda webatuma betabije’mba: “Batwe tubapi mambo pa mwanda wa mwanetu [Yosefa], i binebine’tu, monka motwamwene malwa a muya wandi, ne pētwisashilepo ino batwe kubangapo mpika, po pa mwanda wa malwa ano’a etufikila.” (Ngalwilo 42:21) Na ngikadila yandi ya lusa ino ne kusumininwa ponka, Yosefa wākweshe banababo balombole kwisasa kwa binebine. Kupwa welombwele kobadi ne buntu bwa kwibalekela mambo. Kisaka kyajokēle umbumo. (Ngalwilo 45:​4-8) Pamo na kino kisaka, bakristu bafwaninwe kuboila ñeni pa uno mwanda. Nakuyuka bipa bibibibi bya lwīso, tufwaninwe kulomba Yehova etukwashe tushintakanye mukao na ‘kanye ka lusa.’

Bijika Bikwabo bya Lusa

¹⁴ Kijika kikwabo kikokeja kutalaja mutyima wetu wa lusalusa i kibidiji kya kubandila bilongwa bilombola bukalabale. Makayo ne kwipwija mukose kwimanine pa bilongwa bya bukalabale kutononanga bantu bashilule kwivwana kyaka kya kusaka kumwanga mashi. Mu kitatyi kyasonekelwe Bible, bajentaila bādi na kibidiji kya kubandila makayo a kwitapakanya ne kwikupila na banyama ba budyanyi, nansha miswelo mikwabo ya masusu a lufu ādi asusulwa bantu mu bizuilo bya makayo mu Umbikalo wa bene Loma. Kukwatañana na mwifundi wa mānga umo, kwipwija mukose kwa uno muswelo “kwāipaile mijilo yabo yonso yādi ikokeja kwibateneka bevwane lusa pamwanda wa masusu a bakwabo, ngikadila ishiyañanya bantu na banyama.” Kwipwija mukose kuvule kulombolwa mu ino ntanda dyalelo kudi na lupusa lwa muswelo umo onka. Bakristu, balonga bukomo bwa kwikala na kanye ka lusa, bafwaninwe kutonga senene mabuku obatanga, mafilime, ne ma programe a Televizio. Balamine mu ñeni bino binenwa bya Mitoto 11:​5, mwanda dyo dishinda dya ñeni: “Mubi ne uswele bikungulu bya bulobo [Yehova] ushikilwe’ye.”

¹⁵ Muntu wisakila enka kamweno ka aye mwine, nandi ukokeja kubulwa lusa. Uno nao i mwanda mukatampe, nka na mwikishintulwila mutumibwa Yoano amba: “Ino yewa udi ne bintu bya panopantanda, utalanga mwanabo ubudilwe’byo washita pa mutyima wa kanye, lelo penepo lusa lwa Leza lwikele mudi aye namani?” (1 Yoano 3:17) Mu kyelekejo kyandi kya mwine Samadia muyampe, Yesu wālombwele’mo kitobo umo wādi utele mutyima enka ku kitenta kyandi kete kya kulama boloke ne mwine Levi walombwele kubulwa kwa lusa kwa muswelo umo onka. Pa kumona ngikadilo ya malwa yādimo mwanabo Muyuda mupungile, basasukīle ku mutamba mukwabo wa dishinda, bapita ne kwimanapo mpika. (Luka 10:​31, 32) Ino, bakristu badi na lusa balondololanga bukidibukidi ku bisakibwa bya ku ngitu ne bya kumushipiditu bya banababo. Pamo na mwine Samadia wa mu kyelekejo kya Yesu, batanga mutyima ne ku kamweno ka bantu bakwabo. Omwanda bapānanga kitatyi kyabo, bukomo bwabo, ne lupeto lwabo na nsangaji mwanda wa kukwatakanya mwingilo wa kulonga bana-babwanga. Bakwashanga tununu ne tununu twa bantu bakamone lupandilo.​—1 Temote 4:16.

Twikalei na Lusa lwa Babela

¹⁶ Misongo i kyepelo kya bantu bonso ba bubi ne lufu. Bakristu nabo kebakingilwepo ku kino, ne bavule umbukata mwabo kebengilangapo mingilo ya kiñanga, ne kebakokejapo kulonga bingelengele pamo bwa bakristu babajinji batambwile bukomo bwatambile kudi Kristu ne ku batumibwa bandi. Pakufwa kwa batumibwa bakristu ne kwa bengidi-nabo ba pabwipi, buno bukomo bwa bingelengele bwapwile. Omwanda nanshi, manwa etu akukwasha bantu basusuka pa mwanda wa misongo ya kungitu, kutentekelelapo ne kuvutakana kwa buongolo ne misongo ya kutūmuka, adi na mikalo.​—Bilongwa 8:​13, 18; 1 Kodinda 13:8.

¹⁷ Misongo yendelanga kitatyi kivule pamo na kupepwa mutyima. Kimfwa, Yoba muntu wādi wakaminwe Leza wapepelwe bininge pa mutyima pamwanda wa misongo isansa ne bimpengele bikwabo byamuletēle Satana. (Yoba 1:​18, 19; 2:7; 3:​3, 11-13) Wādi na kyaka kya balunda bādi bakumutala na kanye ka lusa ne bādi bafwaninwe kwikala na ‘binenwa bitukija pa mutyima.’ (1 Tesalonika 5:14) Pakyaba kya kino, bano bantu basatu bādi batelwa bu basengi baile kumupempula ne kutyiba na kampeja-bukididi mfulo yakubulwa kwendelamo. Bavudije kupepwa kumutyima kwa Yoba na kumudingila’mba bimpengele byādi bimufikila byādi bikwatañane na bilubo bimo-bimo bya kumutamba wandi. Na kulombola kanye ka lusa, bakristu bakepuka kuponena mu dikinga dya uno muswelo shi mulunda nabo mu lwitabijo i umbemvu nansha shi upepwanga ku mutyima. Kitatyi kimo-kimo, kintu kikatampe’tu kisakanga babēla ne bapwēpwa pa mityima i kupempulwa na bakulumpe nansha na bakristu bakwabo batame ku mushipiditu bakokeja kwibatēleka na mutyima wa lusa, na kulombola katentekeji, ne bakebapa na buswe madingi a mu Bible.​—Loma 12:15; Yakoba 1:19.

Twikalei na Lusa ku Bakōkekōke

¹⁸ Nakampata bakulumpe bafwaninwe kulombola mutyima wa lusa. (Bilongwa 20:​29, 35) “Bātwe bakomo tusele bukōkekōke bwa bakubulwa kukoma,” ye kilomba Bible. (Loma 15:1) Byotudi bakubulwa kubwaninina, tulonganga batwe bonso bilubo bivule. (Yakoba 3:2) Kanye kakatampe kasakibwanga kitatyi kyotwisamba na “muntu upīle mambo.” (Galatea 6:1) Bakulumpe kebafwaninwepo nansha dimo kwiifwana na Bafadiseo badi belangulukila’nka pa boloke bwa abo bene, kebādi na mutyima wa lusa mu kwingidija kwa bijila bya Leza.

¹⁹ Mu kwishīla kukatampe, bakulumpe balondanga bimfwa bya kanye ka lusa lwa Yehova Leza ne lwa Yesu Kristu. Mwingilo wabo mukatampe wimanine pa kudisha, kukankamika, ne kutalaja pa mityima mikōko ya Leza. (Isaya 32:​1, 2) Pakyaba kya kwendeja myanda na kuvudija bijila bingibingi, banyemenanga ku misoñanya milumbuluke itanwa mu Kinenwa kya Leza. Omwanda mwingilo wa bakulumpe i wa kūbaka ne kutamija mu mutyima wa banababo nsangaji ne kufwijako pamwanda wa buyampe bwa Yehova. Shi mulunda-netu mu lwitabijo walonga kilubo kampanda kityetye, mukulumpe ukeepeja nyeke kumundingila kumeso a bantu. Shi i kyendelemo kwisambila pa ino myanda, mutyima wa kanye ka lusa ukamutonona mukulumpe kumwityila pafula ne kwisamba nandi pakubulwa bakwabo kutēleka misambo yabo. (Ezankanya na Mateo 18:15.) Byokikalanga kikomo pakwitēleka na muntu kampanda ne kumunekenya, mukulumpe ufwaninwe kutana umbemvu na kitūkijetyima ne kumukwasha. Kafwaninwepo nansha dimo kukimba buluji kampanda mwanda wa kumupanga mu kipwilo. Nansha shi i kyendelemo kulonga komite wa butyibi, bakulumpe bakalombola kanye ka lusa mu ngikadila yabo na muntu ulongele bubi bukatampe. Kusepelela kwabo na bakwabo kukokeja kukwasha kukufikija muntu ku kwisasa.​—2 Temote 2:​24-26.

²⁰ Ino kudi bitatyi, kebifwaninwe mwingidi wa Yehova kulombola lusa. (Ezankanya na Kupituluka 13:​6-9.) Padi mukristu ukokeja kumona bu ditompo dikatampe “kuleka kunanga” na mulunda nandi wa pabwipi nansha na mwanabo wa kumashi mupangwe pa kipwilo. Kimfwa mu uno mwanda, i kya mvubu mikatampe kuleka kumwivwanina lusa. (1 Kodinda 5:​11-13 NW) Kusumininwa kwa uno muswelo kukokeja kukankamika kipyamambo esase. Nakampata, kitatyi kyobakwasha muntu wa ngitu mikwabo, bakristu bafwaninwe kwiepeja na kulombola lusa lwa kubulwa kwendelamo lukokeja kwibafikija ku kulonga busekese.

²¹ Tubabulwe kyaba pa uno papye kya kwisambila pa bipindi bivule byotukokeja kulombola’mo kanye ka lusa​—mu kipwano kyetu na bantu batame bininge, bafwilwe, bapangwapangwa na bekadi-nabo bakubulwa kwitabija. Bakulumpe bengila bininge nabo bafwaninwe kutalwa na kanye ka lusa. (1 Temote 5:17) Twibalemekei ne kwibakwatakanya. (Bahebelu 13:​7, 17) Mutumibwa Petelo wasonekele amba: “Ikalai ne mutyima umo, ne kanye . . . ne mutyima wa lusalusa.” (1 Petelo 3:8) Na kulonga uno muswelo mu ngikadila yo-yonso mokisakibwa, tukatamija bumo ne nsangaji mu kipwilo ne kukokela bapanja bavule ku bubinebine. Kumeso kwa byonso, tukatumbija Yehova, Tata wetu wakanye ne lusa.

1. Mwanda’ka dyalelo bantu bavule basakanga kukwatakanibwa?

2. Mwanda’ka Yehova ukilāije pamwanda utala konakanya babi?

3. I kimfwa’ka kya lusa lwa Yehova kyālombwele ku bantu bakubulwa kwikala muzo wandi, ne kino kitufundijanga kika?

4. I muswelo’ka ulombola Yehova lusa ku bantu bandi dyalelo?

5. Kitatyi kikafika lusa lwa Leza pa mikalo, i kika kikafikila kipwilo kya kubulwa kumuyukanya nabubinebine?

6. I ngikadilo’ka itenekanga ba Tumoni twa Yehova ku mutyima balombole mutyima wabo wa lusalusa?

7. (a) Mu Kolose 3:​8-13, i kukwatañana’ka kudi pabukata bwa lusa ne bu-muntu bupya? (b) Kanye ne lusa bikokeja kukwasha bakristu mu bipindi’ka?

8. Mwanda’ka kidi na mvubu kwikala na mushipiditu wa kulekela bakwabo?

9. I muswelo’ka ukwatañene kanye ka lusa na kipindi kya mvubu mikatampe kya kayukeno ka bu-muntu bupya?

10. (a) I muswelo’ka ukokeja mukao kwala miji mu mityima yetu? (b) I bipa’ka bibi bikokeja kulupuka ku mukao?

11. Mwanda’ka tukokeja kunena’mba banababo na Yosefa dikumi kebādipo na mutyima wa lusa, ne kino kyebafikije ku kika?

12, 13. I kika kyotufwaninwe kulonga shi mukao ubashilula kutwela mu mutyima wetu?

14. Mwanda’ka tufwaninwe kwiepeja na kubandila makayo alombola bukalabale?

15. (a) I muswelo’ka ukokeja muntu kulombola ngikadilo ya kubulwa lusa? (b) I muswelo’ka ulondololanga bakristu babine ku bisakibwa bya balunda-nabo mu lwitabijo ne bya bantu bakwabo?

16. I mikalo’ka yotudi nayo mu myanda itala kukwasha boba babela?

17. I bufundiji’ka botutana mu muswelo watadilwe Yoba, muntu wādi mubemvu ne mufwilwe?

18, 19. (a) I muswelo’ka ukokeja bakulumpe kukwatakanya boba bakōkekōke nansha bakutupatupa? (b) Nansha shi i kyendelemo kubunda komite wa butyibi, mwanda’ka i kya mvubu ku bakulumpe kutala kipyamambo na kanye ne lusa?

20. I kitatyi’ka kekifwaninwe kulombola mutyima wa lusa ne kanye?

21. I mu bipindi’ka bikwabo motufwaninwe kulombola kanye ne lusa, ne i byabuyabuya’ka byotukatana’mo?

[Bilembwa bya pa Bifwatulo]

Pamwanda wa lusa ba Tumoni twa Yehova bavuijanga mwingilo mukatampe kewaingilwe kashaa, mu mantanda 231 ku mōbo a bantu, mu mashinda, ne mu bifungo

Kubandila myanda ilombola bukalabale, kimfwa ku ma televizio, kukokeja kutalaja kanye ka lusa lwetu

Bipangujo bya Kupitulukamo

◻ Yehova ulombolanga babipyamambo lusa lwandi muswelo’ka?

◻ Mwanda waka i kya mvubu kwikala na kanye ne lusa?

◻ I bijika’ka bimo-bimo bitukankaja kulombola kanye ka lusa?

◻ I muswelo’ka otufwaninwe kumona boba babela ne bapepwa mityima?

◻ Lelo i ba ani nakampata bafwaninwe kwikala na lusa, ne mwanda waka?

[Kapango]

BAFADISEO BAKUBULWA LUSA

Sabado, difuku dya kukokolokwa kwa kuyenga ne yenga, dyādi difwaninwe kwikala difuku dya madyese a kumushipiditu ne a kungitu ku bantu ba Leza. Ino, bakulumpe ba bipwilo bya Bayuda, baletele mbila mivule yafutulwijije kijila kya Leza kitala pa Sabado ne beilonga kekiselwa kilēmena bantu. Kimfwa, shi muntu kampanda watanwa na kizumba nansha na misongo, kādipo ukokeja kutambula bukwashi difuku dya Sabado, ponso’nka shi būmi bwandi bwikale mu kyāka bininge.

Masomo amo a Bafadiseo ādi aleta shintulwilo yakaningampo ya kijila kitala pa Sabado na kunena’mba: “Difuku dya Sabado kedyakusengapo bantu bafwilwe, nansha kukapempula babela kwine i kijila.” Bakulumpe bakwabo ba bipwilo bādi batuma bantu kulonga bupempudi bwa uno muswelo mu difuku dya Sabado, inoko na kwibadyumuna’mba: “Kusūmija impolo i kijila.”

Omwanda Yesu wādi na bubinga bwa kutopeka bakulumpe ba bipwilo bya Bayuda bādi bapela kwingidija misoñanya ya mvubu ya mu Mukanda-wabijila, kimfwa boloke, buswe, ne kufwila-lusa. Ke kya kutulumukapo shi wānene ku Bafadiseo’mba: “Mwalamunanga mwanda wa Leza ke wa bituputupu, [pamwanda wa bisela byenu]!”​—Mako 7:​8, 13; Mateo 23:23; Luka 11:42.