“Kaluombe katyetye! Kemukikwatwa moyo”

“Kaluombe katyetye! Kemukikwatwa moyo, mwanda Shenu imutōkwe pa mutyima kwimupa bulopwe.”​—LUKA 12:32.

“NANSHI mwikale kusaka bulopwe bwa Leza, ebiya byobya byonso bikemutentekelwapo.” (Luka 12:31) Pānene Yesu bino bishima ku bandi bana-babwanga, wālombwele musoñanya wāshilwile ­kuludika milangwe ya bakristu kushilwila mu kyokya kitatyi, kufikija ne dyalelo. Bulopwe bwa Leza bufwaninwe kwikala pa kifuko kibajinji mu būmi bwetu. (Mateo 6:33) Ino mu nsekununi ya mu Luka, Yesu wāendelēle na kwingidija binenwa bya kyanga ne bikankamika ku kisumpi kya bakristu ba pabula. Wānene’mba: “Bānwe kaluombe katyetye! Kemukikwatwa moyo, mwanda Shenu i mutōkwe pa mutyima kwimupa bulopwe.” (Luka 12:32) Yesu Mukumbi Muyampe, wādi uyukile’mba kudi bitatyi bya mitabakano byādi bitengele bandi bana-babwanga ba pabwipi. Inoko kebādipo bafwaninwe nansha dimo kukwatwa moyo shi babadikile bidi kukimba Bulopwe bwa Leza. Bino binenwa bya Yesu keyādipo mbila ya bukalabale, ino wādi mulao wa kyanga wādi ufwaninwe kwibapa kikulupiji ne bukankamane.

² Yesu wādi wisamba na bandi bana-babwanga na kwibatela bu “kaluombe katyetye.” Kadi wādi wisamba ne na boba bādi bafwaninwe ‘kukapebwa bulopwe’ na Yehova. Pa kwibenzakanya na kibumbo kikatampe kyāitabije Yesu mwenda mafuku, bine kino kisumpi kyādi kityetye bininge. Kadi bādi batalwa bu bantu babuleme, batongelwe mwingilo mukatampe wa kukekala bu balopwe mu mafuku akaya kumeso. Shabo, Mukumbi Mukatampe, Yehova imwite kaluombe katyetye mwanda wa kukebapa kipyanwa kyabo kya momwa mūlu kukwatañana na Bulopwe bwa Kristu bwa Kimeshiasa.

Kaluombe Katyetye

³ I ba ani babundile kano kaluombe katyetye kadi na dyese ditulumukwa uno muswelo? I balondi ba Yesu Kristu bashingwa māni na mushipiditu sandu. (Bilongwa 2:​1-4) Mutumibwa Yoano pa kwibamona bu tuimba twa momwa mūlu bakwete nsense mu maboko abo, wāsonekele’mba: “Kadi na’mba ntale, namwene Kāna-kamukōko kēmene pa lulu lwa Ziona, kwadi tununu katwa, pādi ne tununumo makumi aná ne tuná twa ba dijina dyandi ne dijina dya Shandi malembwe pa mapala abo. E boba bakubulwa kwibipija ku bāna-bakaji, ke-bantu i bankungulume. Bo boba bakulonda Kāna-ka-mukōko konso kwāenda. Bakūdilwe umbukata mwa bantu ke byakulakisha bya Leza, ne bya Kāna-ka-mukōko. Kadi mu byakanwa byabo kumonamo bubela mpika; kadi i bakubulwa nansha kabulema kēne mpika.”​—Kusokwelwa 14:​1, 4, 5.

⁴ Tamba pa Pentekosa wa mu mwaka wa 33 K.K., bano bakristu bashingwe-māni, babutulwe kumushipiditu bengilanga pamo bwa mikendi ya Kristu pano pantanda. (2 Kodinda 5:20) Dyalelo, bashelesheleko ba mu bano bakristu, bengidilanga pamo bu kabumbo ka “umpika wabinebine ne wamanwa.” (Mateo 24:45; Kusokwelwa 12:17) Tamba mu mwaka wa 1935, kudi abo ikwilunge “mikōko mikwabo,” bakristu badi na lukulupilo lwa kukekala pano panshi, pano kibalwa kyabo i tununu na tununu. Bebakwashanga’ko mu kusapula myanda miyampe kujokoloka ntanda yonso.​—Yoano 10:16.

⁵ Lelo i ngikadilo’ka idi na basheleko ba mu kaluombe katyetye bakidi pano pantanda? Byobayukile’mba bakatambulanga “Bulopwe bwampikwa kuyūka kutenkana,” bengidilanga Leza mwingilo ukola, na kwakamwa Leza ne luzakalo ponka. (Bahebelu 12:28) Mu mityima yabo, i bayuke’mba badi na madyese akubulwa kudingakanibwa ne kibapanga nsangaji ya kubulwa mfulo. Pamo’nka na mwāshintulwidile Yesu madyese abo a kwabilwa ku Bulopwe, i batāne “dilungo dimo dileme nakampata.” (Mateo 13:​46, NW) Pano penda pafwena kyamalwa kibuke, bengidi ba Leza bashingwe-māni bemene senene pakubulwa moyo. Nansha byobayukile kala kikaponena pa ino ntanda ya bantu mu ‘difuku dikatakata dya Yehova ne dya kitentejo,’ kebadipo na moyo wakubulwa kwendelamo utala pa kitatyi kya kumeso. (Bilongwa 2:​19-21) I kika kyobakokeja kutyinina?

Kibalwa Kyabo Kyenda Kityepa

⁶ Kushilwila mu myaka yapityile kunyuma’i kibalwa kya ba mu kaluombe katyetye bakidi pano pantanda pano kibatyepa bininge. Kino kyamwekele patōka kupityila ku lapolo wa mu 1994 wa Kivulukilo. Mu bipwilo 75 000 bya bantu ba Yehova kujokoloka ntanda yonso, mwādi bantu 8 617 kete bādile ku mukate ne kutoma ku vinyu na kulombola’mba i bamo ba mu basheleko. (Mateo 26:​26-30) Ino kibalwa kya bonso batenwe’ko kyādi bantu 12 288 917. Bakristu bashingwe-māni bayukile’mba kino ye akyo kyādi kifwaninwe kulongeka. Yehova imutonge kibalwa kityetye, bantu 144 000, ba kubunda kaluombe katyetye, ne wāshilwile kwibakongela pamo tamba pa Pentekosa wa mu 33 K.K. I kimweke patōka’mba lwito lwa kaluombe katyetye lwādi lwa kufula kitatyi kyādi kya kufikila buvule bonso kubwipi na kukubwana, ne kyāmwekele patōka’mba kukongakanibwa konso kwa bano bakukapebwa madyese a pabula kwāfudile mu 1935. Inoko, bupolofeto bwālombwele’mba kibalwa kya mikōko mikwabo mu mafuku a kumfulo kyādi kifwaninwe kwilundilako kufikija ne kukwikala bu “kibumbo kikatampe kine kekibadibwapo na muntu, mhm; batambile mu mizo yonso, ne mu bisaka byonso ne mu bantu, ne mu ndimi.” Tamba mu 1935, bantu bavule bakongakanibwa na Yehova i boba ba mu kibumbo kikatampe, badi na lukulupilo lwa kukekala na būmi bwanyeke ne nyeke mu paladisa pano pantanda.​—Kusokwelwa 7:9; 14:​15, 16; Mitoto 37:29.

⁷ Bavule umbukata mwa boba ba mu kaluombe katyetye bakidi pano pantanda ke banunu bininge, kebadi na myaka 70, 80, ne 90 ne kupita. Batyetye umbukata mwabo kebadi na myaka 100. Bonso bayukile’mba kumfulo kwabo, kupityila ku lusangukilo lwa kokwa kūlu umo ne umo umbukata mwabo ukelunganga kudi Yesu Kristu ne kukabikala nandi mu Bulopwe bwandi bwa Ntumbo. Boba ba mu kibumbo kikatampe bakekalanga pano panshi munshi mwa lupusa lwa Kristu Mulopwe. Mu kino kitatyi, tusepelelei mu byobya bitubikile Yehova. Ke muntu ne muntu po kasuku kandi ukokeja kwitongela aye-mwine lukulupilo lwakokeja kwikala nabo. I Yehova aye-mwine utonga. Inoko, bino bibumbo byonso bibidi bikokeja kusepelela mu lukulupilo lwabyo lulumbuluke lwa būmi bwa nsangaji bukaya kumeso, momwa mūlu nansha mu paladisa pano panshi munshi mwa buno Bulopwe.​—Yoano 6:44, 65; Efisesa 1:​17, 18.

⁸ Kaluombe katyetye ka bantu 144 000 ye ako kabundile ‘Isalela wa Leza,’ wāpingakanine pa Isalela wa bungitu kukwatañana na mpango ya Leza. (Ngalatea 6:16) Kino kishintulula’mba basheleko i bantu bamfulo ba mu Isalela wa kumushipiditu, bakidi pano pantanda. Bano basheleko batulwanga biyukeno bya kwitabijibwa kwamfulo na Yehova. Ye akyo kyamwene mutumibwa Yoano mu kimonwa, usekununa’mba: “Namwene ne mwikeulu mukwabo, ukanda kutunduka, wadi ne kiyūkeno kya Leza wa būmi, kadi waningija ne diwi dikatampe kudi boba bamwikeulu baná, bapebwe kumwesha ntanda malwa, ne mema kumo, amba: kemukimweshai kala ntanda malwa, nansha mema, nansha mityi, poso’nka tupwe bidi kutula biyūkeno pa mapala a bapika ba Leza wetu. Ebiya kadi naivwene mo babadilwe boba batūdilwe biyukeno, badi tununu katwa, ne makumi aná ne tuná a tununu batūdilwe biyūkeno ba mu bisaka byonso bya bāna ba Isalela [wa kumushipiditu].” (Kusokwelwa 7:​2-4) Uno mwingilo wa kutūla ba mu Isalela wa kumushipiditu biyukeno, kemwendelele bininge, kino kilombola’mba kubashala mafuku matyetye kete, myanda mikatampe yotutengele ikafikidile. Kadi kino kilombola’mba kyamalwa kibūke pano kibafwena, kitatyi kikalekelela bamwikeulu baná mvula iná ya pano pantanda ya bonakani.​—Kusokwelwa 7:14.

⁹ Ba mu kibumbo kikatampe boba kebapwe kala kukongakanibwa, kibalwa kyabo kekifike kala pa ma miliyo mavule a bantu. Kino kikankamikanga basheleko kashāa! Nansha kibalwa kya ba kaluombe katyetye byokyenda kityepa, ino ibafundije bana-balume bavule babwino ba mu kibumbo kikatampe mwanda wa kuvuija biselwa bikatampe kukwatañana na kutanta kwa bulongolodi bwa Leza bwa pano pantanda. (Isaya 61:5) Ka na mwekilombwedile kala Yesu, kukekalanga bakapanda ku kyamalwa kibūke.​—Mateo 24:22.

“Kemukikwatwa Moyo”

¹⁰ Satana ne bandemona bandi ibatūkijibwe, badi kufula-kufula kwa pano pantanda. Aye ne bibumbo byandi batakikwanga mwanda wa bakakolomone bantu ba Yehova na kwibatamba divita. Dino divita i dishintululwe mu Bible bu divita dya Koka wa Makoka. Ne i ba ani nankampata bakaninwa kukatambwa divita na Dyabola? Lelo i basheleko bamfulo ba mu kaluombe katyetye ka Isalela wa Leza, bashikete mu ndoe ‘pa byaba bitunduke bya pano pantanda’? (Ezekyele 38:​12) Eyo, ino basheleko ba mu kabumbo ka bashingwe-māni, ne balunda nabo bakatyino ka kulemeka bijila, bakamonanga muswelo ukakolomona Satana ‘kilongwa kikatampe kya ­kubulwa kwibidila,’ kikalupulwa na Yehova Leza. Ukalupukanga mwanda wa kulwila bantu bandi, na kupulumuna “difuku dya kitenteji dya Yehova.” (Isaya 28:21; Yoela 2:31) Dyalelo, umpika wabinebine ne wamanwa uvuijanga mwingilo mukatampe, upandija būmi, na kudyumuna bantu ku kino kilongwa kyeni kikalonga Yehova. (Malaki 4:5; 1 Temote 4:16) Lelo ukwatakanyanga na bukankamane uno mwingilo na kusapula mwanda muyampe wa Bulopwe bwa Yehova? Lelo ukendelela na bukankamane na kuvuija uno mwingilo pakubulwa moyo bu musapudi wa Bulopwe?

¹¹ Pa kutala ngikadilo idimo ntanda dyalelo, bine kino kyo kitatyi kifwaninwe kaluombe katyetye kutá mutyima ku binenwa byēbalombwele Yesu: “Kaluombe katyetye! Kemukikwatwa moyo.” Ino ngikadilo ya uno muswelo idi na kamweno kakatampe pa kutala byonso bilongeka mu kino kyetu kitatyi kukwatañana na mpango ya Yehova. Umo ne umo pakasuku, ku bonso ba mu kaluombe katyetye ibayuke kamweno ka kūminina nyeke kufikija ne kumfulo. (Luka 21:19) Umo ne umo wa mu basheleko ba mu kaluombe katyetye ufwaninwe kūminina ne kwilombola bu wakikokeji kufikija ne kumfulo, pamo ka na mwālongele Yesu Kristu, Mfumu ne Mutangidiji wa kaluombe katyetye, wāuminine ne kwilombola bu wakikokeji kufikija ne kumfulo ya būmi bwandi pano pantanda.​—Bahebelu 12:​1, 2.

¹² Bashingwe-māni bonso bafwaninwe kwikala na milangwe ya muswelo umo na yādi na mutumibwa Polo. Ivwanai byānene uno mukristu mushingwe-māni wādi usapula ku bantu bonso lusangukilo; binenwa byandi ibikwatañane na musoñanya wa Yesu wa kubulwa kukwatwa moyo. Polo wāsonekele’mba: “Vuluka Yesu Kidishitu musangulwe mu lufu, wa lukunwa lwa Davida, monka mwendele myanda-miyampe yami; mo mwenena malwa a kukutwa bifungo bwa ami kapondo, ino mwanda wa Leza ao keukutyibwangapo, mhm. E po nkankamanine umbintu byonso mwanda wa batongibwa, na’mba bamone lupandilo lwa mudi Kidishitu Yesu, ne ntumbo ya nyeke ponka. Uno mwanda uno’u i wa binebine’tu, amba: shi twafwile nandi pamo, nankyo tukēkalanga bōmi pamo na aye; shi tukankamanine monka, nabya tukabikalanga nandi pamo, ino wivwane tumutune, nankyo nandi uketutuna; shi tudi bampikwa kukulupilwa, nanshi aye i mukulupilwe nyeke; ke-muntu aye kamonepo mwakwifutulwila, mhm.”​—2 Temote 2:​8-13.

¹³ Pamo’nka na mutumibwa Polo, basheleko ba mu bashingwe-māni ba mu kaluombe katyetye, i beteakanye nyeke mwanda wa kūminina mu masusu aku benda basapula musapu wa bukomo udi mu Kinenwa kya Leza. Lukulupilo lwabo i lwa mushike bininge mwanda balamete nyeke ku milao ya Leza itala pa lupandilo ne ya kukapebwa “kilukwa kya būmi” shi belombole bu bakikokeji kufikija ne ku lufu. (Kusokwelwa 2:10) Kupityila ku kusangulwa kwa ponka na ponka ne kwalamunwa pamo ka na kukopa kwa diso, bakekala umbumo na Kristu mwanda wa kubikala pamo nandi bu balopwe. Bukekalanga ­bushindañani bukatampe bobakashinda ino ntanda pamwanda wa kulama kobalamine butuntulu bwabo!​—1 Yoano 5:3, 4.

Lukulupilo Lwapabula

¹⁴ Lukulupilo lwa lusangukilo ludi na kaluombe katyetye i lwapabula. Mu buluji’ka? Buluji bumo i buno, lukabadikidilanga lusangukilo lwa bantu bonso “boloke ne bampikwa koloka.” (Bilongwa 24:15) Bine, lusangukilo lwa bashingwe-māni ludi pa kifuko kibajinji kya buleme bukatampe, ilupangwe mungya ndudi senene; ye mokilombwedilwe patōka mu 1 Kodinda 15:20, 23 amba: “Kidishitu wasangulwa mu bafu, ke kipa kibajinji kya boba bālala mu tulo. Ino, nanshi bonso, monka mo bēlondela, wa pandi, wa pandi; Kidishitu i kipa kibajinji; kadi ne boba badi ba Kidishitu pa kwiya kwandi.” Na kulombola kūminina ne kikokeji pamo na kyādi na Yesu, ba mu kaluombe katyetye bayukile kyokya kibabikilwe kumfulo kwa būmi bwabo pano pantanda, nakampata tamba kashaa Mfumwetu wiya kupempula tempelo yandi mu 1918.​—Malaki 3:1.

¹⁵ Polo ubwejako buluji bukwabo bulombola’mba luno lusangukilo i lwapabula. Wāsonekele mu 1 Kodinda 15:51-53 amba: “Talaipo, bidi, byo nemusokwela kifibwe; ketukalālangapo mu tulo bātwe bonso, ehe, nanshi tukālamunwanga bātwe bonso. Bukidibukidi bonka na kukopa [kwa] dīso, ponka pa mpungi ya kufulako . . . Ke-muntu mo kyendele i muno’mba, kino kibole kivwale kyakubulwa kubola, kadi kino kyalufu nakyo kivwale kyakubulwa kufwa.” Bino binenwa bisambilanga padi ba mu kaluombe katyetye bafwa umbula bwa kino kyetu kitatyi kya kwikalapo kwa Kristu. Pakubulwa’mba balale kitatyi kilampe mu lufu, bavwalanga kubulwa kufwa “bukidibukidi bonka na kukopa [kwa] dīso.”

¹⁶ Kupityila ku kuno kwivwanija kulumbuluke, pano tukokeja kwivwanija buluji bwa binenwa bya Yoano, mutumibwa, mu Kusokwelwa 14:12, 13. Wāsonekele’mba: “Ponka pano po pa kutūkija mutyima kwa bapandulwemo bakulama bijila bya Leza, ne kwitabija kwa Yesu. Ebiya naivwene diwi mūlu amba: Soneka’mba: Bo bakatōkwe, shabo boba bafu bafwila mudi Mfumwetu kushilwila ku dyalelo dino’di; ino Mushipiditu nandi’mba; mo monka, [bakokolokwe mu mingilo yabo, NW] ke-bintu bilongwa byabo bibakunkujanga.”

¹⁷ Basheleko ba mu kaluombe katyetye babikilwe mpalo milumbuluke kashāa! Lusangukilo lwabo i lwa ponka na ponka, kupwa’tu kwa lufu lwabo. Bekalanga bamona kwalamuka kukatampe pa kushilula mingilo yabo mu kipindi kyabo kya momwa mūlu! Kuno kutumbijibwa kwa kaluombe katyetye kekushilule kala ne kufikidila kwa bupolofeto bukatampe bwa mu Bible kekwendelele bininge; omwanda ba mu kaluombe katyetye bakidi pano pantanda bafwaninwe ‘kwikala pakubulwa moyo.’ Pakwabo kadi, na kwikala pakubulwa moyo, bakankamikanga ba mu kibumbo kikatampe, bafwaninwe kutamija mushipiditu wa kubulwa moyo, pobakitengele kukanyongololwa umbula bwa kitatyi kya byamalwa bikomo kebyamwekele kashāa.

¹⁸ Kuvuluja mingilo ya kaluombe katyetye kwibakankamikanga abo ne ba mu kibumbo kikatampe mwanda wa bakamwe Leza. Nsāa ya butyibi bwandi kemifwene, ne kitatyi kilumbuluke kyashalako i kilēme bininge. Bine bantu bakwabo kitatyi kyebashadilako i kityetye bininge. Inoko, ku wetu mutamba, ketudipo na moyo wa kutyina kubulwa kukafikidila kwa mpango ya Leza. Bine ikafikidilanga!

¹⁹ Mawi makatampe a momwa mūlu, kemevwanikwe kala: “Bulopwe bwa panopantanda pano ke bwa Mfumwetu, ne bwa Kidishitu wandi; ukabikalanga nyeke ne nyeke.” (Kusokwelwa 11:15) Bine, Yehova Mukumbi Mukatampe, ukunkwijanga luombe lwandi lonso mu ‘mashinda a boloke pamwanda wa dijina dyandi.’ (Mitoto 23:3) Kaluombe katyetye kendanga kakumbilwa bityebitye na kikulupiji kyonso ku mpalo yabo ya kokwa kūlu. Mikōko mikwabo nayo, i kakulwanga ku kyamalwa kibūke ne kukasepelela mu būmi bwanyeke mu kipindi kya pano panshi kya Bulopwe bwa Leza bwa ntumbo, munshi mwa buludiki bwa Yesu Kristu. Shi kepano, nansha binenwa bya Yesu byobitala enka pa kaluombe katyetye kete, inoko bengidi ba Leza bonso ba pano panshi badi na buluji bwa kukokela ku bino bishima: “Kemukikwatwa moyo.”

[Bipangujo]

1. I kika kyānenēne Yesu’mba: “Kaluombe katyetye! Kemukikwatwa moyo”?

2. Kaluombe katyetye i kabundwe na ba ani, ne mwanda’ka badi na madyese a pabula?

3. I kimonwa’ka kya kutendelwa kya kaluombe katyetye kyāmwene Yoano?

4. Kaluombe katyetye kengilanga mwingilo’ka dyalelo pano pantanda?

5. Basheleko ba mu kaluombe katyetye badi na ngikadilo ya muswelo’ka, ne mwanda’ka bafwaninwe kwikala pakubulwa moyo?

6, 7. (a) Mwanda’ka kibalwa kya ba mu kaluombe katyetye bakidi pano pantanda i kityetye bininge? (b) Umo ne umo ufwaninwe kumona muswelo’ka lukulupilo lwadi nalo?

8. Kutulwa biyukeno kwa ba mu ba 144 000 kekwendelele bininge muswelo’ka, ne i kika kikalongeka pokukavuika?

9. Kaluombe katyetye kamwene muswelo’ka kwilundilako kwa kibalwa kya ba mu kibumbo kikatampe?

10. (a) I divita’ka dikaponena pa bantu ba Leza, ne dikafulanga ku kika? (b) I bipangujo’ka bifwaninwe kwiipangula umo ne umo wa umbukata mwetu?

11. Mwanda’ka bukankamane budi na kamweno kakatampe dyalelo?

12. I muswelo’ka wakankamikile Polo bakristu bashingwe-māni baleke kukwatwa moyo, pamo ka na mwekilongele Yesu?

13. I kikulupiji’ka kyūmu kidi na ba mu kaluombe katyetye, ne kino kibatakikanga balonge kika?

14, 15. Mwanda’ka lukulupilo lwa lusangukilo lwa ba mu kaluombe katyetye i lwapabula?

16, 17. Pamwanda utala lukulupilo lwabo lwa lusangukilo, i muswelo’ka weselwa bininge bakristu bashingwe-māni dyalelo?

18, 19. (a) Mwanda’ka tukokeja kunena’mba tudi mu kitatyi kifwaninwe kutyiba mbila na kampeja-bukidi? (b) Mwanda’ka bashingwe-māni ne mikoko mikwabo kebafwaninwepo kukwatwa moyo?

Ukokeja Kushintulula?

◻ Mwanda’ka kibalwa kya basheleko ba mu kaluombe katyetye kifwaninwe kutūka?

◻ Basheleko ba mu bashingwe-māni badi mu ngikadilo’ka dyalelo?

◻ Mwanda’ka bakristu bafwaninwe kwikala pakubulwa moyo nansha byafwena divita dya Koka wa Makoka?

◻ Mwanda’ka lukulupilo lwa lusangukilo lwa ba 144 000 i lwapabula nakampata dyalelo?