Lelo Bakufwatakenyanga Myanda?

LELO bukalabale bwa kulwa na bantu ba tubila tungi, kwisañuna kwa nkoba, mboloji, mankufi, ne kukubija bantu, bīifwene ku kika? Abyo byonso bitambile ku kibidiji kibi kitandabwile bantu​—ke mfwatakani kadi!

Lelo mfwatakani i kika? Dibuku dimo encyclopédie dishintulula’mba i “kufwatakanya myanda pakubulwa kwitudilako kitatyi kya kwiijingulula senene.” Byotudi bantu bakubulwa kubwaninina, kitatyi kimo-kimo, twikalanga tufwatakenya bakwetu myanda. Pakwabo ukokeja kuvuluka kitatyi kyowāikele kufwatakenya bakwenu myanda pakubulwa bukamoni bupotoloke. Bible utopeka kino kibidiji kya kufwatakanya myanda amba i kishīle na mumweno wa myanda wa Yehova Leza. Unena’mba: ‘Leza kamonangapo mumwena muntu, mwanda muntu umonanga kyokya kimweka ku meso; ino Yehova aye umonanga mwikadile mutyima.’​—1 Samwele 16:7.

Mfwatakani Ikokeja Kusanshija

Pakubulwa ne kutatāna kwine, muntu yense wāikele kulangilwa bibi na mukwabo mu kitatyi kampanda. (Enzankanya na Musapudi 7:​21, 22.) Pavule, batwe bonso bekalanga betufwatakenya myanda. Inoko, shi myanda ipūtwe bukidi bukidi, padi mfwatakani ikokeja kusanshija bityetye’tu, nansha kadi keikokejapo kuleta ne bisanso bine. Kulama milangwe ya uno muswelo ko kuletanga bisanso. Kulama mfwatakani kukokeja kwitutonona twitabije milangwe yabubela. Kimfwa, mfwatakani itononanga bantu bamo-bamo betabije’mba muntu kampanda udi na mudyopolo, i muzoze, i mulembakane, nansha’mba i wamitatulo enka pamwanda i wa mu mutōtelo kampanda, wa mu kibundi kansangwa nansha wa mu muzo kankenge.

Pavule, mfwatakani ya uno muswelo ifikijanga bantu ku kulongela bakwabo myanda ku nshikani, kwibalubila, nansha kwibasusula.

Midiyo mivule ya bantu baikele kwipaibwa mu butapani bukomo, mu bulwi bwa kusaka kukubija muzo, kwipaya bantu ba tubila tungi, ne miswelo mikwabo ya mfwatakani mipite kipimo.

Kujokoloka ntanda yonso, imbikalo ilwanga bininge mwanda wa kufudija mfwatakani na kuleta kikulupiji kya kutulako bwanapabo, mutyima-ntenke, ne kwenzankana kwa bantu. Shi utange mu mukanda wa mbila nansha wa bijila bya mu yenu ntanda, bine ukatana’mo mbila nansha musoñanya wisambila pa kukwatakanya bana ba kibundi bonso, pakubulwa mboloji amba yeu i wa kabila kampanda, wa mu mutōtelo kabidye, ne kubulwa kutala’mba i mwana-mukaji’ni i mwana mulume. Eyo, mfwatakani ne kwisañuna ibisambakane konso konso.

Lelo nobe bakufwatakenyanga myanda? Lelo bakutelanga bu muntu wamudyopolo, muzoze, mulembakane, nansha bu muntu wamitatulo enka pamwanda wa lukoba lobe, myaka yobe, muzo obe, nkulupilo ya mutōtelo obe, nansha kadi mwanda wi mwana-mukaji, nansha mwana-mulume? Lelo bakupelelanga kukusela ku masomo, kukutweja pa kaji, kufutyila ku njibo kampanda nansha kukupa bukwashi bupebwa bantu bonso pamwanda wa mfwatakani? Shi kidi namino, le i kika kyokokeja kulonga?

[Kapango pa paje 3]

Kulama mfwatakani kuletanga mfika na bantu ba nkoba ingi