Bipangujo Bya Batangi
Kitatyi kimo-kimo tumvwananga bana betu banena nansha kadi balombela’mba Bulopwe bwa Leza bwiye pano pantanda. Lelo uno muneneno i mufwaninwe’ni?
Mungya buluji, uno muneneno keukwatañenepo na Bisonekwa. Bulopwe bwa Leza bubikēle momwa mūlu. Omwanda mutumibwa Polo wāsonekele’mba: “Mfumwetu ukanyongolola ne ku mīngilo yonso mibi, shi yaka, shi yaka, ne kumpandija biyampe, senene, shē, ku bulopwe bwandi bwa mūlu; kudi aye kwikale ntumbo ya nyeke ne nyeke. Amena.”—2 Temote 4:18; Mateo 13:44; 1 Kodinda 15:50.
Bulopwe bwāshimikilwe mūlu mu mwaka wa 1914, ne kebukatundulwilwapo nansha dimo pa ino ntanda ikalamunwa ke Paladisa nansha ku kifuko kikwabo, mhm. Yesu Kristu ye Mulopwe wa buno Bulopwe. Yesu byadi Mulopwe, udi na lupusa pa bamwikeulu. Omwanda nanshi, kifuko kyandi kya kibikēlo i ku lundyo lwa Leza momwa mūlu. Bakristu bashingwe-māni bakabikala pamo nandi bu balopwe ne bu bitobo momwa mūlu.—Efisesa 1:19-21; Kusokwelwa 5:9, 10; 20:6.
Lelo kino kishintulula’mba ketufwaninwepo kulombela Leza na kwingidija myanda idi mu Milombelo ya Mfumwetu mobanena’mba: “Bulopwe bobe bufike. Kiswamutyima kyobe kilongeke pano panshi enka mo kikadile mulu”? (Mateo 6:10, MB) Ke amopo, ino milombelo i myendelemo, ne dyalelo dine ikidi na buluji bwabinebine.
Bulopwe bwa Leza bukendeja myanda yonso ya pano pantanda, uno o mulangwe otwikalanga nao mu mutyima kitatyi kyotulombelanga na kwingidija bishima bidi pamo bwa byobya bidi mu Milombelo ya Mfumwetu. Kimfwa, Danyele 2:44 wātobele butobo’mba buno Bulopwe “bukāya” mwanda wa kukonakanya mizo yonso ne bukabikalanga pano pantanda ponso. Kusokwelwa 21:2 wisambila pa Yelusalema Mupya utūka panshi kutamba momwa mūlu. Yelusalema mupya i mubundwe na bakristu bashingwe-māni 144 000 bakekala bu musongwa wa Kristu. Kadi bakapyananga Bulopwe pamo na Yesu. Omwanda mukanda wa Kusokwelwa 21:2 ushintulula muswelo obakata mutyima ku myanda ya pano pantanda, amba bantu bakikokeji bakeselwanga madyese makatampe.—Kusokwelwa 21:3, 4.
Kufika ne pakafikidila buno bupolofeto pamo ne bupolofeto bukwabo bwakutendelwa, i kyendelemo kwendelela na kulombela Yehova Leza kukwatañana na bishima bya Yesu binena’mba: “Bulopwe bobe bufike.” Ino tufwaninwe kulama mu ñeni yetu amba mungya buluji, Bulopwe kebukāyapo pano Pantanda. Kibikēlo kya Bulopwe kekidipo pano panshi, mhm, ino kidi momwa mūlu.