Mikōko Mikwabo Ne Kipwano Kipya

“Beni . . . , enselele ulama dya sabado ne kusubija’dyopo kwidijilula mpika, ne kūminina pa kipwano kyami. Boba nkaleta’bo ku lūlu lwami lukola.”​—ISAYA 56:​6, 7.

MUTUMIBWA Yoano wāmwene, mu kimonwa kya buná kya mu mukanda wa Kusokwelwa, mvula ya kyonakanya ya butyibi bwa Yehova ikwetwe, kufika’nka ne byāpwile kutūlwa bonso babundile “Isalela wa Leza” biyukeno. Bano bo bantu babajinji kweselwa kupityila kudi Yesu, aye kipindi kibajinji kya lukunwa lwa Abalahama. (Ngalatea 6:​16, MB; Ngalwilo 22:18; Kusokwelwa 7:​1-4) Mu kino kimonwa kimo kyonka, Yoano wāmwene “kibumbo kikatampe kīne kekibadibwapo na muntu, mhm; batambile mu mizo yonso, ne mu bisaka byonso ne mu bantu, ne mu ndimi . . . , baningija ne diwi dikatampe’mba: Kupanda i kwa kudi Leza wetu ushikete pa lupona, ne kwa kudi Kāna-ka-mukōko.” (Kusokwelwa 7:​9, 10) Panena ba mu kibumbo kikatampe amba, “Kupanda i kwa kudi . . . Kāna-ka-mukōko,” i kulombola kobalombolanga’mba i beselwe dyese kupityila ku Lukunwa lwa Abalahama.

² Kino kibumbo kikatampe kyāyukene mu 1935, dyalelo ke kitabuke pa midiyo itano. Kitelelwe kukapanda ku kyamalwa kibūke, kushintulula ko kunena’mba, boba bekibundile bakapandwilwa ku būmi bwanyeke pakakalañanya Yesu “mikōko umbambuji.” Bene Kidishitu ba mu kibumbo kikatampe babadilwanga mu “mikōko mikwabo” ya mu kyelekejo kya bipombo kyāletele Yesu. Bakulupile kukekala nyeke ne nyeke mu paladisa pano pantanda.​—Mateo 25:31-​46; Yoano 10:16; Kusokwelwa 21:​3, 4.

³ Ku boba 144000, dyese dya kipwano kya Abalahama dibapebwanga kupityila ku kipwano kipya. Abo bo benē kino kipwano, bekalanga munshi mwa “buntu” ne mwa “Mukanda wa bijila wa Kidishitu.” (Loma 6:​15; 1 Kodinda 9:​21, MB) Mungya buluji, i bantu 144 000 kete babundile Isalela wa Leza badyanga ne kutoma byelekejo bya pa Kivulukilo kya lufu lwa Yesu mungya mobyendele, kadi i abo bonka kete balongele na Yesu kipwano kyandi kipya kya Bulopwe. (Luka 22:19, 20, 29) Boba babundile kibumbo kikatampe kebabadilwapo mu kino kipwano kipya. Inoko i belunge na bene Isalela wa Leza ne kwikala nabo pamo mu “ntanda” yabo. (Isaya 66:8) O mwanda i byendele’mo kunena’mba, nabo badi munshi mwa buntu bwa Yehova ne munshi mwa mukanda wa bijila wa Kidishitu. Nansha byokebadipo benē kipwano kipya, ino bamwenanga’mo biyampe.

“Beni” ne “Isalela wa Leza”

⁴ Mupolofeto Isaya wāsonekele amba: “Beni betūta kudi Yehova kumwingidila, ne kusanswa dijina dya Yehova, kwikala bengidi bandi, enselele ulama dya sabado ne kusubija’dyopo kwidijilula mpika, ne kūminina pa kipwano kyami. Boba nkaleta’bo ku lūlu lwami lukola, ne kwibapa tusepo mu njibo yami ya lulombelo; byakwela bisōkwe byabo ne bitapwa byabo biketabijibwa pa madabahu ami.” (Isaya 56:​6, 7) Mu Isalela, kino kyādi kishintulula’mba, “beni” bakubulwa kwikala bene Isalela bādi ba kutōta Yehova​—kusanswa dijina dyandi, kulonda bijidikwa bya mu kipwano kya Bijila, kulama Sabado, ne kwela bitapwa ku tempelo, “njibo ya kulombelamo” ya Leza.​—Mateo 21:13.

⁵ Mu ano etu mafuku, “beni betūta kudi Yehova” i kibumbo kikatampe. Bengidila Yehova kakasa kakasa na Isalela wa Leza. (Zekadia 8:​23) Bela bitapwa bitabijibwe pamo’nka na mwelela’byo Isalela wa Leza. (Bahebelu 13:15, 16) Batōtanga mu tempelo ya Leza ya kumushipiditu, yandi “njibo ya kulombelamo.” (Enzankanya na Kusokwelwa 7:​15.) Lelo nabo balamanga dya Sabado dya ku yenga ne yenga? Bashingwe-māni nansha mikōko mikwabo kebasoñanibwepo kwidilama. (Kolose 2:​16, 17) Inoko, Polo wānene kudi bene Kidishitu Bahebelu bashingwe-māni amba: “Kubashala mwakōlolokwa mwa bantu ba Leza bwa mu difuku dya busamba-bubidi. Ke-muntu yewa wakutwela mwakōlolokwa mwandi, nabya aye wakōlolokwa ku mīngilo yandi, monka mwāōlolokelwe Leza ku yandi.” (Bahebelu 4:​9, 10) Byabine, boba Bahebelu bātwelele “mwakōlolokwa” pa kukōkela’bo ku “boloke bwa Leza,” ne kōlolokwa bāōlolokwa pa kuleka kibidiji kibi kya kusaka kwibingija na mingilo ya Bijila. (Loma 10:​3, 4) Bene Kidishitu Bajentaila bashingwe-māni basepelelanga mwakōlolokwa mumo monka na kukōkela kobakōkele ku boloke bwa Yehova. Kibumbo kikatampe nakyo i kilunge nabo mu kuno kōlolokwa.

⁶ Kadi, mikōko mikwabo i mītūle ayo mine munshi mwa kipwano kipya, pamo’nka na mwētūdile beni ba kala mu kipwano kya Bijila. Mu muswelo’ka? Ke na kwikalapo benē kipwano, mhm, ino i na kukōkela ku bijila bitala pa kino kipwano ne pa kumwena biyampe mu mpangiko yakyo. (Enzankanya na Yelemia 31:33, 34.) Mikōko mikwabo idi na kijila kya Yehova kilembwe ‘mu mityima yayo,’ pamo’nka bwa bapwani nayo bashingwe-māni. Isenswe mpata kadi ikōkele ku mbila ne misoñanya ya Yehova. (Mitōto 37:31; 119:97) I miyuke Yehova monka mumuyukile bene Kidishitu bashingwe-māni. (Yoano 17:3) Lelo mwanda utala disao nao? Mosesa wāsoñenye bene Isalela kubwipi kwa myaka 1 500 kumeso kwa kipwano kipya kilongwe, amba: “Twejai kwisao nanshi lupu lwa mutyima wenu.” (Kupituluka 10:16; Yelemia 4:4) Nansha kuningila disao dya kungitu byokwāfudile pamo na Bijila, ino bashingwe-māni ne mikōko mikwabo bafwaninwe ‘kutweja kwisao’ mityima yabo. (Kolose 2:​11) Kya mfulo, Yehova ulekelanga mikōko mikwabo bilubo byayo ponka pa ‘mashi a kipwano kipya’ āsūmije Yesu. (Mateo 26:​28; 1 Yoano 1:9; 2:2) Leza kebetabijepo bu bana ba bulelwa ba kumushipiditu pamo na mwaitabijije bano 144000. Ino i mutele mikōko mikwabo bu myoloke, monka mwātelelwe Abalahama bu moloke, pa kwikala’ye mulunda na Leza.​—Mateo 25:46; Loma 4:​2, 3; Yakoba 2:​23.

⁷ Ku bano 144 000, kubingijibwa kwabo i kwibashitwile dishinda dya lukulupilo lwa kukabikala na Yesu Bulopwe bwa mūlu. (Loma 8:​16, 17; Ngalatea 2:​16) Ku ba mu mikōko mikwabo​—bekale bakapanda ku Amakedona, byobadi kipindi kya kibumbo kikatampe, nansha kupityila ku ‘lusangukilo lwa boloke’​—kubingijibwa kwabo bu balunda na Leza i kwibape lukulupilo lwa kukekala na būmi bwanyeke mu paladisa pano pantanda. (Bilongwa 24:15) I dyese dikatampe mpata pa kwikala na luno lukulupilo lwa kwitwa bu mulunda na Mfumu Mulopwe wa diulu ne ntanda, pa kwikala ‘mutambulwa mu kipema kyandi’! (Mitōto 15:​1, 2) Byabine, bashingwe-māni ne mikōko mikwabo i beselwe madyese byamwiko kupityila kudi Yesu, Lukunwa lwa Abalahama.

Difuku dya Kipwanyo Dikatampe

⁸ Pādi panenena Polo pa kipwano kipya, wāvulwije batangi bandi Difuku dya Kipwanyo dyādi dilondwa mwaka ne mwaka mungya kipwano kya Bijila. Mu dine difuku’dyo, kwādi kwelwa bitapwa bishīle​—kimo kya kisaka kya babitobo kya Levi, kikwabo kya bisaka 12 byambulwa babitobo. Tamba kala, kino kishintululwanga bu kitapwa kikatampe kyelekeja Yesu, kya kumwena’mo biyampe bano 144000 bakulupile kukekala mūlu, ne midiyo ya bantu bakulupile kukekala pano pantanda.a Polo wālombwele amba mu kufikidila’dyo, madyese a kitapwa kya Yesu akapungululwa kupityila ku Difuku dya Kipwanyo dikatampe dya mu kipwano kipya. Yesu, byadi Kitobo Mukatakata wa dino difuku dikatampe, wāpēne būmi bwandi bubwaninine bu kitapwa kya kipwanyo, amba bantu bamone “bukūdi bwa nyeke na nyeke.”​—Bahebelu 9:​11-​24.

⁹ Bene Kidishitu Bahebelu bavule ba mu myaka katwa imbajinji bādi bakidi na “lupata lonka lwa kulama mukanda-wabijila [wa Mosesa].” (Bilongwa 21:20) O mwanda Polo wēbavulwije amba: “[Yesu] i nsenga wa kipwano kipya, amba lufu byo ludi ponka lwa kukūla mambo a kujilula bijila adi a pa kipwano kibajinji, amba boba bakwityibwa batambule mwanda-wamulao wa bupyane bwa nyeke.” (Bahebelu 9:​15) Kipwano kipya kyākūdile bene Kidishitu Bahebelu ku kipwano kikulu kyādi kilombola patōka bupya-mambo bwabo. Dyese dyabo i kino kipwano kipya, ko kumona bāmona kukwata makasa abidi “mwanda-wamulao wa bupyane [bwa mūlu] bwa nyeke.”

¹⁰ “Muntu yense” “uloeja lwitabijo mudi Mwana” ukamwena biyampe mu kitapwa kya kinkūlwa. (Yoano 3:​16, 36, NW) Polo wānene amba: “Kidishitu nandi byāelelwe dimo dyonka kusela myanda ya bavule bene, ukasokokanga dikwabo kepakidipo pa mwanda wa bubi, mhm, ke pa lupandilo lwa boba bamutengele.” (Bahebelu 9:​28) Dyalelo, bano batengele Yesu i bene Kidishitu bashingwe-māni bakishele bōmi ba mu Isalela wa Leza ne midiyo ya boba babundile kibumbo kikatampe, badi nabo na bupyane bwanyeke. Bino bibumbo byonso bibidi bifwijanga’ko Leza pangala pa kipwano kipya ne madyese a būmi bwaebapele akwatañene nakyo, kubadila’mo ne Difuku dya Kipwanyo dikatampe ne mwingilo wa Yesu, Kitobo Mukatakata, udi mu Kikola Nakampata kya momwa mūlu.

Baputumina mu Mwingilo Ukola

¹¹ Mu mukanda wa Polo kudi Bahebelu, wāikele kukoma nakampata bukata bwa mvubu ya kitapwa kya Yesu kimanine’po mpango ya kipwano kipya, wādingakanya’kyo na byakwela bya bubi byādi byelwa pādi pakilondwa kipwano kikulu. (Bahebelu 9:​13-​15) Kitapwa kilumbuluke kya Yesu kibwanya ‘kwitukenda mityima yetu ya mundamunda ku mīngilo mifwe, mwa kwingidila senene mīngilo ya Leza mūmi.’ Ku bene Kidishitu Bahebelu, ‘mīngilo mifwe’ ādi ‘mambo a kujilula bijila adi a pa kipwano kibajinji.’ Ino ku bene Kidishitu dyalelo, i bubi bobālongele pa kala, bobēsashile na bubine, ne Leza wēbalekela’bo. (1 Kodinda 6:​9-​11) Bene Kidishitu bashingwe-māni bengilanga ‘mwingilo ukola wa Leza mūmi’ na mityima ya mundamunda mitōkejibwe tō. Ne ba mu kibumbo kikatampe nabo monka na monka. Badi na mityima ya mundamunda mitōkejibwe “mu mashi a Kāna-ka-mukōko,” bekele mu tempelo mikatampe ya Leza ya kumushipiditu, ‘mobamwingidila mwingilo ukola dyuba ne bufuku.’​—Kusokwelwa 7:​14, 15.

¹² Polo wābwejeje’ko amba: “Tufwene nanshi ne mutyima mulumbuluke wa kwitabijija nakampata, kadi ne mityima yetu misangilwe tō, ku owa mutyima wa mundamunda umbi, ne ngitu yetu nayo myoījibwe kala ne mema atōka, tō.” (Bahebelu 10:​22) I muswelo’ka otukokeja kulombola’mba lwitabijo lwetu i lwa “kwitabijija nakampata”? Polo wāsoñenye bene Kidishitu Bahebelu amba: “Tūminine konka ku kwitabija kwa kukulupila kwetu [kwa mūlu], ne kulangalanga kwine mpika; ke-muntu witulaīle uno i wabinebine. Kadi twitei mityima bātwe bene na bene ya pa kwisombela ku lusa [buswe, NW] ne mīngilo miyampe; ne kuleka’byo kubungakana mpika, pamo na muswelo wa bamobamo, poso kwikwasha bātwe bene; ne byo mwamona difuku dibafwena, po pene pa kuningija.” (Bahebelu 10:23-​25) Shi lwitabijo lwetu i lūmi, nankyo ‘ketukalekapo kubungakena pamo.’ Ne banabetu, ne batwe, tukasangela kwisombela ku buswe ne ku mingilo miyampe, kadi tukekankamika kwingila mwingilo mwinemwine wa kwenda kusapula ku bantu bonso lukulupilo lwetu, lwikale lwa kukekala pano pantanda nansha lwa kukekala mūlu.​—Yoano 13:⁠35.

“Kipwano kya Nyeke”

¹³ Lelo kikekala namani pakafikidija bantu bamfulomfulō ba mu ba 144 000 lukulupilo lwabo lwa kwenda mūlu? Le kipwano kipya kikaleka’byo kwingila? Mu kine kitatyi’kya, pano pantanda kepakekalapo nansha umo wa mu bashele’ko ba mu Isalela wa Leza. Bonso benē kino kipwano bakekala pamo na Yesu “mu bulopwe bwa [Shandi].” (Mateo 26:29) Ino tuvuluka binenwa bya Polo mu mukanda wandi waātumine kudi Bahebelu amba: “Leza wa ndoe wālwije ku lufu . . . mukumbi mukatakata wa mikōko, ku mashi a kipwano kya nyeke.” (Bahebelu 13:20; Isaya 55:3) Kipwano kipya i kya nyeke mu buluji’ka?

¹⁴ Dibajinji, i kishīle na kipwano kya Bijila, mwanda akyo kekikapingakanibwapo nansha dimo. Dyabubidi, byabuyabuya byakyo byokilupwile bikalādilanga lonso, monka mwikadile bubikadi bwa Yesu. (Enzankanya Luka 1:​33 na 1 Kodinda 15:27, 28.) Bulopwe bwa mūlu budi na kifuko kya nyeke mu mpango ya Yehova. (Kusokwelwa 22:5) Dyabusatu, mikōko mikwabo ikendelela na kumwena biyampe mu mpangiko ya kino kipwano kipya. Mu Umbikalo wa Myaka Kanunu wa Kidishitu, bantu bakikōkeji bakendelela na ‘kwingidila [Yehova] mwingilo ukola dyuba ne bufuku, mu tempelo yandi īkola’ monka mobengidila’o dyalelo. Yehova kakavulukapo kadi monka bubi bwabo bwa kala bwaēbalekele kala pa ‘mashi a kipwano kipya’ a Yesu. Bakalama nyeke mwimanino moloke wa bu balunda na Yehova, ne kijila kyandi kikekalanga nyeke kilembwe mu mityima yabo.

¹⁵ Lelo Yehova ukabwanya kunena ku bano bengidi bandi bantu amba: ‘Ndi Leza wabo, nabo i bantu bami’? Eyo. “Ukēkalanga nabo, nabo bakēkala bantu bandi, ne Leza mwine ukēkala nabo.” (Kusokwelwa 21:3) Bakekala “kitulo kya bapandulwemo,” bantunguluji ba pano panshi ba “kibundi kiswedibwe,” musongwa wa mūlu wa Yesu Kidishitu. (Kusokwelwa 14:1; 20:⁠9; 21:2) Byonso bino bikabwanika ponka pa lwitabijo lwabo mu ‘mashi a kipwano’ āsūmije Yesu, ne pa kikōkeji kyabo ku balopwe babitobo ba mūlu, bādi betwa bu Isalela wa Leza pobākidi pano pantanda.​—Kusokwelwa 5:​10.

¹⁶ Lelo bafwe bakasangulwa pano pantanda bikebekadila namani? (Yoano 5:​28, 29) Nabo baketwa kwiya ‘kwiesela madyese’ kupityila kudi Yesu, Lukunwa lwa Abalahama. (Ngalwilo 22:18) Kadi bikebasakila kuswa dijina dya Yehova, kumwingidila, kwela bitapwa byaitabija, ne kumwingidila mwingilo ukola mu njibo yandi ya milombelo. Boba bakalonga namino bakatwela mwakōlolokwa mwa Leza. (Isaya 56:​6, 7) Ku mpwilo ya myaka kanunu, bantu bonso bakikōkeji bakafikijibwa pa bu bantu babwaninine kupityila ku mwingilo wa Yesu Kidishitu ne babitobo nandi 144000. Kebakatelwapo bu boloke pa mwanda wa bulunda bonka bonka bobasambile na Leza, ehe, bakekala boloke binebine. ‘Bakālukila ku būmi,’ ko kunena’mba, bakanyongololwa lonso ku bubi ne ku lufu byobāpyene kudi Adama. (Kusokwelwa 20:5; 22:2) Dino i dyese dikatampe kashāa! Mungya kumona kwetu dyalelo, bimweka amba mwingilo wa butobo wa Yesu ne bano 144 000 penepa ukafula. Madyese a Difuku dya Kipwanyo dikatampe akengidijibwa ne pa mfulo. Ebiya Yesu ‘ukāluja bulopwe kudi wandi Leza, Shandi.’ (1 Kodinda 15:24) Kukekala matompo amfulo ku muzo wa muntu, kupwa Satana ne bademona bandi bakonakanibwa lonsololo.​—Kusokwelwa 20:​7, 10.

¹⁷ Lelo i mwingilo’ka, shi ukekala’ko, ukengila “kipwano kya nyeke” mu yoya myaka ya kusepelela ikashilula? Kyakyo ke kya batwepo kunena. Bino bya kumeso bikitusokwedile Yehova pano i bitubwane bidi. I bitutalule luzakalo. Langa’po bidi​—būmi bwa nyeke mu “madiulu mapya, ne ntanda īngi mipya”! (2 Petelo 3:​13) Ketwakilekai kintu nansha kimo kizozeje kwabila kwetu kotwabila kukapyana ino milao. Eyo, kwimanija pototo ke kintupo kipēla. Ino Polo wānene amba: “[Kūminina] e kwimwendelemo, amba pa kupwa kulonga muswidile mutyima wa Leza, nabya mumone [kufikidila kwa] mwanda-wamulao.” (Bahebelu 10:36) Lamai kino, kuno kulondwalondwa konso kukimba kunekenibwa, ne tuno tumakambakano tulomba kupwijibwa, i twana, ketudipo nansha mwa kudingakanibwa na nsangaji itutengele. (2 Kodinda 4:​17) Nanshi kekwakekala nansha umo umbukata mwetu wa kwikala “bwa boba bakwikangila ku koneka, mhm.” Ino, twikankilei kwikala “bwa boba bakwitabija kwa kupandijamo ne [muya].” (Bahebelu 10:39) Tutūlei batwe bonso kikulupiji kyonso mudi Yehova, Leza wa bipwano, i bine shi tulongele monka, muntu yense umbukata mwetu ukeselwa madyese a nyeke ne nyeke-ke.

[Kunshi kwa dyani]

[Bipangujo]

1. (a) Mwendele kimonwa kya Yoano, i kika kivuijibwa pano pakikwetwe mvula ya butyibi bwa Yehova? (b) Lelo i kibumbo kikatampe muswelo’ka kyāmwene Yoano?

2. I kitatyi’ka kyālupukile kibumbo kikatampe, ne i muswelo’ka okyāyukanikile?

3. Bene Kidishitu bashingwe-māni i beshile muswelo’ka na mikōko mikwabo pa mwanda utala kipwano kipya?

4, 5. (a) Kukwatañana na Isaya, i kisumpi’ka kikengidila Yehova? (b) Isaya 56:​6, 7 i mufikidile muswelo’ka pa kibumbo kikatampe?

6. Lelo mikōko mikwabo dyalelo idi na kyepelo’ka mu kipwano kipya?

7. Le i lukulupilo’ka lushitwidilwe mikōko mikwabo dyalelo, i bāni batelwa bu boloke pamo na mwātelelwe Abalahama?

8. Lelo bitapwa bya mu Difuku dya Kipwanyo, byādi byelwa pādi pakilondwa Bijila, byādi byelekeja bika?

9. Pa kwikala mu kipwano kipya, bene Kidishitu Bahebelu bashingwe-māni bādi bafwaninwe kukwata bika na makasa abidi?

10. Mwanda waka bashingwe-māni ne mikōko mikwabo bafwijanga’ko Leza?

11. Bashingwe-māni ne mikōko mikwabo byobadi na mityima ya mundamunda mitōkejibwe tōo na kitapwa kya Yesu, baloñanga bika na nsangaji?

12. Lelo i muswelo’ka otulombolanga’mba lwitabijo lwetu i lwa “kwitabijija nakampata”?

13, 14. Le kipwano kipya i kya nyeke mu buluji’ka?

15. Lombola kipwano kidi pa bukata bwa Yehova na batōtyi bandi mokikekadila mu ntanda impya.

16. (a) I bintu’ka bitengele boba bakasangulwa pano pantanda? (b) Le i madyese’ka akapungululwa ku mfulo kwa myaka kanunu?

17. Byotwayuka amba kudi nsangaji itutengele, umo ne umo umbukata mwetu ufwaninwe kusumininwa kulonga bika?

[Kapango pa paje 30]

MWINGILO UKOLA MU TEMPELO

Kibumbo kikatampe kitōtanga pamo na bene Kidishitu bashingwe-māni mu kipango kya pano pantanda kya tempelo mikatampe ya kumushipiditu ya Yehova. (Kusokwelwa 7:​14, 15; 11:2) Kepadipo buluji nansha bumo bwa kufwatakenya amba badi mu Kipango kingi kya Bajentaila. Kitatyi kyākidi Yesu pano pantanda, kwādi Kipango kya Bajentaila mu tempelo. Inoko, mu mpangiko yāletelwe ku bukomo bwa mushipiditu wa Leza ya mūbakilo wa tempelo ya Solomone ne ya Ezekyele, kemwādipo mpangiko ya Kipango kya Bajentaila. Mu tempelo ya Solomone mwādi lubanza lwa kipango, mwādi mutōtela bene Isalela ne bāketutyile’mo, bana-balume ne bana-bakaji, abo bonso pamo. Kino kyo kifwa kya bupolofeto kya kipango kya pano pantanda kya tempelo ya kumushipiditu, mwāmwene Yoano kibumbo kikatampe kingila mwingilo ukola.

Inoko, enka babitobo ne bene Levi bobādi batwela munda mwa kipango mwādi madabahu makatampe; enka babitobo kete bo bādi batwela mu Kikola; kadi i enka kitobo mukatampe kete ye wādi utwela mu Kikola Nakampata. Munda mwa kipango ne Kikola i bivwanikwe senene, byelekejanga ngikadilo ya pa bula idi’mo bene Kidishitu bashingwe-māni pano pantanda. Ebiya mu Kikola Nakampata mufunkilanga pa madiulu mene, mukapebwa bene Kidishitu bashingwe-māni, pamo ne Kitobo wabo Mukatampe wa mūlu, būmi bwampikwa lufu.​—Bahebelu 10:19, 20.

[Review on page 32]

Lelo Ubaivwanija?

◻ Kutalula’mo bene Kidishitu bashingwe-māni, i bāni bakwabo bakeselwa kupityila ku Lukunwa lwa Abalahama?

◻ Mikōko mikwabo byoyeselwe ponka pa kipwano kipya, i muswelo’ka oidingakene na bāketutyile’mo bādi munshi mwa kipwano kikulu?

◻ Mikōko mikwabo i myeselwe muswelo’ka kupityila ku mpangiko ya Difuku dya Kipwanyo dikatampe?

◻ Mwanda waka Polo wāityile kipwano kipya bu “kipwano kya nyeke”?