Tuningishei Kikulupiji Kyetu Mu Boloke Bwa Leza

“Amba [ki]kulupi[ji ky]obe [k]ikale mudi Yehova, nayukija’byo kodi.”​—NKINDI 22:19.

BENE Kidishitu babine i beselwe pa kupebwa buyuki bwabine butala padi Yehova ne pa mpango yandi. “Umpika wabinebine ne wamanwa” wibapanga ‘bidibwa bya kumushipiditu pa kitatyi kifwaninwe.’ (Mateo 24:​45, NW) Buyuki bobafundijibwa bwibapanga kyalwilo kikomo kya kushimika’po kikulupiji mudi Leza. O mwanda Batumoni ba Yehova bonso kya pamo dyalelo badi na kikulupiji kikatampe mudi Yehova ne mu boloke bwandi.

² Inoko bimweka’mba Batumoni bamobamo, ku muntu, ku muntu, basakilwa kuningisha kino kikulupiji. Sosiete utambulanga kyaba kimo mikanda ilombola kwalakana kukyalakanwa bushintuludi bwaleta mu mabuku andi. Kuno kwalakana kwikalanga’ko pakwabo pa mwanda utala bujadiki mu mwivwanino, nansha pa mutengelwa mwipangudi na myanda, nakampata mungya milangwe yandi.​—Enzankanya na Yoano 6:​60, 61.

³ Nansha ke bengidi babine ba Yehova nabo bemwenanga buno bubine budi mu Musapudi 9:​11 bwa amba: “Nālamuka monka namona munshi mwa dyuba, amba lubilo keludipo ku bapēla, nansha bulwi ku bakomo, nansha bidībwa ku wañeni nansha bupeta ku bantu ba kwivwanija nansha buntu ku bantu ba manwa; [mwanda kitatyi ne myanda yampikwa kulaya bifikilanga bonso].” Lelo bino bibwanya namani kwikala byabine ne mu myanda ya kumushipiditu? Padi tuyukile bene Kidishitu bādi na kampeja-bukidi ka kulondela madingi a Bible, bakomo mu kubingija bubinebine, bañeni mu kwingidija misoñanya ya Bible, bapyasakane mu kulonda buyuki bwabinebine. Ino bamobamo “kitatyi ne myanda yampikwa kulaya” pa kwibatana, abatyumwinwa panshi na kīka nansha na bununu. Bakokeja kwiipangula shi bakatwela mu ntanda impya ya Leza kumeso kwa abo kufwa.

⁴ Shi mwine Kidishitu wafwilwa mwine pandi, ushalanga upēpwa mutyima na njia ne na bushiyena. Padi abo bonso pamo, ba mulume ne mukaji, badi bengidila Yehova myaka mivule, pakwabo makumi a myaka. Yewa ushele mūmi uyukile amba lufu lo lwakutulula kijimba kya busongi bwabo.a (1 Kodinda 7:​39) Pano bimulomba kutyumwina mu manwi milangwe yandi, shi bitupu, kikulupiji kyandi kikazōza.​—Enzankanya na Mako 16:⁠8.

⁵ Bine, i kya tunangu kumona lufu lwa mwine pandi, mbutwile, mwana, nansha mulunda mwine Kidishitu bu mukenga wa kulombola kikulupiji mu boloke bwa Yehova! Nansha shi tudi kubwipi na lufu, tukulupilei’tu amba Yehova ke wa bukondamepo. Muntu ye-yense ukapebwa būmi bwanyeke​—shi ku kupanda, shi ku lusangukilo​—ukasepelela. Mulembi wa mitōto wisambila padi Leza amba: “Abe ubalanga kuboko kobe, wikutyija mityima ya bintu byonso byumi. Yehova i moloke mu mashinda andi onso, ne wabuntu mu mīngilo yandi yonso. Yehova udi pa bwipi na boba bonso bamwitanga, na bonso bamwitanga mu binebine. Ukafikijanga kisaka boba bamwakaminwe, kadi ukēvwananga [kwabija k]wabo, ne kwibapandija.”​—Mitōto 145:⁠16-​19.

Mwīivwanino wa Kususulwa Kwakubulwa Kwendela’mo

⁶ Mafuku a kunyuma, Batumoni bamobamo basusukile mwanda wa kupela kwiela mu mingilo yādi ibapeleja mutyima wabo wa mundamunda kulonga. Kifwa pa butongi bwa mingilo ya miswelo kampanda ya kisivile mu myaka ya kunyuma. Tutu ukokeja pano kwimona na mutyima wa mundamunda amba ukokeja kwingila uno mwingilo pambulwa kujilula kijila kya bwine Kidishitu kya kuleka kwikuja mu milongelo imbi ya ino ngikadilo ya bintu.

⁷ Lelo bwādi bukondame ku mutamba wa Yehova paāmulekele bidi asusuke mwanda wa kupela kyokya kyabwanya kulonga dyalelo pampikwa kujilula? Bavule mu boba badi bapela kulonga’byo banenanga’mba Yehova kalongelepo kibi. Ino abo bene basepelela’mba bāpelwe mukenga wa kulombola ku meso a bantu bonso patōka amba i basumininwe kwikala nyeke bemanije ku mutamba wa bubikadi bwa diulu ne ntanda. (Enzankanya na Yoba 27:5.) Le i buluji’ka bukokeja kutompwela muntu, aye wālondele mutyima wandi wa mundamunda wa kwimanija pototo ku mutamba wa Yehova? I kutupu’bo, kulamata kobadi balamete ku misoñanya ya bwine Kidishitu mungya mobadi bevwanina’yo, balonda mwibakunkila mityima ya mundamunda i kulombola kobadi balombola’mba i balunda na Yehova. Bine, kwepuka lwendo luvutakanya mutyima obe wa mundamunda nansha lukukaja bantu bakwabo i kya tunangu. Pa kino tufwaninwe kulanguluka pa kifwa kyāshile mutumibwa Polo.​—1 Kodinda 8:​12, 13; 10:31-​33.

⁸ Bayuda bālombelwe kukōkela ku Mbila Dikumi ne ku bijila bikwabo kubwipi kwa 600 bishileshile, mwanda wa kusangaja Yehova. Mwenda myaka, mu ino mpangiko ya bwine Kidishitu, kwingidila Yehova kekwākidipo kadi kwimanine pa kukōkela ku bino bijila, nansha ke ku Bayuda ba kungitu bene. Bijila bya kutwejibwa kwisao, kulama Sabado, kwela bitapwa bya banyema, nansha kujila bijila bitala pa bidibwa bimobimo kebyākidipo kadi bibakutyile. (1 Kodinda 7:​19; 10:25; Kolose 2:​16, 17; Bahebelu 10:​1, 11-​14) Bayuda​—ne batumibwa bene kumo​—bāalamukile ke bene Kidishitu bānyongolwelwe mu lupungu lwa kulama bijila byobālombelwe kujila pobādi bakidi munshi mwa kipwano kya Bijila. Lelo bātompwele amba mpangiko ya Leza yādi mikondame mwanda wēbalombele bidi dibajinji bintu byaāmwene mwenda mafuku bu kebikidipo na mvubu? Mhm, bāsepelele mu kulunguluka kwa kwivwanija kwa mpango ya Yehova.​—Bilongwa 16:​4, 5.

⁹ Mu ino myaka, kudi Batumoni bamobamo badi basumininwe mu mumweno wa byobadi ba kulonga nansha kuleka kulonga. Pa buno buluji, basusukile mpata kupita bakwabo. Mwenda mafuku, buyuki pa kwenda kuvudila’ko, nabo benda balungulwila’ko mumweno wabo wa myanda. Ino kebatompolangapo pa byobadi balonga mungya mwadi mwibalombwela mutyima wabo wa mundamunda, nansha shi bino byadi bibaletela masusu a malwa. Na bubine i kintu kya kutendelwa pa kwitabija’bo kususukila Yehova na kikōkeji, “[kul]ongela bintu byonso pa mwanda wa myanda-miyampe.” Yehova weselanga lulamato lwa kudi Leza lwa uno muswelo. (1 Kodinda 9:​23; Bahebelu 6:​10) Mutumibwa Petelo wāsonekele byabine, amba: “Nanshi poso i pa kulonga bilumbuluke, ino umbamone malwa, mutūkije ne mityima monka, apo shapo, e nabya’ko, ke-kintu kino i kyakufwijako kudi Leza.”​—1 Petelo 2:⁠20.

Tuboilei Ñeni pa Kifwa kya Yona

¹⁰ Yona pa kutumwa kwenda ku Nineva, wābudilwe kukwata na mutyima umo kikulupiji kyamutūdile Yehova munda. Yona pa kupwa kufikilwa na kyamalwa kyātambile ku kubulwa kukōkela kwa aye mwine, wēalakenye mundamunda, wāyuka kilubo kyandi, wāitabija mwingilo wāmupelwe mu ntanda ya bweni, ebiya wādyumuna bene Nineva ku bonakani bwādi kebudi pabwipi. Penepo mwanda mukwabo wāmweka: Bene Nineva pa kwalamuka pa mutyima, Yehova wāsangela kuleka kwibonakanya.​—Yona 1:​1–​3:⁠10.

¹¹ Lelo Yona wālonga’po kika? Wākwetwe na nsungu, kātompwela Leza mu milombelo. Kikatampe kine kya mitompwe yandi kyādi kino: ‘Nālangile kala amba bintu bifwaninwe bikekale uno muswelo. O mwanda nkyasakilepo ne kwiya kwine ku Nineva. Tala, kupwa kwa byonso byonamonamona, bya nzuba ne kufwijibwa bumvu pa kuminwa na mushipa mukatakata, ne mwingilo onekoka nao wa kudyumuna bene Nineva ku bonakani bwafwena, ino pano tudi’pi! Bine nafu nkondo bitupu! Nanshi mfwaninwe’tu nansha kufwa!’​—Yona 4:​1-3.

¹² Lelo Yona wādi na buluji boloke bwa kutompwela? Le Yehova wadi na bukondame pa kutandabwila kanye kandi ku banonga-bibi bāalamukile pa mutyima? Bine, Yona wādi wa kusepelela; tununu twa bantu twādi twa kutukila ku bonakani! (Yona 4:​11) Ino kubulwa bulēme kwandi, kutompolatompola kwālombwele amba kādipo na kikulupiji kya mushike mu boloke bwa Yehova. Wādi wilangila bivule aye mwine, ino kulangila’po bakwabo mpika. Tuboilei ñeni pa kifwa kya Yona, twifunde kuyuka kwishisa ne mu malango etu mwine. Tukulupilei amba kukōkela Yehova, kulonda buludiki bwapāna kupityila ku bulongolodi bwandi, ne kwitabija mbila yakwete, kyo kintu kyoloke kifwaninwe kulonga. Ketukivulaminwai kino, “biyampe bikekalanga na boba bakamwa Leza [wabine].”​—Musapudi 8:​12.

Kino kyo Kitatyi kya Kuningisha Kikulupiji Kyetu!

¹³ Kuningisha kikulupiji kyetu mudi Yehova i kya tunangu. (Nkindi 3:​5-8) Eyo, tufwaninwe kulonga bivule kupita’ko enka kulombela Yehova etukwashe twikale na kikulupiji. Kukulupila kutamanga shi i kushimikwe pa buyuki bwabinebine, nanshi tufwaninwe kwitūdila kifundwa kya Bible kya pa kasuku, butangi bwa Bible ne mabuku ashintulula Bible ke kyetu kibidiji kya difuku ne difuku. Kutanwa kitatyi ne kitatyi ku kupwila kwa bwine Kidishitu i kwa kamweno, kwilongolola ne kulondolola’ko bivulevule nako monka na monka. Kwikala na kibidiji kya kusapwila bakwetu bubinebine bwa Bible, kupengulula bijika na manwa, nako kuloñanga kikulupiji kyetu mudi Yehova ne mu Kinenwa kyandi kikale kya mushike. Namino, tukekala bakwatañane nandi byabinebine difuku ne difuku.

¹⁴ Mu mafuku afwena’a, kyamalwa kibūke kekyāponene kasha pa muzo wa muntu kisa kuposoka na mu kupapamukilwa. (Mateo 24:21) Dyokikafika, bengidi ba Leza bafwaninwe kwikala na kikulupiji kishimatyije kupita ne pa kyobekalanga nakyo nyeke mu boloke bwa Yehova ne mu buludiki bwandi bwaleta kupityila ku bulongolodi bwandi. Mu muneneno wa kyelekejo, bakakōkela na kikulupiji musoñanya wa Leza wa’mba: “Iyai bami bantu, twela mu tudimbwa tobe, ne kushita binjilo byobe modi; wifye abe mwine kakyaba katyetye’tu poso’nka bukalabale bupite.” (Isaya 26:20) Pano kala ke batwele mu mpakala ya bipwilo 85000 ne kupita mu matanda 232. Nansha shi uno musoñanya wa amba “twela mu tudimbwa tobe” ukalombe bintu bikwabo, ke mwandapo, tukulupile kala amba Yehova uketukwasha tukebibwanya.

¹⁵ Nanshi pano po pa kwalwila’ko kuningisha kikulupiji kyetu. Mwanda pampikwa kikulupiji mu banabetu bene Kidishitu, mu bulongolodi bwa Yehova ne, kutabukidila, mudi Yehova mwine, kupanda kekukabwanikapo. Nanshi i kyendele’mo mu bula bwa 1998, Batumoni ba Yehova kujokoloka ntanda yonso bekale kuvulujibwa na bishima bya kisonekwa kyabo kya mwaka, amba “bonso bakwita pa dijina dya Yehova bakapandanga”! (Loma 10:13) Pa kino tufwaninwe batwe bonso kulama kikulupiji. Shi tubemone nansha’tu kabushila katyutyutyutyu ka kwalakana kwa kino kikulupiji, nankyo twalwilei’ko pano pakidi mema mu manwi, twitalule’ko, bine, enka dyalelo dino’di.

Butyibi bwa Yehova Bukekala Boloke

¹⁶ Bene Kidishitu bashingwe-māni i badyumunwe mu Bahebelu 3:​14 amba: “Ke-twi bantu ke tudi bakwiabila pamo na Kidishitu, shi tūminine ponka pa ngalwilo ya [kikulupiji ky]etu, pototo, pō, ne kumfulo kwine.” Mungya buluji, bino binenwa bitala ne bene Kidishitu bakulupile kukekala pano panshi. Kikulupiji kibajinji kikokeja kudibwa na ndyabilonda shi kekitamijibwepo. Bine, i kya kamweno kwendelela na kwibweja’ko buyuki bwabinebine, mwa kuningishisha kyalwilo kyotushimikile’po kikulupiji kyetu!

¹⁷ Bantu ba mizo yonso basa kubandaulwa panopano ponka na Kidishitu, “ukebakalañanya aba koku, aba koku, enka bwa mukumbi ukalañanya mikoko umbambuji.” (Mateo 25:​31-​33, MB) Tufwaninwe kukulupila’mba Kidishitu ukekala moloke mu kutyibila boba bakapanda. Yehova umupele tunangu, bujinguludi, ne ngikadilo mikwabo mifwaninwe mwa “[kutyibila] mambo a bapanopantanda umboloke.” (Bilongwa 17:​30, 31) Tusumininwei bwa Abalahama wānene amba: “Leka! leka! leka! Abe kulongapo nankyo nansha patyetye nyunga kulampe, kutapa boloke ne babi pamo, nabya boloke badingakene pamo bwa babi; ke nankyopo, nyunga kulampe, lelo mutyibi mwine wa panopantanda a bulwe kadi kulonga molokele?”​—Ngalwilo 18:⁠25.

¹⁸ Shi binebine tudi na kikulupiji kyonso mu boloke bwa Yehova, kekudipo kyotwalakena pa kulondolola ku bipangujo pamo bwa bino: ‘Bana ba lukeke ne bana batyetye bakatyibilwa mambo namani? Lelo kumeso kwa Amakedona kufika kukekala bantu bavule bakekala kebafikīlwe na myanda miyampe? Lelo boba badi na ñeni mipatuke nabo? Le bikansangwa bikekala namani ku . . . ?’ Tuyukei’ko bidi pano amba ketujingulwilepo mukalongela Yehova pa ino myanda. Inoko ukeilonga mu muswelo moloke, wa kanye. Ketufwaninwepo kwalakana pa kino. Bine, tukashala mu kanwa pululu ne kusangala potukamona upwija’yo mu muswelo oketwadipo tulangila nansha dimo.​—Enzankanya na Yoba 42:3; Mitōto 78:11-​16; 136:​4-9; Mateo 15:31; Luka 2:​47.

¹⁹ Bulongolodi bwa Yehova kebukankejepo kwipangulwa bipangujo bya boba bepangula na mutyima umo, pa kitatyi kifwaninwe, pamo na munenena balwana nabo byamabela. (1 Petelo 1:​10-​12) Inoko, Bible udingila amba tufwaninwe kwepuka bipangujo bya bukobakane, bya mifwatakanyo bitupu. (Tetusa 3:9) Kwipangula bipangujo bijalale ne kukimba mu Kinenwa kya Leza ne mu mabuku a bwine Kidishitu mwanda wa kutana malondololo emanine pa Bible kukokeja kubweja buyuki bwetu ne kuningisha kikulupiji kyetu mudi Yehova. Buno bulongolodi bulondanga kifwa kya Yesu. Wādi wishisa kwisamba bivule pa bipangujo byaādi uyukile amba kitatyi kya kwibilondolola kekyabwene. Wāshintulwile amba: “Ngidi bidi na [bintu] bikwabo byakwisamba nenu bivule bīne. Ino kemwibiyūkapo kwibīvwana panopano.” (Yoano 16:12) Kadi wāitabije amba kudi bintu bimobimo byaādi kayukile ne aye mwine mu kine kitatyi’kya.​—Mateo 24:36.

²⁰ Yehova ukidi na bintu bivule bya kwitusokwela. Nanshi i biyampe kumwilaija, na kikulupiji amba pa kitatyi kifwaninwe kya kusokola mpango yandi, ukeisokola mungya bisakibwa bya mu kine kyaba’kya. Tufwaninwe kukulupila’mba kitatyi kya Yehova pokikafikila, tukekalanga na nsangaji, mwanda tukapebwa bujinguludi buvulevule bwa mashinda andi. Eyo, shi binebine tulamine kikulupiji mudi Yehova ne mu bulongolodi bwandi bwaingidija, tukapalwanga mpalo. Nkindi 14:26 witukulupija amba: “Mu kwakamwa Yehova e mudi [ki]kulupi[ji] [ki]komo, kadi bandi bāna bakekala ne mwakunyemenamo.”

[Kunshi kwa dyani]

[Bipangujo]

1, 2. (a) Mwanda waka Batumoni ba Yehova badi na kikulupiji mudi Yehova? (Nkindi 22:​19) (b) I kika kilombola’mba bantu bamobamo basakilwa kuningisha kikulupiji kyabo mudi Yehova?

3. I kika kikokeja kufikila nansha ke bengidi ba Yehova bene, ne mwanda waka?

4, 5. Mwanda waka bene Kidishitu kebadipo na buluji nansha bumo bwa kujimijija kikulupiji kyabo mu boloke bwa Yehova?

6, 7. (a) Mwanda waka Batumoni bamobamo basusukile pa kala pano kebadi na mwivwanino mwishile? (b) Mwanda waka ketufwaninwepo kumona Yehova bu mukondame mwanda wālekele masusu a uno muswelo pa kala?

8. Mwanda waka Bayuda bene Kidishitu bālamine dibajinji Bijila kebādipo na buluji bwa kwalakena boloke bwa Yehova?

9. I kintu’ka kyādi kyabine ku Batumoni bamobamo, ino mwanda waka kebadipo na buluji bwa kutompwela?

10, 11. Yona wālombwele muswelo’ka kubulwa kikulupiji mudi Yehova (a) paāpelwe mwingilo wa kwenda ku Nineva? (b) pālekele Leza konakanya bene Nineva?

12. I ñeni’ka yotwaboila ku byobya byāfikile Yona?

13. Batwe bonso tukokeja namani kuningisha kikulupiji kyetu mudi Yehova?

14. Mwanda waka panopano ponka bantu ba Leza bakasakilwa kulombola kikulupiji mudi Yehova kipite pa kyobekalanga nakyo nyeke?

15. Myanda itala kikulupiji i milombolwe muswelo’ka mu bula bwa 1998, ne mwanda waka i kyendele’mo kulonga namino?

16. I bika bikokeja kufikila kikulupiji shi kekitamijibwepo, ne i muswelo’ka otukokeja kulonga kino kileke kwitufikila?

17. Mwanda waka tukokeja kukulupila amba Yesu ukatyiba mambo senene pa mwanda utala bakapanda?

18. Mwanda waka ketufwaninwepo kukambakena bipitepite byobya byoketwapotolwele panopano?

19, 20. (a) Mwanda waka ke kibipo kwipangula bipangujo byendele’mo? (b) Yehova ukaleta malondololo otusaka kitatyi’ka?

[Kifwatulo pa paje 15]

Nansha shi tudi kubwipi na kujimija būmi, tufwaninwe kukulupila’mba Yehova i moloke

[Kifwatulo pa paje 16]

Lelo usumininwe amba kikulupiji kyobe kidi mudi Yehova?

Ulanga’po Namani?

◻ Mwanda waka ke kyatunangupo kuleka milangwe mibi itādila kikulupiji kyetu mudi Yehova?

◻ I ñeni’ka yotukokeja kuboila ku byobya byāfikile Yona?

◻ Mwanda waka kwifunda Bible ne kutanwa ku kupwila bidi na mvubu mikatampe?