Busapudi bwa Myanda Miyampe mu Madimi a Mutyele a mu Taiwane

Twi ba Muswelo wa Badi na Lwitabijo

Busapudi bwa Myanda Miyampe mu Madimi a Mutyele a mu Taiwane

TAIWANE i ntanda inoka mvula kitatyi ne kitatyi, o mwanda mwaka ne mwaka bangulanga’mo mutyele misunsa ibidi. Inoko kyaba kimo, nkunwa ifwanga shi mvula kashilwilepo kunoka pa kitatyi kifwaninwe. Lelo pafwanga nkunwa, kidimye upungilanga waleka’byo kudima? Nansha dimo. Uyukile amba ufwaninwe kūminina. Ukusanga nkunwa mikwabo, watumbulwila’yo mu budimi. Shi mvula wanoke, kidimye wamona kwangula mwangulo muyampe. Kukuna ne kwangula kwa ku mushipiditu nako kyaba kimo kwikalanga uno muswelo.

Kūminina mu Mwangulo wa ku Mushipiditu

Batumoni ba Yehova ba mu Taiwane ke balāle myaka mivule, baputumina’nka kuputumina mu kukuna ne mu kwangula nkunwa ya bubinebine bwa mu Bisonekwa mu myaba imo yadi imweka bu keikungepo bipa. Tulete kifwa kya Miao-li County. Mu kino kifuko, bantu bavule kebadipo betaba ku bukamoni bwadi bupānwa’mo kyaba ne kyaba. Ebiya mu 1973 ba mulume ne mukaji bapania ba pa bula bapebwa kwingila’mo bu basapudi ba Bulopwe ba kitatyi kyonso. Ku ngalwilo, bamo badi shabo basangela myanda miyampe. Ino kepejije kusangela kwabo kwafumba. Bano bapania ba pa bula bapebwa mwaba ungi.

Mu 1991, bakaka babidi bapania ba pa bula bapebwa uno mwaba. Kadi monka, kekwadipo kintu kilombola amba kudi kwendelela kuluji kwa ku mushipiditu. Myaka mityetye pa kupita’po, bano bapania batumwa ku myaba mikwabo yadi imweka bu ibwanya kulupula bipa bivule. Enka namino, uno mwaba washala bu kiputu mu bula bwa kitatyi kampanda.

Kulonga Bukomo Dipya Kubalupula Bipa Bilumbuluke

Mu Kweji 9, 1998, kwalongelwe bukomo bwa kukimba bifuko bikokeja kulupula bipa mu mwaba mukatampe wadi kewapelwe basapudi mu Taiwane. I muswelo’ka walongelwe buno bukomo? Bapania kubwipi kwa 40 ba kitatyi kityetye bapelwe myaba idi na bantu bavule ino kupānwa’yo ku basapudi mpika.

Bibundi bibidi bilondakane bidi mu Miao-li County bibadilwa mu ino myaba yatongelwe kusapula’mo busapudi bwa kampanye. Bakaka baná bankungakaji banenwe kwingila myeji isatu mu uno mwaba mwanda wa kwiutompa. Abo bakifikafika’tu, batuma lapolo usangaja wa bantu basepelele musapu bobatene’mo. Mu myeji isatu yobaingile bu bapania mu uno mwaba, baendeje bifundwa bya Bible bivule ku mobo a bantu. Bashimika ne kisumpi kya kifundwa kya kitabo na bukwashi bwa mukulumpe umo wa mu kipwilo kya kubwipi.

Mu bano bakaka, basatu balombwele patōka amba basaka kwendeleja mwingilo wa kusekwila “nkunwa” myana yadi yenda itama biyampe. O mwanda babidi mu bukata bwabo batongelwe lonso bu bapania ba pa bula, ino kaka wa busatu ukyendelela na kwingila’mo bu pania walonso. Mukulumpe wa mu kipwilo kya kubwipi nandi wavilukila’mo mwanda wa kwibakwasha’ko. Ku kishinte kya bantu bonso kyanenwe, kibajinji mu uno mwaba, kwatenwe bantu 60 matuntulu ne musubu. Pano kipwilo kya kubwipi kikwashanga kino kisumpi kyenda kitama kimone kupwila nyeke mu dya Yenga, kutentekela’po ne kwifunda kwa kitabo kwa kyaba ne kyaba. Panopano ponka kipwilo kisa padi kushimikwa mu uno mwaba.

Kūminina Kubaleta Madyese mu Bipindi Bikwabo bya Taiwane

Mu bifuko bikwabo namo bantu i betabe muswelo umo onka. Mu I-lan County, mu bwikike bwa kungala ne kutunduka kwa kisanga, Kifundwa kya Kitabo kya pa Kipwilo kyashimikilwe mafuku adi bapania ba pa bula ba kitatyi kityetye bengila mu uno mwaba.

Pania umo wa pa bula wa kitatyi kityetye wadi wenda usapula ku njibo ne njibo mu kyolwa, watana nsongwalume, wamulombola kapapye ka lwito kalembwe’po kupwila konso kwa pa kipwilo. Nandi wamwipangwididila’mba: “Lelo mbwanya kwiya kutanwa ku kupwila kesha ku kyolwa? Shi kengiya, i bika byomfwaninwe kuvwala?” Uno pania wabezemukile’tu kaendeja yenga ne yenga bifundwa 8 bya Bible na bantu basangela musapu. Befundi bamo ba Bible i bakwate kala mpangiko ya kwikala basapudi ba myanda miyampe bakubulwa kubatyijibwa, na kitungo kya kubatyijibwa.

Muntu mukwabo enka mu kino kibundi wadi mwana wa kipwilo kampanda mu bula bwa myaka, ino kutupu kutana muntu wa kumufundija Bible. Kitatyi kyaaivwene mpangiko itala pa kwifunda Bible, waitabije’yo bukidi bonka. Bamukankamika kuteakanya kifundwa kyandi kumeso kwa kitatyi. Penepo pania wa pa bula wa kitatyi kityetye pa kwiya kwendeja kifundwa, watana mwana-mukaji’wa mupwe kala “devwala” yandi, musoneke ne bipangujo bya kunshi kwa kifundwa mu kaye kaapotele. Kupwa wasoneka ne malondololo a kipangujo ne kipangujo. Kadi mupwe kala kutentwila mu kaye kandi bisonekwa byonso bitelelwe mu kifundwa. Kaka pa kwiya amba befunde kifundwa kibajinji, watana uno mwana-mukaji ke muteakanye kala bifundwa bisatu bibajinji!

Bino i bintu biifwene na byalongekele mu kibundi kya Dongshih pa bukata bwa Taiwane. Bapania ba pa bula ba kitatyi kityetye baponeje mikanda 2 000 ne musubu mu myeji isatu yobaingile’mo. Mu kweji wa busatu, badi kebendeja kala bifundwa 16 bya Bible ku mobo a bantu. Ino kibundi pa kusadika na kintenshi kyatetukile pa bukata bwa Taiwane mu mafuku 21 Kweji 9, 1999, bantu bamobamo basangedile musapu baendelele nyeke ku mushipiditu, nansha byokyadi kibalomba kwenda lwendo lwa nsaa imo pa kukapwila ku Njibo ya Bulopwe ya pabwipi. I bine, kūminina i kintu kisakibwa pa kwangula mwangulo muyampe, ikale nkunwa ya ku ngitu nansha ke ya ku mushipiditu mine.

[Kalata pa paje 8]

(Pa kuyukila’ko bikwabo, tala dibuku)

SHINE

Mukola wa mu Taiwane

TAIWANE

[Kutambile Kifwatulo]