Le Kwikala wa Dikōkeji Kudi na Kamweno?
“BINE mwelanga lupeto luvule mu kwiundapija,” mo mwānenene Karl,a mwimaniji wa kitango kya babikija lupeto. “Shi mwiye ku kompani yami, nabya mukakūla maero 15 [lupeto lwa Bulaya] ku kweji, luno i lupeto luvule.”
“Eyo byabyo i bya bine,” mo mulondolwela Jens. “Inoko mbikijanga lupeto lwa bundapi ku kitango kimo kyonka pano ke myaka mingi. Mafuku kunyuma kino kitango kyadi kitukwasha bya binebine, o mwanda nsakile kulama dikōkeji dyami ku akyo.”
“Dikōkeji i ngikadilo milumbuluke,” ye Karl utentulula. “Inoko’ko kwikala wa dikōkeji ko kukujimijija lupeto!”
Karl wānene bya bine. Pavule kwikala wa dikōkeji, nansha wa binebine, ku muntu mukwabo kukokeja kujimija lupeto.b Ne kadi kulomba kitatyi, bukomo, ne kwiumvwanika mu milangwe. Le dikōkeji didi na kamweno?
Ditembaulwa Pi na Pi Ino Kulondwa Mpika
Mu bwipangudi bwalongelwe mu Alemanye na Masomo a Bukimbi bwa Milangwe a Allensbach, bantu 96 mu balondolwele badi bamwene kwikala wa binebine bu ngikadilo yanwa. Bwipangudi bwa bubidi bwalongele Allensbach mu bantu ba myaka 18 kutūla ku 24, bwalombwele amba bantu 2 mu 3 balondolwele badi bamona kwikala wa binebine bu ngikadilo “mitumbe,” ko kunena’mba imonwa biyampe na bantu.
Eyo, dikōkeji nansha bu wa binebine i ngikadilo itendelwa pi na pi, ino kwikala wa dikōkeji, nansha kwikala wa binebine i kukomo. Kimfwa mu matanda mavule a Bulaya, balume ne bakaji besonge nansha ba mu kisaka kebavudilepo kwikala ba dikōkeji ku abo bene na bene. Balunda bavule nabo i bampikwa dikōkeji ku abo bene na bene. Ne kadi dikōkeji dyadi pa kala pa bukata bwa mwinē mingilo ne muntu wa kaji nansha pa bukata bwa nsunga ne bampotyi ke dijimine dyalelo. Mwanda waka?
Kyaba kimo i būmi bwa kuvudilwa mingilo bubudija bantu kitatyi ne bukomo mu malango bupa bantu kwiumvwanika kulombwa pa kwikala na dikōkeji. Bantu batyumukwanga mu bidyoma ne kupungila pa byobamona monekela bipwano bya bantu, o mwanda bekaka pa kwikala ba binebine ku muntu mukwabo. Bakwabo nabo basangela būmi bwa kulonga bintu dya ne kesha kwapwa mwanda kebulombepo kwikala na dikōkeji.
Eyo, nansha bikale namani, dikōkeji i mwikadilo utendelwa divule ino kulondwa’o mpika. Pano kipangujo i kino: Le kwikala wa dikōkeji kudi na kamweno? Shi kudi nako, le tukekala na dikōkeji kudi ani, ne mu mashinda’ka? Lelo i byabuyabuya’ka bidi mu kwikala wa dikōkeji?
[Kunshi kwa dyani]
a Majina amo i mashintwe mu kino kishinte ne mu kilonda’ko.
b “Dikōkeji” ne “bu wabinebine” i bishima kebivudilepo kwendela pamo, ino mu bino bishinte, tukebingidija byonso bibidi.
[Bushintuludi pa paje 3]
Dikōkeji i mwikadilo utendelwa divule ino kulondwa’o mpika