Amakedona—Lelo I Mfulo ya Byamwiko?

AMAKEDONA! Lelo kino kishima kikulangijanga konakanibwa kwa bintu byonso kikonge nansha kutema kwa ntanda yonso? Mu bipindi bivule bya ntanda, kudi bishima bimobimo bya mu Bible bitelwatelwa mu kanwa difuku ne difuku, kupityidila “Amakedona.” Kino kishima kingidijibwanga ntanda yonso mwanda wa kufunkila pa ngikadilo mityani ikafikila bantu. Bintu bya kwipwija mukose bilupulwa ku binanda byelanga mu milangwe ya bantu bifwatulo bilenga moyo bya mukekadila “Amakedona.” Bantu badi na kavudi ne na milangwe milube pa kino kishima. Nansha byokudi milangwe mivulevule pa bitala nshintulwilo yakyo, ino mivule keikwatañenepo na bifundija Bible—nsulo mine ya kino kishima—pangala pa Amakedona.

Bible byoikwatañanya Amakedona na ‘mfulo ya ntanda,’ mwene i kipite buya wivwanije senene buluji bwinebwine bwa kino kishima? (Mateo 24:3) Ne kadi, le kumwenepo’mba i kya ñeni kuvundamukila ku nsulo minemine ya bubinebine, ko kunena amba ku Kinenwa kya Leza, pa kutana malondololo a kuyuka Amakedona mwine i kika ne byoikakuletela abe ne kisaka kyenu?

Bubandaudi bwa uno muswelo bukakulombola’mba Amakedona ikaleta ngalwilo ya nsangaji ku bantu baswele kwikala na būmi ne kutwela mu ntanda impya ya boloke, ino keikekalapo mfulo ya byamwiko. Ukamwena’mo shi wivwanije biyampe buno bubinebine bwa mu Bisonekwa bupāna būmi kitatyi kyosa kubandaula mwisambo ulombola nshintulwilo ya binebine ya Amakedona mu kishinte kilonda’ko.

[Kapango/Kifwatulo pa paje 3]

MOLANGILA, AMAKEDONA I KIKA?

• Bonakani bwa bantu kipukwi na mabombe

• Kinzengele kyona byonso bitujokolokele

• Kwitema kwa imbuo ya mūlu na ntanda

• Bonakani Leza bwakonakanya babi