Mpeta Umo Muludiki Watonge Butongi Bubi
UNO nsongwalume mpeta muludiki wadi na mutyima muyampe, ulamine bijila, kadi muyuke myanda ya Leza. Wafika kudi Yesu, wapone ku maulu andi, kamwipangula’mba: “Abe Mufundiji muyampe, lelo kika kiyampe kyo nguba nkamwenemo muya wa kulādila nyeke na nyeke?”
Yesu walondolola mukelenge’wa amba, pa kumona būmi ufwaninwe kulama bijila bya Leza. Waipangula Yesu amutōkejeje’byo, nandi amba: “Kokēpaya muntu. Kokēnda makoji. Kokēba. Kokabepela mukwenu. Kadi wikale kulemeka shobe, ne inobe, kadi kasanswe mukwenu mo wisanshilwe abe mwine.” Ino i mbila mikatampe yādi mu Mukanda wa Bijila wa Mosesa. Kupwa mukelenge’wa wānena’mba: “Byabyo byonso nebilamine kala, ne ku bwanuke bwami. Le byo mbudilwe kadi i kika?”—Mateo 19:16-20.
Yesu “wamuloelelwa kamunena’mba: Nanshi i kimo kyonka kyōbudilwe. Enda ukapote byonso bintu byobe, wenda upana ku balanda, nankyo ukamona ne bupeta mūlu, ebiya waluke . . . kōunonda.”—Mako 10:17-21.
Ponka’po nsongwalume muludiki’wa wakolelwa mwakukwatyila butyibi. Le wadi wa kulonga’byo namani? Lelo wadi ukokeja kwitabija kupāna bupeta bwandi ne kwikala mulondi wa Yesu’ni nansha wadi wa kulamata enka ku bintu byandi? Lelo wadi wa kukimba bupeta bwa pano panshi’ni, nansha wadi wa kukimba bupeta bwa mūlu? Bine, bwādi butongi bukomo. I bimweke patōka’mba wādi usenswe bintu bya ku mushipiditu, mwanda wādi ulamine Bijila ne wādi wipangula ayuke bikwabo byakokeja kulonga mwanda wa kwitabijibwa na Leza. Le wākwete’po butyibi’ka? Ponka’pa “wafunduka kaenda ku mutyima fututu, mwanda wadi mpeta wa bya ntanda ne miseke.”—Mako 10:22.
Butyibi bwa uno nsongwalume muludiki kebwādipo buyampe. Shi wāikele mulondi wa kikōkeji wa Yesu, longa wādi wa kutambula kyokya kyaādi ukimba—ke būmi bwa nyeke kadi. Ketuyukilepo byāfikīle yewa nsongwalume. Inoko, tuyukile amba, kubwipi kwa myaka makumi aná pa kupita’po, bibumbo bya basola Bene Loma byāile kusala Yelusalema ne kipindi kikata kya Yudea. Bayuda bavule bājimije bupeta ne būmi bwabo bwine kumo.
Kino kyālongele uno nsongwalume muludiki i kishile na kyālongele mutumibwa Petelo ne bana ba bwanga bakwabo, mwanda abo bātongele butongi buyampe. Abo ‘bāshile byonso’ ke balonda Yesu. Bine, bāmwenine bininge mu buno butongi! Yesu wēbalombwele amba bakatambula bivule misunsa mingi kupita ne byobāshile kunyuma bine. Kutentekela’po, badi ba kukapyana būmi bwa kulādila nyeke na nyeke. Buno i butongi bokebādipo na kya kwialakenya mwenda mafuku.—Mateo 19:27-29.
[Kifwatulo pa paje 4]
Yehova wivwaninanga bafudilwe lusa pamo’nka bwa inamwana kudi wandi mwana