Buswe bwa Leza I Bumweke Padi Tō mu Buswe bwa Inamwana

“Lelo mwana-mukaji i namani avulaminwe wandi mwana wāmusha amba: Nkikasokolapo lusa pa kipa kya nda yami, a? eyo, bene bano’ba padi bakavulaminwa, nanshi ami nkikavulaminwapo abe, ehe.”—ISAYA 49:15.

LANGA’PO mwana wa lukeke obanyunya kudi inandi umwamusha. Kino i kilongwa kya kanye ne buswe. Inabana umo witwa bu Pam unena’mba: “Ponaselele wami mwana musunsa umbajinji, naivwene amba bine musenswe kadi mfwaninwe kumutamija.”

Padi ke kya kutulumukapo, inoko bukimbi bulombola’mba buswe bwa lolo bukwashanga bininge mu kutama kwa mwana. Mukanda umo walembelwe na Kitango Kitala Bukomo bwa Ngitu Ntanda Yonso mu Myanda ya Bukomo bwa Ñeni unena’mba: “Bifundwa bilombola’mba bana bobanyema nansha bobasansanya na ba inabo babulwanga nsangaji ne kwikala na njia, bitatyi bikwabo bekalanga na moyomoyo.” Uno mukanda umo onka utela bufundi bumo bulombola amba bana bobasenswe ne kutebwa mutyima tamba pa bunkasampe bekalanga na lūku lukatampe kutabuka boba bobasūdile.

Alan Schore, polofesele wa bundapi bwa kujina kwa ñeni wa ku Masomo a Kiñanga a UCLA mu États-Unis, unena’mba: “Kipwano kibajinji kipwananga mwana na inandi, kyo kikalanga bu kyalwilo kikamukwasha mwenda mafuku amone muswelo wa kupwana na bantu bakwabo.”

Ino i kya bulanda, mwanda njia, misongo nansha mitabakano mikwabo ikokeja kufikija inamwana aleke kukambakena wandi mwana nansha ‘kuvulaminwa wandi mwana wāmusha.’ (Isaya 49:15) Inoko i bikomo kutana balonga namino. Na bubine, ba inabana i bapangwe na kitetyima kya kuswa babo bana. Bakimbi i basokole amba pa kubutula, bambutwile bekalanga na lwima luvule lwitwa bu ocytocine, lufinyanga mula wa lubutulo ne kuyuja mabele mu kyadi kya mbutwile. Bimweka’mba luno lwima lumo lonka lwikalanga na bana-bakaji, ludi ne mu bana-balume bene, lo lukunkanga inamwana ekale kuswa ne kunyenya mwana.

Lelo Buswe Bwāshilwile Namani?

Boba bafundijanga’mba bintu byatambile ku kwialamuna banenanga’mba buswe bwakubulwa kwisakila pamo na bobwa bwikalanga na inamuntu ne mwana bwetambile’ko abo bwine mu kitulumukila mwanda wa kulama mizo. Kimfwa, julunale umo wa ku Entelenete (Mothering Magazine) unena’mba: “Kipindi kibajinji kya bongolo botupyene ku bilandala kialamwine ne pa mfulo i popa pene patambanga malango. Kino kipindi kya bongolo kyo kikwashanga ba inabana ne babo bana bekale mu kipwano.”

Bine, bukimbi i busokole amba kino kité kya malango kikwashanga bikatampe mu muswelo otulanga. Inoko, lelo ulanga amba i byendele’mo kunena’mba buswe buswele mbutwile wandi mwana i bushiluke’tu ku kutama kwa mu kitulumukila kwa bongolo bwa banyema?

Tubandaule mulangwe mukwabo. Bible unena’mba bantu bapangilwe mu bu-kyelekejo kya Leza, ko kunena’mba babwanya kulombola ngikadila ya Leza. (Ngalwilo 1:27) Ngikadilo mipite bukata ya Leza i buswe. Mutumibwa Yoano wāsonekele amba: “Yewa kaswele nankyo kayūkilepo Leza, mhm.” Mwanda waka? “Mwanda Leza i buswe.” (1 Yoano 4:8, Bisonekwa Bitokele) Yuka’mba uno vese kanenenepo amba Leza udi na buswe. Ino unena’mba Leza i buswe. Leza ye Nsulo mine ya buswe.

Bible ushintulula mwine mwikadile buswe namino: “Buswe budi na kutūkija mutyima ne kanye. Buswe kebudipo na mukao, kebwianyangapo, kebwitatulangapo, kebuloñangapo byampikwa kwendela’mo, kebukimbangapo tumweno twa abo bwine, kebukwatwangapo nsungu. Kebuvulukangapo kisansa. Kebusepelelangapo pangala pa bukondame, ino abo busepelelanga pangala pa bubinebine. Butyumwinanga byonso mu manwi, bwitabijanga byonso, bukulupilanga byonso, būmininanga byonso. Buswe kebukankalwangapo.” (1 Kodinda 13:4-8) Lelo i kyendele’mo kwitabija’mba ino ngikadilo milumbuluke uno muswelo yaikele’ko mu kitulumukila?

Lelo Ubeivwana Namani?

Po wapwa kutanga mushintulwidilwe buswe mu musango udi kūlu’ku, lelo mutyima obe wabilanga kwikala na muntu ukuswele uno muswelo? I kyendele’mo kwabila kino. Mwanda waka? Mwanda “twi ba muzo wa Leza.” (Bilongwa 17:29, BB) Twi bapangwe na mutyima wa kuswibwa ne kuswa bakwabo uno muswelo. Kadi tukulupilei amba Leza wituswele mpata. (Yoano 3:16; 1 Petelo 5:6, 7) Kisonekwa kitelelwe ku ñanjilo ya kino kishinte kinena’mba buswe bwa Leza i bukata kadi bwendelelanga kutabuka bwikalanga na inamwana ku wandi mwana.

Padi ukeipangula’mba: ‘Shi Leza udi na tunangu, bukomo ne buswe, mwanda waka katalulapo masusu? Mwanda waka ulekanga bana bafwa, kasusu kendelela, ne ntanda konakanibwa mwanda wa buludiki bubi ne makomwa-meso?’ Bino i bipangujo biyampe bisakilwa malondololo mendele’mo.

Nansha shi bantu balakana Leza banene bika, ukokeja kusokola bilondololwa biyampe ku bino bipangujo. Bantu midiyo tununu ne tununu ba mu matanda meshileshile batananga malondololo na kwifunda Bible na Batumoni ba Yehova. Balembi ba dino dipepala bakwita nobe wifunde nabo. Poenda ubweja’ko buyuki bobe bwa kuyuka Leza kupityila ku kifundwa kya Kinenwa kyandi ne bintu byapangile, ukayuka’mba kadipo kulampe netu, ne tubwanya kumuyuka senene. Inoko, ukakulupila na mutyima umo amba Leza “kadipo ne kulampe kwine na bātwe bonso, mhm.”—Bilongwa 17:27.

[Bushintuludi pa paje 8]

Buswe bwa Leza bwendelelanga kutabuka bwa inamwana ku wandi mwana