Fundija Bobe Bana

Le Kashā Kodi Mwimvwane ne Mukao? Bamwanabo na Yosefa Bāimvwene’o

TUYUKEI bidi kwikala na mukao i bika. Lelo kebikukomene kuswa muntu mwanda wa kwanya kobamwanya’mba i muyampe, mupopoke, kadi wa dyangi?a—Eyo, bikokejika shi ubaimvwanina muntu’wa mukao.

Mukao ukokeja kwikala’ko mu kisaka shi bambutwile abasu mpata mwana umo kupita mukwabo. Bible witusapwila mukao wāmwekele mu kisaka kimo, wāleta’mo ne kavutakanya. Tutalei kwāfudile kino kikoleja ne kuboila ñeni ku myanda yāmwekele.

Yosefa wādi mwanā Yakoba wa 11, kadi bamwanabo ba mu dīfu dikwabo bāmwivwanine mukao. Le uyukile pādi i pa mwanda wa bika?—I mwanda shabo Yakoba wāsenswe bininge Yosefa. Tala, Yakoba wālongēle Yosefa mutwelo muyampe wa matumbamatumba. Kutabukidila, Yakoba wāsenswe Yosefa “mwanda aye wadi mwana wa umbununu bwandi,” kadi wādi mwana umbajinji kudi Letyela, mukajandi muswe.

Bible unena’mba, ‘bāna babo pa kumona shabo byasanswa Yosefa kupita bana babo bonso, ponka’po bāmushikwa.’ Difuku dimo Yosefa wāsapwila ba kwabo bonso byalotele amba bonso badi kebevukwila kwadi, ne shandi mwine. Bible ulombola’mba “bamwanabo bamukwatyilwa nsungu,” enka ne shandi mwine wāfunina Yosefa pa kwibasapwila kilotwa’kya.—Ngalwilo 37:1-11.

Kitatyi pa kupita’po, papo Yosefa kadi na myaka 17, batutu wandi bāenda kukadisha mikōko ne bambuji kulampe na kisaka kyabo. Yakoba wātuma Yosefa kukamona banababo shi babukile biyampe. Lelo uyukile byādi bisaka banababo bamo kulonga Yosefa pobāmumwene wiya?—Bādi basaka kumwipaya. Inoko babidi kete, ba Lubeni ne Yuda abo kebādipo basaka nabya.

Bansunga bamo pa kupita benda ku Edipito, Yuda kala’mba: “Twayai tumupoteje.” Penepo bāmupoteja. Kupwa bātapa mbuji ne kutubika mutwelo wandi mu mashi. Abo pa kukalombola shabo mutwelo’wa, shabo wādila’mba: ‘Yosefa i mudibwe na nyema umbi!’—Ngalwilo 37:12-36.

Mu mafuku mu mafuku, Yosefa wāswibwa na Felo, mulopwe wa Edipito. Kaswilo kene i mwanda Leza wāmupele bukomo bwa kushintulula bilotwa bibidi bya Felo. Kibajinji kyādi i kya bañombe banune basamba-babidi ebiya ne bakwabo basamba-babidi banyane. Kilotwa kya bubidi i kya mivungu isamba-ibidi, minēna mivumbe ne mikwabo isamba-ibidi mifumbe. Yosefa wānena amba nshintulwilo ya bilotwa byonso bibidi i ino amba, kusa kwikala myaka isamba-ibidi ya bidibwa bingi ne mikwabo isamba-ibidi ya nzala. Felo wāsoñanya Yosefa emanine mwingilo wa kungwija bidibwa umbula bwa myaka ya bidibwa mwanda wa kutēnga yoya ya nzala.

Nzala pa kufika, kisaka kya ba Yosefa, kyādi kikele kulampe kyabulwa bidibwa. Yakoba wātuma batutu wa Yosefa dikumi kwenda kukapota bidibwa ku Edipito. Bātana Yosefa kwine’kwa, ino kebāmuyukilepo. Yosefa wēbatompa pampikwa kwiyukanya kobadi, wāmona amba kebesāse ku bibi byobamulongele. Ko kwiyukanya Yosefa wēyukanya kobadi. Bine bēpambile bīpa abo bonso!—Ngalwilo, shapita 40 kutūla ku 45.

Lelo ino mānga ya mu Bible ibakufundija bika pangala pa mukao?—Mukao ubwanya kuleta kavutakanya kakatampe, shi kutadije utonona’nka ne muntu asanshije mwanabo! Leka bidi tutange Bilongwa 5:17, 18 ne Bilongwa 7:54-59, tutale i bika byālongele bantu ku bana ba bwanga ba Yesu pa mwanda wa mukao.—Pa kupwa kutanga, tutalei mwanda waka tufwaninwe kudyumuka shi mukao ubetukwata?—

Yosefa wāfikije myaka 110. Wābutwile bana, nabo bamubutwila bankana, kadi wāikala ne na tunkanununa. Tukulupile amba Yosefa ye uno wādi wibafundija kuswa bakwabo ne kuleka mukao.—Ngalwilo 50:22, 23, 26.

[Kunshi kwa dyani]

[Kapango pa paje 15]

Bipangujo:

○Lelo kwikala na mukao i bika?

○Le mukao wāfikije banababo na Yosefa ku kulonga bika?

○Mwanda waka Yosefa wāfwidile banababo lusa?

○Ino mānga le i betufundija bika?