Bululame Bobe Busangajanga Mutyima wa Yehova
“Wami mwana, wikale wañeni ne kusangaja mutyima wami, amba nondolole yewa umpunika.”—NK. 27:11.
1, 2. (a) I bulwi’ka bwa Satana bulombwelwe mu mukanda wa Yoba? (b) I bika bilombola amba Satana ukyendelela kupunika Yehova?
YEHOVA wālekele Satana atompe bululame bwa Yoba, mwingidi wandi wa kikōkeji. O mwanda Yoba wājimije bimunanwa ne bana bandi, kadi wābela. Ino kitatyi kyaālakene Satana bululame bwa Yoba, kādipo’tu’nka na Yoba mu ñeni kete. Ke-muntu wānene amba: “Kikoba pa kikoba, eyo byonso bidi na muntu ukapana’byo pa būmi bwandi.” Kuno kwalakana kekwādipo kutala enka Yoba, ino kwāendelele kupwa kwa lufu lwa Yoba.—Yoba 2:4.
2 Kintu kya myaka 600 kupwa kwa matompo a Yoba, Solomone wāsonekele na bukomo bwa mushipiditu amba: “Wami mwana, wikale wañeni ne kusangaja mutyima wami, amba nondolole yewa umpunika.” (Nk. 27:11) I kimweke amba, Satana wādi ukilwa Yehova. Kadi mu kimonwa kyāpelwe mutumibwa Yoano, Satana wādi ukisambila bengidi ba Leza aye papo ke mupangwe mūlu kinondanonda na kushimikwa kwa Bulopwe bwa 1914. Bine enka ne didi kūlu dino dyo ketudi batakamine mu mafuku a mfulo ya ngikadilo imbi, Satana ukilwa na bululame bwa bengidi ba Leza!—Kus. 12:10.
3. Le i ñeni’ka yotuboila ku mukanda wa Yoba?
3 Shi ke pano, imvwana ñeni isatu yotuboila ku mukanda wa Yoba. Imbajinji, matompo a Yoba asokolanga walwana na bantu mwinemwine ne nsulo ya kulondwalondwa kwa bantu ba Leza. Uno walwana i Satana Dyabola. Ya bubidi, nansha shi tutanwe na matompo a muswelo’ka, ino wivwane tupwane bininge na Leza tukabwanya kulama bululame bwetu. Ya busatu, shi matompo abamweka ne shi tubatompibwa muswelo’ka, Leza uketukwasha mwaākwashishe Yoba. Dyalelo, Yehova witukwashanga kupityila ku Kinenwa kyandi, bulongolodi bwandi, ne mushipiditu sandu wandi.
Vuluka Nyeke Walwana Mwinemwine
4. Lelo i ani mwine ulambikwa kubipa kwa ngikadilo ya ntanda?
4 Bantu bavule kebakulupilepo amba Satana udi’ko. O mwanda kebajingululangapo mwine ubipija ngikadila ya ntanda—ke Satana Dyabola kadi. Eyo, kiselwa kya malwa aponena muzo wa muntu kidi pa mapuji a muntu mwine. Bambutwile betu babajinji ba Adama ne Eva, bātongele kupaluka Mupangi wabo. Tamba penepa, nkongo yonso yālondele’po iloñanga bya kubulwa ñeni. Nansha nabya, Dyabola ye wāongwele Eva atombokele Leza. Kadi i yenka aye utūdile’ko mu bantu bakubulwa kubwaninina, bafwa, ngikadilo ya ntanda yaludika. Satana byadi “Leza wa panopantanda,” bantu bandi nabo balombolanga tuto twandi tumo tonka—mitatulo, lupotopoto, mukao, lwiso, bongojani, ne butomboki. (2 Kod. 4:4; 1 Tem. 2:14; 3:6; tanga Yakoba 3:14, 15.) Tuno tuto ye tubutwile ñuma ya politike ne ya bipwilo, mushikwa, bukobakane ne kavutakanya, bine biletēle bantu musala.
5. Le tukalonga bika na buyuki bwa kamweno botudi nabo?
5 Bine, batwe bengidi ba Yehova tudi na buyuki bwa kamweno! I amo, tuyukile mwine ulambikwa koneka kwa ngikadilo ya ntanda. Penepa, le tudi na mutyima wa kusapwila bantu mu mwingilo wa budimi bayuke kalenga-byanzwe? Mwene tusangele kwiela ku mutamba wa Yehova Leza wa bine ne kushintulwila bakwetu muswelo wakafundula Satana ne malwa a bantu?
6, 7. (a) Le i ani ulengejanga kupangwapangwa kwa batōtyi ba bine? (b) I muswelo’ka otukeula kimfwa kya Edihu?
6 Satana ye kalenga-byanzwe wa tuvutakanya tuvudile mu ino ntanda ne wa kulondwalondwa kwa bantu ba Leza. Usumininwe’nka kwitutompa. Yesu Kidishitu wālombwele mutumibwa Petelo amba: “Abe Shimona! Abe Shimona! talapo bidi Satana wimusakidila emupepe pamo bwa ñano.” (Luka 22:31) Mo monka ne yense ulonda mu mayo a Yesu ukatanwa na matompo meshileshile. Petelo wādingakenye Dyabola na “ntambo ubuluma, ukimba wakubokota.” Kadi Polo nandi amba: “Bonso batele mutyima ku bwine-Leza kupangwapangwa ko kwabo.”—1 Pet. 5:8; 2 Tem. 3:12.
7 Le tukalombola namani amba tuvulukile walwana mwinemwine kitatyi kiponenwa banabetu na binkumbulu? Pa kyaba kya kunyema mwanetu, tukalonga bwa Edihu wēsambile na Yoba bu mulunda wa bine. Tukelunga na mwanetu mwa kulwila pamo na Satana walwana netu. (Nk. 3:27; 1 Tes. 5:25) Nansha bikale namani, kitungo kyetu i kukwasha mwingidi netu alame bululame bwandi ne kusangaja mutyima wa Yehova.
8. Mwanda waka Satana kabwenyepo kukankaja Yoba kulēmeka Yehova?
8 Kituntwa kibajinji kya Yoba kyāmujimijije Satana i bimunanwa byandi. Banyema’ba, ko kādi kadīlo kandi. Wādi ulambula’bo pa kutōta Yehova. Yoba pa kupwa kupandula bana bandi, “wakēlela lubanga’tu bwē, kwela byakwela bisōkwe mwendele mbadilo ya abo bonsololo; mwanda Yoba walangile amba: Kepabulwepo padi bāna bami bana-balume abalonga bubi, ne kutuka Leza mu mityima yabo. Yoba wādi ulonga enka namino’u nyeke.” (Yoba 1:4, 5) Nanshi Yoba wādi na kibidiji kya kulambula banyema kudi Yehova. Pāshilwile matompo byādi ke bikomo. Mwanda Yoba kākidipo na “bintu” bya kulēmeka nabyo Yehova. (Nk. 3:9) Ino wādi ubwanya kulēmeka Yehova na milomo yandi, ne wāmulēmekele!
Tamija Kipwano Kyobe na Yehova
9. Lelo i kituntwa’ka kya mvubu mikatampe kyotudi nakyo?
9 Wikale mpeta nansha mulanda, mwanuke nansha mukulu, mukomo nansha ubela, ukokeja kutamija kipwano na Yehova. Nansha shi tubatanwa na matompo’ka, kipwano kyetu na Leza kyo kiketukwasha tulame bululame bwetu ne kusangaja mutyima wa Yehova. Enka ne bantu badi na buyuki butyetye bwa bubinebine bakankamene ne kulama bululame bwabo.
10, 11. (a) Le i bika byalongele kaka umo patompelwe bululame bwandi? (b) Uno kaka walondolwele Satana namani?
10 Tala kimfwa kya kaka Valentina Garnovskaya, Kamoni umo wa mu Rusi wālamine bululame mu matompo makomo pamo bwa Yoba. Mu 1945, paadi na myaka 20, tutu umo waile kumusapwila. Tutu’wa wajokele misunsa ibidi kwisamba nandi myanda ya Bible, kupwa Valentina kamumwenepo dikwabo. Nansha nabya, Valentina washilwile kusapwila bakwabo. Penepa bamukwata ne kumukuta myaka mwanda mu komponi. Mu 1953, wakutululwa ne kushilula monka mwingilo wandi wa busapudi. Bamukwata monka ne kumukuta—myaka dikumi mituntulu. Pa kupwa kulāla myaka kampanda mu komponi bamutwala mu komponi kakwabo. Mwine’mwa watana’mo bakaka badi na Bible. Difuku dimo kaka umo walombola Valentina Bible’wa. Kino kyadi kitatyi kya nsangaji kashā! Langa’po, Valentina wadi kamwene Bible mukwabo, poso’nka Bible waile na tutu wamusapwidile mu 1945!
11 Mu 1967, Valentina wakutululwa ne kulombola kwipāna kwandi kudi Yehova na kubatyijibwa mu mema. Wāingidije bwanapabo bwandi na kusapula na bupyasakane kufika ne mu 1969. Mu mwine mwaka’o, wakutwa dikwabo ne kutungilwa buloko bwa myaka isatu. Kaka Valentina waendelela na kusapula. Kumeso kwa aye kufwa mu 2001, wadi ke mukwashe bantu 44 bayuke bubinebine. Myaka yonso yalēle mu makomponi ne buloko i myaka 21. Wadi na mutyima wa kupāna bintu byandi byonso, enka ne bwanapabo bwandi mwanda wa kulama bululame bwandi. Ku mfulo kwa būmi bwandi kaka Valentina wanene amba: “Nkyadipo na pami pontelelwa. Bituntwa byami byadi enka sakoshi umo kete, ino nadi ñingidila Yehova na nsangaji ne kuloelelwa.” Bine, kaka Valentina walondolwele Satana, ufwatakanya amba bantu kebakakōkelapo Leza shi batūlwe pa matompo! (Yoba 1:9-11) Tukulupile amba wasangeje mutyima wa Yehova, kadi Yehova nandi uloelelwe kukasangula Valentina ne bengidi bakwabo ba kikōkeji.—Yoba 14:15.
12. Lelo buswe bwitukwashanga namani mu bulunda bwetu na Yehova?
12 Bulunda bwetu na Yehova bwimanine pa buswe botumuswele. Twabilanga ngikadilo ya Leza ne kulonga byonso byotubwanya mwanda wa kwiendeja mungya mpango yandi. Kwishila na bilanga Dyabola, tuswele Yehova na mutyima umo ke pa mwandapo wa kintu kampanda. Buno buswe bwa binebine bo bwitutonona tulame bululame mu matompo. Yehova nandi ulaile “kulaminina dishinda dya bapandulwemo bandi.”—Nk. 2:8; Mit. 97:10.
13. I muswelo’ka umona Yehova byobya byotumulongela?
13 Buswe bwitutononanga tulēmeke dijina Yehova, nansha shi twimona amba ketubwanyapo kulonga bivule. Umwene byotulanga ne ketutyibilangapo mambo shi ketubwenyepo kulonga byotulanga. Kikimbwa ke’nkapo byotulonga ino i ne kyotulongela’byo. Yoba wāmwene malwa ne kususuka bininge, ino wālombwele boba bādi bamutopeka’mba uswele mashinda a Yehova. (Tanga Yoba 10:12; 28:28.) Mu shapita wa mfulo wa mukanda wa Yoba, Leza i mukalabele ba Edifaza, Biledade, ne Zofala mwanda kēbanenenepo bubinebine. Enka mwine’mwa kadi, Yehova i mwitabije Yoba na kumutela misunsa iná bu “mwingidi wami” ne kumunena alombelele bano banonga-bibi. (Yoba 42:7-9) Netu tulongei bintu bilengeja Yehova etwitabije.
Yehova Ukwashanga Bengidi Bandi ba Kikōkeji
14. Lelo Yehova wākweshe Yoba namani alemunune milangwe yandi?
14 Yoba wālamine bululame bwandi nansha byaādi wampikwa kubwaninina. Kyaba kimo, pa kūminwa bininge wāmwene bintu mu muswelo umbi. Kimfwa, wānene Yehova amba: “Nakwabija abe ne kungitabapo mpika; . . . Wampangapanga ku bukomokomo bwa kuboko kobe.” Kadi Yoba wēbingije bininge, wānena’mba: “Nkidipo mubi,” ne amba “kekudipo bingojila mu makasa ami.” (Yoba 10:7; 16:17; 30:20, 21) Inoko Yehova wākweshe Yoba na kanye na kumwipangula bipangujo bivule byāmukweshe aleke kuta mutyima padi aye mwine. Ino byākweshe Yoba amone senene bukatampe bwa Leza ne mutyepele muntu. Yoba wāitabija bulombodi ne bulemununi.—Tanga Yoba 40:8; 42:2, 6.
15, 16. Yehova ukwashanga bengidi bandi dyalelo mu mashinda’ka?
15 Kadi Yehova upanga bengidi bandi ba dyalelo bwendeji na kanye ne na kusumininwa. Pakwabo kadi tumwenanga’mo bininge. Kimfwa, Yesu Kidishitu wāletele kitapwa kya kikūlwa kyaādile kyalwilo kya kulekelwa kwa mambo. Pa kino kitapwa, tukokeja kupwana na Leza nansha byotudi bakubulwa kubwaninina. (Yak. 4:8; 1 Yoa. 2:1) Kadi potutanwa na matompo, tubwanya kumulomba bukwashi ne bukomo bwa mushipiditu sandu wandi. Ne kadi, tudi na Bible mutuntulu, shi tutanga’mo ne kulanguluka’po, tuketeakanya ku matompo a lwitabijo. Kwifunda kuketukwasha twivwanije mwanda utala bubikadi bwa ntanda yonso ne bululame bwetu.
16 Pakwabo kadi, tukamwena bikatampe pa kubadilwa mu bu bana na bana bwa ntanda yonso bupebwa bidibwa bya ku mushipiditu na Yehova kupityila ku “umpika wa binebine, udi na manwa.” (Mat. 24:45-47) Kupwila kupwilwa mu bipwilo bya Batumoni ba Yehova bisenselela ku 100000, kwitufundijanga ne kwitukomeja tukomene matompo a lwitabijo etutana. Kino i kimweke mu mwanda watene Sheila, Kamoni nkasampe wa mu Alemanye.
17. Leta kimfwa kilombola buyampe bwa kulondela madingi aletwa na bulongolodi bwa Yehova dyalelo.
17 Difuku dimo, mu kalasa mwadi Sheila kemwadipo mwadimu. Penepa bana ba masomo bakimba kubuka lubuko lwa Ouija. Ponka’po Sheila watamba mu kalasa, kadi byalupukile’ko byamufikije amone amba walongele biyampe. Bana ba masomo bamo pobabukile lubuko’lwa baimvwene lupusa lwa bademona ne kunyema mpala mpala. Le i bika byalengeje Sheila atambe’mo ponka na ponka? Sheila ushintulula amba: “Kumeso kwa makayo’a kulongeka, twaivwene ku kupwila ku Njibo ya Bulopwe byaka bidi mu lubuko lutelwa bu Ouija. O mwanda nayukile kya kulonga i kika. Nadi nkimba kusangaja Yehova na munenena Bible mu Nkindi 27:11.” Bine, i dyese mwanda Sheila watenwe ku kupwila’kwa ne kuteja’ko na katentekeji!
18. Le ubasumininwa kulonga bika?
18 Shi ke pano, tusumininwei kulamatyidila bulombodi botupebwa na bulongolodi bwa Leza. Tutambulanga bwendeji ne bukwashi botusakilwa ku kupwila, mu kutanga Bible, mu kwifunda mabuku esambila pa Bible, mu milombelo, ne mu kipwano kyetu na Bene Kidishitu batame. Yehova usaka tunekenye ne ukulupile amba tukekala nyeke na kikōkeji. Dino shadyo dyo dyese ne dyesepo dya kulēmeka dijina dya Yehova, kulama bululame, ne kusangaja mutyima wa Yehova!
Lelo Ukivulukile?
• Le Satana i kalenga-byanzwe wa ngikadila’ka ne matompo’ka?
• Lelo i kituntwa’ka kya mvubu mikatampe kyotudi nakyo?
• Bulunda bwetu na Yehova bwimanine paka?
• Yehova witukwashanga mu miswelo’ka imoimo dyalelo?
[Kifwatulo pa paje 15]
Tukokeja kukwasha batōtyi netu balame bululame bwabo