Bubela 6: Leza Witabije Kwingidija Byelekejo Ne Bankishi Mu Butōtyi
Le buno bubela butambile kwepi? “Bene Kidishitu babajinji kebādipo bengidija byelekejo mu butōtyi bwabo . . . Kwitabijibwa kwa byelekejo mu kipwilo mu myaka katwa ka 4 ne 5 kwābingijibwe na mulangwe wa amba bantu bakubulwa kuyuka Bwine Kidishitu bādi bakokeja kwifundila’bo kupityila ku bankishi kupita’ko ku busapudi ne mabuku.”—Cyclopedia of Biblical, Theological, and Ecclesiastical Literature, na McClintock ne Strong, Volime 4, paje 503 ne 504.
Lelo Bible unena’po bika? “Kokepungila nkishi kodi, nansha kyelekejo kya kintu ka, shi kika shi kika, kidi mūlu, nansha kidi panopanshi, nansha kidi mu mema munshi mwa ntanda. Kokafukatyila’bo, nansha kwibengidila kwine.” (Divilu 20:4, 5) Mutumibwa Yoano wāsonekēle Bene Kidishitu ba mu myaka katwa kabajinji amba: “Yō! twanwe twana twami, mwilamei bukalama ku bankishi.”—1 Yoano 5:21.
Lelo bine byelekejo i muswelo’tu wa kufwena ne kulēmeka yewa mwine obyelekeja, na munenena bipwilo? “Dibajinji,” mungya dibuku The Encyclopedia of Religion, “byelekejo bikokeja kwingidijibwa bu bya kumwena’ko pa [kufundija] ne bya kunengeja pantu; buno bo bwādi bubinga bo byāingidijibwe. Ino lubilo lonka byāikala ke bingidilwa bya kutōta. Uno mwanda i wa bine, nakampata na byelekejo byatumbile mu Orthodoxe wa Kutunduka.” Inoko, mupolofeto Isaya wāipangwile’tu biyampe amba: “Le mukadingakanya Leza pamo bwa ani? nansha kimfwa mukamwifwanya bwa kika le, a?”—Isaya 40:18.
Dingakanya na ano mavese a mu Bible: Isaya 44:13-19; Bilongwa 10:25, 26; 17:29; 2 Kodinda 5:7
NA BUBINE:
Leza ketabijepo kwingidija byelekejo ne bankishi
PELA BUBELA, LAMATA KU BUBINEBINE
Le tukanena bika pa kupwa kubandaula mu kīpi bubela bukifundijibwa mu bipwilo bivule? Ino “mfumo [Kingidiki, myʹthos] ya kufumika ne budyumuku budyumuku” keibwanyapo kwimana kumeso a bubinebine bupēla kadi busenga butanwa mu Bible.—2 Petelo 1:16.
Shi ke pano, kokekaka kudingakanya ne mutyima utūkije Kinenwa kya Leza—nsulo ya bubinebine—na byobya byofundijibwa. (Yoano 17:17) Nankyo ukemwena bubinebine bwa uno mulao unena’mba: “Ne kuyūka kwine mukayūkidijanga bya bu-binebine, nabyo bikemukūlanga ke mudi bāna-pabo.”—Yoano 8:32.
[Kifwatulo pa paje 9]
[Kutambile Kifwatulo pa paje 9]
Pictorial Archive (Near Eastern History) Est.