Le Bayampe Bonso Bendanga Mūlu?

YESU pa kupwa kudya bidibwa bya mfulo na bandi batumibwa mu bufuku bwa mfulo kumeso kwa kwipaibwa, wēbalaile mpalo ya kukekala mūlu. Wānene’mba: “Mu kipango kya Tata mudi bīkalo bivule bīne, kadi shi mwadi mutupu’byo, longa kadi nemusapwila. Naenda kwimulongolwela kuntu kwenu.” (Yoano 14:2) Mwanda waka Yesu akebalongolwele kīkalo mūlu? Le bakaloñanga’mo bika?

Yesu wādi ulangila pa mwingilo wa pa bula wa bandi bana ba bwanga. Mu kine kyolwa’kya, wānena’mba: “Bānwe mudi boba bakushikilwa nami mu kutompwa kwami konso. Nami eyo nkemutongela bulopwe monka mwāntongele Tata.” (Luka 22:28, 29) Leza wālaile Yesu amba ukekalanga Mulopwe ukapwija bisakibwa bikatampe bya bantu—buludiki bulumbuluke. Yesu ukapandija bantu ku masusu ne kusonsakanya boba bebamwesha malwa. Nansha babikalwa ba Yesu byo bakazambalala kufika ne “ku mfulo ya panopanshi,” lupona lwandi lukekalanga mūlu.—Mitōto 72:4, 8; Danyele 7:13, 14.

Inoko, Yesu kakabikalangapo bunka. O mwanda wālaile batumibwa bandi kīkalo kya mūlu. I babajinji kutongwa bu “bakukabikala panopantanda.”—Kusokwelwa 5:10.

Le i bantu banga ba kwenda mūlu? Monka mwikadilanga buludiki bo-bonso, balopwe ba Bulopwe bwa Leza budi mūlu i batyetye shi twibadingakanye na baludikwa. Yesu wāsapwidile boba bakaludika nabo amba: “Bānwe kaluombe katyetye! Kemukikwatwa moyo, mwanda Shenu i mutōkwe pa mutyima kwimupa bulopwe.” (Luka 12:32) Ku mfulo kano “kaluombe katyetye” kakekala na bantu 144000. (Kusokwelwa 14:1) Kino kibalwa i kityetye shi twikidingakanye na bantu midiyo bakamona būmi bwampikwa mfulo pa ntanda bu babikalwa ba kikōkeji ba Bulopwe.—Kusokwelwa 21:4.

Nanshi, ke bayampepo bonso bendanga mūlu. Mutumibwa Petelo wānene patōkelela bitala Davida, Mulopwe muyampe, amba: “Davida kakandilepo mūlu, ehe.” (Bilongwa 2:34) Yoano Mubatyiji wādi muntu muyampe. Kadi, Yesu wālombola amba kādipo wa kuzunzulwa bu mulopwe mūlu. Yesu amba: “Ku bonso bakubutulwa ku bāna-bakaji kekwamwekele, nansha umo, wakukila Yoana Mubatyiji buleme, mhm; nanshi nankyo kadi, wakwikalapo mutyetye umbulopwe bwa mūlu aye nankyo wamukile buleme.”—Mateo 11:11.

Le Nobe Ukatambula Mpalo Ikapebwa Bantu Bayampe?

Le muntu ufwaninwe kulonga bika pa kukatambula mpalo ya būmi bwa nyeke pano pa ntanda? Yesu amba: “Mwanda aye Leza byāsenswe bapanopantanda nenki, wapana Mwana wandi wa bunka’mba, bonso bakumwitabija nankyo kebakonekapo, ehe, poso batambule būmi bwa kulādila monka nyeke ne nyeke.” (Yoano 3:16) Yuka’mba buswe bwa Leza bwaswele ntanda bumutonona ape bantu bonso muswelo wa kumona būmi bwa nyeke, ino enka “bakumwitabija” bo bakapalwa ino mpalo.

Lwitabijo lufwaninwe kwimanina pa buyuki bwa binebine. (Yoano 17:3) Ukalombola’mba wi muntu muyampe na kwifunda bivule bya mpango ya Yehova itala bantu. Itabija byobya byowifunda. Kadi kulupila’mba bine nobe udi na mukenga wa kukamona būmi bwampikwa mfulo.

[Kapango pa paje 7]

Lelo Bible Unena Namani?

Kipangujo:

Lelo i bika bifikilanga muntu muyampe shi wafu?

Kilondololwa:

“Nanshi bafwe kebayukilepo nansha kimo kine.”—MUSAPUDI 9:5.

Kipangujo:

Le bantu bayampe badi na lukulupilo’ka lwa mafuku a kumeso?

Kilondololwa:

“Mwaka wiyako’wa bonso badi mu bibundu bakēvwana diwi dyandi. Ne kutamba bakatambemo.”—YOANO 5:28, 29.

Kipangujo:

Le bayampe bavule bakekalanga kwepi?

Kilondololwa:

“Boloke bakapyananga ntanda, ne kwikala monka nyeke.”—MITŌTO 37:29.