Byāfundije Yesu Pādi

“Ne kutatana mpika, Yesu wādi na kintu kyo-kyonso mu muswelo waādi wikele, kwaātambile, kyāidile mu ntanda yetu, ne ku kyonso kyādi kimutengele kumeso.”—MULEMBI, HERBERT LOCKYER.

KUMESO kwa kwitabija ne kukulupila bintu byāfundije Yesu, tufwaninwe bidi kumuyuka. Lelo bine Yesu i ani? Lelo wātambile kwepi? Wādi na kitungo’ka mu būmi? Tubwanya kwimvwana malondololo mu kyakanwa kya Yesu mwine mu Maevanjile—Mateo, Mako, Luka, ne Yoano.

Wādi’ko kala kumeso kwa kubutulwa pano panshi Yesu wānene amba: “Abalahama’o mwine nansha ku bwipi’byopo mpika, ami uno ponka pano.” (Yoano 8:58) Abalahama wāikele’ko kintu kya myaka 2000 kumeso kwa Yesu kubutulwa. Inoko, Yesu wāikele’ko kumeso kwa uno mukulutuba wa kikōkeji kwikala’ko pano pa ntanda. Le penepo Yesu wādi kwepi? Aye mwine amba: “Natūkile mūlu.”—Yoano 6:38.

Mwanā Leza Yehova udi na bana bavule ba ku mushipiditu. Ino Yesu i Mwana wa pa bula. Wētelele bu “Mwana wa bunka wa Leza.” (Yoano 3:18) Uno muneneno ulombola amba Yesu i kipangwa kipangilwe’nka na Leza kasuku kandi. Leza wāingidije Mwana wa bunka pa kupanga bintu bikwabo byonso.—Kolose 1:16.

“Mwana wa Muntu” Yesu wāingidije uno muneneno misunsa mivule kupita bonso pa kwitela. (Mateo 8:20) Mu uno muswelo wālombwele amba ke mwikeulupo uvwele ngitu ya muntu nansha kwiinanya nayo. Ino, wādi bine muntu mupwididile. Leza wātundulwidile kupityila ku mushipiditu sandu būmi bwa wandi Mwana kutamba mūlu kwiya pano pa ntanda, mu difu dya Madia, mwana-mukaji mujike. Mfulo mfulō Yesu wābutulwa bu muntu mubwaninine wampikwa bubi.—Mateo 1:18; Luka 1:35; Yoano 8:46.

Meshiasa wālailwe Mwana-mukaji Mwine Samadia wātentulwile Yesu amba: “Ndyūkile’mba Meshiasa wiyanga.” Nandi kishima-tentu amba: “I yenka ami unena nobe uno.” (Yoano 4:25, 26) Kishima “Meshiasa,” nansha “Kidishitu,” kishintulula “Mushingwe Māni.” Yesu i mushingwe māni, mutongwe na Leza mwanda wa kwingila mwingilo wa pa bula wa kufikidija mpango yandi.

Mwingilo wandi umbajinji Yesu wānene amba: “I kiñendelemo nsapwile myanda-miyampe ya bulopwe bwa Leza mu bibundi bikwabo namo, ke-kintu i akyo kyonka kyo natalwilwa.” (Luka 4:43) Nansha byaālongēle bafudile bilongwa bivule biyampe, ino kusapula myanda ya Bulopwe bwa Leza o wādi mwingilo mukatampe mu būmi bwandi. Tukesambila kumeso pa byobya byaāfundije pangala pa Bulopwe.

Na bubine, Yesu kādipo bwa bantu bakwabo.a Enka motusa kwikimwena, būmi bwaādi nabo mūlu bwābwejeje’ko bukomo ku binenwa byaānene pano panshi. Ke kya kutulumukapo shi wāsapwile musapu ushintyile būmi bwa midiyo ne midiyo ya bantu ntanda yonso!

[Kunshi kwa dyani]