Mwanda Waka Tufwaninwe Kulēmeka Banunu?
KU MBANDI ya California, mu États-Unis, kudi mutyi ubadilwa mu mityi kemilale myaka mingi. Witwanga bu Lone Cypress. Mungya lapolo, uno mutyi kemulale myaka 250. Uno mutyi mulumbuluke ukwatakanibwanga mu miswelo mishileshile pa mwanda wa bukomo bwao. Kimfwa, i muningijibwe ne kukwatakanibwa na nshinga kadi i beuyengele mabwe mu kitako.
Mutyi wa Lone Cypress wituvulujanga Bene Kidishitu banunu badi umbukata mwetu, bendelela na kūminina. Muswelo mumwekelele o bōmininanga i na kusapula myanda miyampe. Mupolofeto Yoela wālaile amba “banunu bana-balume” bakasapula musapu udi mu Bible. (Yoe. 2:28-32; Bil. 2:16-21) Langa’tu bidi pa mansaa mavule apityijanga bano banunu na kukwasha bantu bayuke “myanda-miyampe ya buno bulopwe”! (Mat. 24:14) Bamo mu bano basapudi ba Bulopwe banunu baūminine umbula bwa myaka kupangwapangwa ne makambakano makwabo. Shi mutyi wa cypress utendelwa mwanda wa bukomo bwao ne kuningijibwa na mabwe ne nshinga, le banunu badi umbukata mwetu ke pepi, mwene bafwaninwe kutendelwa ne kukwatakanibwa na bulēme ne kalēmo!
Yehova Leza wāsoñenye bantu bandi ba pa kala amba: “Ukamutalukila wa mvwi ku mutwe ne kukafwa kipala mpala ya mununu, kadi ukākamwa Leza obe; amiwa ne Yehova.” (Levi 19:32) Mu bengidi ba Yehova dyalelo mudi bimfwa bilumbuluke bya bantu ba kikōkeji ‘bananga na Leza’ myaka na myaka. (Mika 6:8) Ponso pobendelela na kulonda misoñanya ya mu Bisonekwa, na bubine, mutwe wabo wa mvwi i “kilongo kya ntumbo.”—Nk. 16:31.
Mutumibwa Polo wāfundije nkasampe Temote amba: “Kokafutulula mukulumpe.” Ino Temote wādi ufwaninwe ‘kumwisashila pamo bwa shandi’ ne “Bāna-bakaji bakulumpe nabo pamo bwa [bainandi].” (1 Tem. 5:1, 2) I amo, Temote wādi ufwaninwe ‘kutalukila’ wa mvwi ku mutwe. Kibamweka patōka’mba, Yehova witusakila tulombole buno bulēme mu muneneno wetu.
“Mukwilemeka namo kadi, umo akōkele mukwabo,” mo munenena Loma 12:10. Bakulumpe mu kipwilo balēmekanga Bene Kidishitu banunu. Ino batwe bonso tufwaninwe kubadikila kulēmeka bakwetu.
Bine, bantu ba mu kisaka badi na kiselwa kya pa bula ku bambutwile ne ku bankambo babo. Pa mwanda utala mutyi wa Lone Cypress, bantu badi bakimbanga miswelo ya kwiulama, ne pano bakikimba’yo. Nanshi bine, netu tufwaninwe kukimba miswelo ya kulama bulēmantu bwa bambutwile ne bankambo betu banunupa. Kimfwa, kuteja na katentekeji kuketukinga ku kwibaningila balonge bintu motusakila pampikwa kubanga milangwe yabo.—Nk. 23:22; 1 Tem. 5:4.
Banunu badi mu bukata mwetu i balēme mpata ku meso a Yehova. Kebalekelelangapo. (Mit. 71:18) Na bubine Leza wa bine wibaningijanga bendelele kumwingidila na kikōkeji. Netu, twendelelei na kukwatakanya ne kulēmeka banunu.
[Bifwatulo pa paje 13]
Monka musakilwa mutyi wa Lone Cypress kukwatakanibwa, ne banunu nabo basakilwa kumonwa na bulēme ne kalēmo
[Kutambile Kifwatulo]
American Spirit Images/age fotostock