Mwa Kupwila Mitompwe Ivudile

Bible kanenangapo amba busongi bupēlanga. Mutumibwa Polo wāpelwe bukomo na Leza asoneke amba boba besonga “bakasusuka ku difuku ku difuku.” (1 Kodinda 7:28, Myanda Miyampe ku Bonso) Ino ba mulume ne mukaji bakokeja kulonga bivule mwanda wa kutyepeja masusu ebatana ne kuvudija nsangaji yobepa umo ku mukwabo. Bandaula ino mitompwe isamba ivudile ya balume ne bakaji, utale ne muswelo ukokeja kukukwasha misoñanya ya mu Bible shi wingidije’yo.

1

MITOMPWE:

“Ketukiivwanikangapo na mwinē pami.”

MUSOÑANYA WA MU BIBLE:

“Muyuke kutonga kyokya kitabukile kunengela.”—FIDIPAI 1:10, MB.

Busongi bobe bubadilwa mu bintu bitabukile kunengela mu būmi bobe. Bufwaninwe kutangidija kumeso. Pa kino bandaula shi mpangiko yobe ilengejanga ino mitompwe. Kokaleka mingilo ya kamweno isansanye būmi bobe na bwa mwinē pobe. Shako, mingilo ya ku ngitu ne bintu bikwabo kebyepukwapo bibwanya mu kyaba kampanda kwimushiañanya. Ino ukokeja, kadi ufwaninwe kutūla mikalo ku kintu kyonso kyodi’po na lupusa—kimfwa kitatyi kyopityija wipwija mukose pa bunka nansha na balunda.

Inoko, bamo balundilanga’ko mingilo mikwabo nansha bintu bya kwipwija nabyo mukose mwanda’tu wa kutyina kwikala kitatyi kilampe na benē pabo. Bano bantu “kebeivwanikangapo” na benē pabo. Banyemanga myanda. Shi bidi uno muswelo kodi nansha kudi mwinē pobe, musakilwa kujingulula mwanda mwine mufyame ne kupwa’o. Enka kulonga bintu umbūmi pamo na mwinē pobe ko kubwanya kwimukwasha mwiivwanike ne kwikala banwe “bonso babidi ke ngitu imo yonka.”—Ngalwilo 2:24.

Muswelo waingidije bamo ano madingi: Andrewa ne Tanji, ba mulume ne mukaji ba mu Ostrali, i besonge pano ke myaka dikumi. Andrew unena’mba: “Nayukile’mba kwingila bipitepite ne kupityija kitatyi kilampe bininge na balunda kukokeja kutūla busongi mu kyaka. O mwanda ami ne mukajami twi betudile’ko kitatyi kya kwisamba ne kwilombola milangwe yetu.”

Dave ne Jane, bashikatanga mu États-Unis i besonge ke padi myaka 22, badi batūla minite 30 imbajinji kyolwa ne kyolwa bebangila myanda ne milangwe. Jane amba: “Kino i kitatyi kya mvubu mpata, ketulekangapo kintu nansha kimo kipingakene’po.”

2

MITOMPWE:

“Mu buno busongi nkikimwenanga’mopo byonsaka.”

MUSOÑANYA WA MU BIBLE:

“Kekukēkala muntu, nansha umo, wakwisakila bya aye mwine, poso byonka bya mukwabo.”—1 KODINDA 10:24.

Muntu utele mutyima dibajinji ku byasaka kumwena mu busongi kakekalapo nansha dimo mu nsangaji ya bine, nansha shi besonge misunsa mivule na bantu bangi. Busongi bwendekanga shi umo ne umo uta mutyima ku kupāna pa kyaba kya kupebwa. Yesu wāletele bubinga’mba: “Dyese dya kupana ditabukile dya kupebwa.”—Bilongwa 20:35.

Muswelo waingidije bamo ano madingi: Maria ne Martin, bekalanga mu Meksike, i besonge ke padi myaka 39. Ino mu dishinda kemubulwangapo bishiki. Bavuluka kishiki kimo kya pa bula. Maria amba: “Difuku dimo twipotomeja, nanenene Martin kintu kyampikwa bulēme. Nandi wakalabala. Natompa kumushintulwila’mba nkyadipo nsaka kunena byonanenene’bya, nadi mufitwe. Ino kaungivwenepo.” Martin unena’mba, “Mu lolwa lupotopoto, nashilwile kulanga’mba ketufwaninwepo kwikala nandi monka pamo, na’mba nkikilongapo bukomo bwa kulumbulula buno busongi.”

Martin wadi usaka kulēmekwa, Maria nandi usaka kwivwanwa. I kutupu wadi umona kyaadi usaka.

Le badi babwanya namani kupwa uno mwanda? “Nakwete kitatyi kya kutūkija bulobo,” ye Martin unena, “penepo batwe bonso twakwata butyibi bwa kulonda madingi a mu Bible a tunangu a kwikala na bulēme ne kanye. Myaka pa kupita’po, twayukile amba nansha shi myanda ilupuke misunsa inga, tukokeja kunekenya’yo shi tulombe bukwashi bwa Leza ne kulonda madingi atanwa mu Bible.”—Isaya 48:17, 18; Efisesa 4:31, 32.

3

MITOMPWE:

“Mwinē petu kaloñangapo byafwaninwe kulonga.”

MUSOÑANYA WA MU BIBLE:

“Ebiya bātwe bonsololo, kuno ko tudi, tukēshintulwila kudi Leza, muntu pandi, muntu pandi.”—LOMA 14:12.

I bine, busongi kebukendekapo senene shi i umo kete ulonga bukomo bwa kwibulumbulula. Inoko mwanda ukabipa kutabuka shi bonso badi na kalengwa, au utopeka mukwabo.

Shi wimanina dibajinji enka pa bifwaninwe kulonga mwinē penu, nankyo ubetūla mu būmi bwa makambakano. Nakampata shi umona kutupatupa kwa mwinē pobe bu bubinga bwa kuleka kuvuya byobe biselwa. Ku mutamba mukwabo, shi ulonge bukomo bwa kwikala mulume nansha mukaji muyampe, busongi bubwanya kulumbuluka. (1 Petelo 3:1-3) Kya mvubu kutabuka, ulombolanga Leza amba ulēmekele mpangiko yandi ya busongi, kadi bilongwa byobe bikamusangaja bikatampe.—1 Petelo 2:19.

Muswelo waingidije bamo ano madingi: Kim ne mulumyandi, bashikete mu ntanda ya Korea, i besonge ke padi myaka 38. Kim unena’mba: “Kyaba kimo wami mulume undobelanga waleka ne kwisamba nami kwine, kadi nkiyukilepo i mwanda waka. Kino kimpanga milangwe ya amba buswe bwaadi unsenswe bubatalala. Kyaba kimo nadi ke nanga, ‘Mwanda waka usakanga’ko ami mwivwana ino aye kungivwana mpika?’”

Kim wadi ubwanya kubambila meso pa bubi bwa mwikadila ne pa byobya kebilongapo mulumyandi. Ino, watongele mwiendelejo mwishile. Kim amba, “pa kyaba kya kwikala mufitwe, nefundile amba i kiyampe kutabuka kukwata mulangwe wa kukimba ndoe. Ku mfulo, batwe bonso bubidi tubwanya kwīfula ne kwisamba bintu mu ndoe.”—Yakoba 3:18.

4

MITOMPWE:

“Mukajami kankōkelepo.”

MUSOÑANYA WA MU BIBLE:

“Mutwe wa mwana-mulume i Kidishitu.”—1 KODINDA 11:3.

Mulume umona’mba mukaji kamukōkelepo, ufwaninwe kubandaula dibajinji shi aye mwine ukōkele Mutwe wandi, Yesu Kidishitu. Mulume ukokeja kulombola kikōkeji kyandi na kulonda kimfwa kya Yesu.

Mutumibwa Polo wāsonekele amba: “Balume nenu sanswai bakaji benu, monka musanshilwe Kidishitu kipwilo, wēpanine ponka pa akyo.” (Efisesa 5:25) Yesu kādipo ‘ukōkeja bu-mfumwabo’ bandi bana ba bwanga. (Mako 10:42-44) Wāpele balondi bandi bulombodi bupotoloke ne kwibalemununa pokifwaninwe. Inoko kādipo na kasumalomo. Wādi na kanye kobadi, kadi wādi uyukile mikalo yabo. (Mateo 11:29, 30; Mako 6:30, 31; 14:37, 38) Wādi nyeke ubadikija tumweno twabo kumeso.—Mateo 20:25-28.

Mulume ufwaninwe kwiipangula kino kipangujo, ‘Le muswelo omona bumutwe ne muswelo omona mukaji i mutādilwe na bishi bya kwetu kupita’ko na madingi ne bimfwa bitanwa mu Bible?’ Kimfwa, le ulanga namani shi mukaji ketabijepo milangwe ya mulume, ino walombola kupela kwandi bya bulēme aye’ko uningile? Mu Bible, Sala mukaja Abalahama uyukene bu kimfwa kya mukaji wa kikōkeji. (1 Petelo 3:1, 6) Inoko, wānene milangwe yandi pa kitatyi kifwaninwe, kimfwa pākomenwe Abalahama kujingulula byaka byādi bya kutana kisaka.—Ngalwilo 16:5; 21:9-12.

I bimweke’mba Abalahama kāfuninepo Sala ekale talala. Kādipo na kasumalomo. Ne mulume ulonda madingi a mu Bible nandi kakaningilapo mukajandi, amba enka akōkele ku byonso byasaka. Mukaji ukamulēmeka shi wingidija bumutwe bwandi na lusa.

Muswelo waingidije bamo ano madingi: James, ushikatanga mu Angeletele i musonge pano ke myaka mwanda, unena’mba: “Nefundanga kuleka kukwata butyibi bukatampe kwampikwa kwisamba na mukaji. Nkilangilangapo bunka. Ino, nsakanga kutūla bisakibwa byandi kumeso.”

George ushikatanga mu États-Unis i musonge pano ke myaka 59. Unena’mba: “Ntompanga kwikala na wami mukaji, ke pamopo bwa mwana mutyetye, ino bwa mukwashi wa ñeni mulumbuluke.”—Nkindi 31:10.

5

MITOMPWE:

“Wami mulume kayukilepo kwendeja.”

MUSOÑANYA WA MU BIBLE:

“Enselele mwana-mukaji wañeni ubaka njibo yandi: Ino mulembakane utūta’yo ne makasa a aye mwine.”—NKINDI 14:1.

Shi obe mulume wikakanga pa kukwata butyibi nansha kuludika njibo, ubwanya kutonga pa bino bintu bisatu. (1) Ubwanya kumutopekatopeka pa bilubo byandi, nansha (2) kumuyata bumutwe wa kisaka, nansha (3) ukokeja kumufwija’ko pa bukomo kampanda bwalonga. Shi utonge mulangwe umo pa ibidi mibajinji, nankyo ubatūta njibo yobe na makasa a abe mwine. Ino shi utonge mulangwe wa busatu, ukōbaka nansha kukomeja busongi bobe.

Bana-balume bavule basakanga kulēmekwa kupita ne kusanshibwa kwine. O mwanda longa bukomo mulumyobe emone bu mulēmekibwe—longa amone amba bukomo bwalonga pa kwendeja kisaka kyandi i bwendele’mo kadi wibusangelanga—padi nandi ukalumbulula mwingidilo wandi. Shako, kyaba kimo kuketabijapo bisaka mulume pa mwanda kampanda. Banwe bonso bubidi musakilwa kwisambila pa ino myanda. (Nkindi 18:13) Inoko, binenwa byotonga ne diwi dyowisamba nadyo, bikakukwasha utūte busongi bobe nansha kūbaka’bo. (Nkindi 21:9; 27:15) Nena bya bulēme, padi ukamona byosaka’bya—mulume kashishikitapo kwendeja.

Muswelo waingidije bamo ano madingi: Michele, ushikatanga mu États-Unis i musongwe pano ke myaka 30, unena’mba: “Mama byaetutamije ne bankasami kwampikwa bukwashi bwa tata, wadi nkanka, na bwanapabo. Ngikala nsaka kwiula ino ngikadilo. O mwanda nsakilwa kulonga bukomo pa kusaka’mba ngikale na kikōkeji. Kimfwa, nefundile kwisamba na mulume pa kyaba kya kukwata butyibi bunka.”

Rachel, ushikatanga mu Ostrali, i musongwe na Mark pano ke myaka 21, nandi watādilwe na ngikadilo ya kwaatamine. Uvuluka’mba, “Mama kadipo ukōkelanga tata nansha dimo. Wadi umupotomejanga ne kumulēmeka mpika. Mu myaka imbajinji ya busongi bwami, nadi ngiula bya mama. Ino, myaka pa kupita’po, nayukile mvubu ya kulonda madingi a mu Bible atala kwikala na bulēme. Pano ami ne Mark tudi na busongi bwa nsangaji mikatampe.”

6

MITOMPWE:

“Bilongwa bibi bya mwinē pami bibantonda.”

MUSOÑANYA WA MU BIBLE:

“Kadi ne kwifudila bānwe bene na bene, ne kwilekela bitupu bānwe bene, shi umo wapi mambo ku mukwabo.”—KOLOSE 3:13.

Po mwadi kemwetundaile, wadi uta mutyima ku ngikadila miyampe ya omusaka kwisonga nandi ne kupūta meso pa tubilubo twandi. Ubulwe’po kulonga namino ne pano pene? Shako, mwine pobe ukokeja kulonga bintu bilengeja utompole. Ino wiipangule amba, ‘Le i ngikadilo’ka ya mwinē pami yomfwaninwe kuta’ko mutyima—miyampe’ni mibi?’

Yesu wāletele lukindi luyampe lulombola mvubu ya kuleka kutala tubilubo totumona mu bakwetu. Wāipangwile amba, “Lelo . . . i bika byōtadila mukwenu kaseke ka bukula bwa mutyi kadi mu dīso. Abe ne obe mulamba mu dīso ne kuvuluka’o mpika.” (Mateo 7:3) Kaseke ka bukula bwa mutyi i katyutyu. Ino mulamba i mutyi mukata, mulampe wingidijibwa pa kukwatakanya musaka wa njibo. I bika byaādi usaka kunena? “Badikila bidi kufundula mulamba udi mu dīso dya abe mwine, ebiya umone mwakufundwila kaseke ka mu dīso dya mukwenu.”—Mateo 7:5.

Yesu wāshilwile luno lukindi na kidyumu kimo kisumininwe. Wānene’mba: “Kemukafwatakenya bakwenu bingi, nenu nankyo mukafwatakanibwa bingi.” (Mateo 7:1, 2) Shi usaka Leza aleke kuta mutyima pa bilubo byobe—mulamba udi mu dīso dyobe—i kitabuke buya nobe uleke kuta mutyima ku bilubo bya mwinē pobe.—Mateo 6:14, 15.

Muswelo waingidije bamo ano madingi: Jenny, ushikatanga mu Angeletele i musongwe na Simon ke padi myaka kitema, unena pano amba: “Namone amba kintu kikatampe kileñanga lupotopoto na mulumyami i kubulwa kukwata mpangiko kumeso kwa kitatyi, wilaijanga enka nzovu wimene kalamba bulembe. Kano i kafwala, mwanda potwadi ketwetundaile, nadi nsenswe mwanda wadi ulonga bintu ponka na ponka. Inoko, nayuka’mba nami ngidi na bilubo, kimfwa kukontolola bipitepite. Simon ne amiwa twifundanga kwilekela tubilubo tutyetutye.”

Curt mulumya Michele, otwatelanga kūlu’wa, unena amba: “Shi ute mutyima ku bilongwa bibi bya mwinē pobe, ukamona’mba bino bilubo byendanga bibaya’nka kubaya. Nsangelanga kuta mutyima ku ngikadilo yanengeje nsanswe Michele.”

Kintu Kikwasha pa Kunekenya

Bino bimfwa bityetye bilombola’mba makambakano a mu busongi keakokejapo kwepukwa, inoko akokeja kunekenibwa. Lelo i kintu’ka kikakwasha pa kunekenya? Tamija buswe bwa kusanswa Leza ne mutyima wa kulonda madingi atanwa mu Kinenwa kyandi, Bible.

Alex ne Itohan, bashikatanga mu Nigéria i besonge pano ke myaka 20 ne musubu befundile kino kintu. Alex unena’mba: “Najingulula’mba makambakano o-onso a mu busongi akokeja kupwa shi ba mulume ne mukaji bengidije misoñanya ya mu Bible.” Mukajandi unena’mba: “Twefundile mvubu ya kulombela pamo kitatyi ne kitatyi ne kulonda madingi a mu Bible a kwisanswa bya binebine ne kwitūkijija mutyima umo ne mukwabo. Pano makambakano etu abatyepa kutabuka potwadi tukisongasonga.”

Le usaka kuyukila’ko bivule bitala madingi a kamweno atanwa mu Kinenwa kya Leza akokeja kukwasha kisaka kyobe? Nankyo nena Batumoni ba Yehova babandaule nobe shapita 14 wa dibuku Lelo I Bika Bine Bifundija Bible?b

[Kunshi kwa dyani]

[Kifwatulo pa paje 4]

Lelo twitūdilanga’ko kitatyi?

[Kifwatulo pa paje 5]

Lelo nsakanga kupāna kupita’ko kupebwa?

[Kifwatulo pa paje 6]

Lelo noñanga bukomo bwa kupwa lupotopoto?

[Kifwatulo pa paje 7]

Lelo ngipangulanga milangwe ya wami mukaji kumeso kwa kukwata butyibi?

[Kifwatulo pa paje 9]

Lelo ntanga mutyima ku ngikadilo miyampe ya mwinē pami?