Yesu Kidishitu Mwine i Ani?

“Ebiya nandi pa kutwela monka mu Yelusalema kibundi kyonso kyatenkana ne kutenkana’mba: Lelo i ani nandi, uno’le? Kūmvwana kudi byobya bibumbo byadipo amba Uno i Yesu mupolofeto, mwine Nazala mu Ngadilea.”—MATEO 21:10, 11.

MWANDA waka kwiya kwa Yesu Kidishitua mu Yelusalema ku muketeko wa mu 33 K.K. kubatenkanya bantu? Bavule mu kibundi bāimvwene myanda itala Yesu ne ya bintu bya kutendelwa byalongele. Bāshilula kulombola’yo bakwabo. (Yoano 12:17-19) Nansha nankyo, bibumbo kebyādipo biyukile bivule amba, umbukata mwabo mudi muntu udi na lupusa lukasambakana konso umbula bwa tutwa twa myaka kufika ne dyalelo dino!

Tala bimfwa bityetye bya lupusa lukatampe lwa Yesu mu mānga ya muzo wa muntu.

▪ Kalandadiye kengidijibwa mu matanda mavule kemanine pa mwaka umonwa amba o wābutwilwe Yesu.

▪ Kudi kintu kya midiyala ibidi ya bantu pano pa ntanda—ko kunena’mba muntu umo pa basatu—betela bu Bene Kidishitu.

▪ Bamizilma bavule mudiyala umo ne kupita ntanda yonso, bafundijanga amba Yesu i “mupolofeto mukatampe kupita Abalahama, Noa, ne Mosesa.”

▪ Binenwa bivule bya tunangu byānene Yesu, mu miswelo palapala, i bitwele mu muneneno wa difuku ne difuku wa bantu. Kimfwa:

‘Wa kukukupila kutama kumo, mupe ne kukwabo kwine.’—MATEO 5:39.

‘Wa kukuningila lwendo lwa kyala kimo, enda nandi ne bibidi bine.’—MATEO 5:41.

‘Kutupu ubwanya kwingidila bamfumwandi babidi.’—MATEO 6:24.

‘Kokipāna kya bulēme ku ngulube.’—MATEO 7:6.

‘Byomusaka bantu bemulongele, nenu mufwaninwe kwibalongela’byo.’—MATEO 7:12.

‘Badikila kubala lupeto.’—LUKA 14:28.

I kutupu upatanya lupusa lwa Yesu mu būmi bwa bantu. Inoko, bantu bakikutakanya na milangwe ne nkulupilo mishileshile itala padi Yesu. Padi, kwije kwiipangula amba, ‘Yesu Kidishitu mwine i ani?’ Bible kete ye ukokeja kwitusapwila kwātambile Yesu, būmi bwandi, ne kine kyaāfwidile. Kuyuka buno bubinebine butala Yesu kukokeja kushinta mpata būmi bobe—tamba pano kutwala ne kumeso.

[Kunshi kwa dyani]