2 Leza Ketutelepo Mutyima Binebine Lelo I bya Bine?
Byokodi Padi Mwivwane: “Shi Leza wadi utele bantu mutyima, wadi wa kutalula’ko bibi ne masusu mu ino ntanda. Nansha shi utele bantu bonso mutyima, ino ami’ko’ko kantele’opo.”
Bifundija Bible: Yehova Leza kalengejangapo nansha dimo bibi. (Yakoba 1:13) Nansha byakafundula bibi kitatyi kampanda, pano ulekele’ko bidi malongolodi mabi ekale’ko mwanda wa kuleta kilondololwa ku mwanda mukatampe wākolomwenwe ku ngalwilo kwa mānga ya muzo wa muntu. Ku mfulo, ukakūla muzo wa muntu ne kupwa makambakano onso akolomwenwe na boba bapela bubikadi bwandi.—Ngalwilo 3:1-6; Isaya 65:17.a
Kutentekela pa kuta kwatele mutyima kisaka kyonso kya muntu, Leza ulombolanga’mba utele’o ne umo ne umo. Mateo 10:29-31 unena’mba Leza utalanga konso ketufikila ne koketuyukilepo batwe bene, amba: “Lelo toni tubidi ketupotwepo ne kadilungo kamo? Ino nansha kamo kakapona panshi pa kubulwa Shenu. Nanshi ne nywene mīne ya ku mutwe wenu nayo i mibalwe yonso. Papo pene po pa mwanda wakubulwa kukwatyilwa moyo o mukīdile toni tungi buleme.”
Kuyuka bubinebine mokubwaninya kukukwasha: Divule tupelanga kwikala na bantu ba kasumalomo ne bampikwa kuta bakwabo mutyima. Ke kya kutulumukapo, shi bubela bwa amba Leza katangapo bantu mutyima bubalengeja bantu bavule baleke kumuyuka nansha kumufwena kwine poso shi enka kebadipo na kya kutonga. Kuyuka amba Yehova Leza ukutele mutyima binebine kukakutonona wifunde bivule bimutala ne kukomeja kipwano kyobe nandi.
Kimfwa, ubwanya kulomba Leza koku utatana shi ukwimvwene nansha shi ukakulondolola. Bible witukulupija amba yewa “wivwananga kulombela” utejanga kitatyi kyonso yewa umufwena na mutyima umo.—Mitōto 65:2.
Leza wimwita “kwela kuzumbazumba konso kwa mutyima kudi aye, ke-muntu aye wimutele mutyima.” (1 Petelo 5:7) Tukokeja kumukulupila nansha ke mu bitatyi bya byamalwa amba witutele mutyima, mwanda Kinenwa kyandi kinena’mba: “Yehova udi pa bwipi na boba ba mutyima mutyumuke, kadi upandijanga bano namino ba mushipiditu wa kwisasapo.”—Mitōto 34:18.
[Kunshi kwa dyani]
a Pa kuyukila’ko myanda mikwabo itala kilekele’ko Leza masusu, tala shapita 11 wa dibuku Lelo I Bika Bine Bifundija Bible?
[Bushintuludi pa paje 5]
Shi Leza katelepo bantu mutyima, mwanda waka witwita tumulombe?