Wifunde mu Kinenwa kya Leza

Lelo Leza Ukaleta Umbikalo wa Ntanda Yonso?

Kino kishinte kisambila pa bipangujo byokodi padi mwipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisambila nobe pa ano malondololo.

1. Mwanda waka bantu basakilwa umbikalo wa ntanda yonso?

Makambakano a bantu dyalelo i masambakane ntanda yonso. Mu mizo imo, bantu bavule i balanda kadi basusuka. Mu mikwabo namo, bantu bavule bamweka bu badi na bintu bivule kutabuka ne byobasakilwa. I enka bwendeji bwa ntanda yonso ye bubwanya kwabanya bupeta bwa pano pa ntanda mu muswelo mwendele’mo.—Tanga Musapudi 4:1; 8:9.

2. Le i ani ufwaninwe kupebwaumbikalo wa ntanda yonso?

Mulangwe wa kwikala’ko kwa mulopwe wa ntanda yonso kewitabijibwepo na bavule mwanda kekudipo mwana-mulume nansha mwana-mukaji ubwanya kuludika biyampe. Kekudipo muntu ubwanya kwitabijibwa na bantu bonso. Kadi, lelo i ani udi na lupusa kabwanyapo kubipa? Milangwe ya kuludika bantu bonso na kasusu ileñanga moyo.—Tanga Nkindi 29:2; Yelemia 10:23.

Yehova Leza wātongele Yesu wandi Mwana endeje bantu nyeke. (Luka 1:32, 33) Yesu wāikele’ko pano pa ntanda. Paādi pano pa ntanda, wābelwile babela, wāfundije betyepeje ne kupityija kitatyi pamo na bana. (Mako 1:40-42; 6:34; 10:13-16) Nanshi Yesu i Mulopwe mufwaninwe.—Tanga Yoano 1:14.

3. Le umbikalo wa ntanda yonso udi’ko bine?

Leza wātongele wandi Mwana aludike ntanda aye momwa mūlu. (Danyele 7:13, 14) Monka kemwikadilangapo muludiki wa bantu mu bibundi byonso byaludika, Yesu nandi kasakilwapo kwikala pano pa ntanda mwanda wa kuludika bantu.—Tanga Mateo 8:5-9, 13.

Lelo bantu bonso baketabija Yesu bu Mulopwe? Mhm. I enka bantu basenswe bilumbuluke bo bakamwitabija. Yehova ukatalula’ko pano pa ntanda boba bapela Mulopwe wa buswe kadi moloke waātongele.—Tanga Meteo 25:31-33, 46.

4. Le Mulopwe wa ntanda yonso ukalonga bika?

Pamo bwa mukumbi ukongakanya mikōko yandi, Yesu ukongakanyanga kala bantu betyepeje ba mu mizo yonso ne kwibafundija mashinda a Leza a buswe. (Yoano 10:16; 13:34) Bano bantu badi na kipyupyu kya kukwatakanya Yesu ne bulopwe bwandi. (Mitōto 72:8; Mateo 4:19, 20) Babikalwa ba Yesu ba kikōkeji ba ntanda yonso, basapulanga mu bumo amba Yesu ke Mulopwe.—Tanga Mateo 24:14.

Panopano ponka Yesu usa kulonga kintu na bukomo mwanda wa kukūla bantu ku buludiki bubi. I mutonge balondi bandi bamo ba kikōkeji ba kuludika ino ntanda pamo nandi momwa mūlu. (Danyele 2:44; 7:27) Bulopwe bwa Yesu bukayuja kuyukidija kwa Yehova pano pa ntanda, kadi bukatūla’ko paladisa miyampe yājimine ku ngalwilo kwa mānga ya muntu.—Tanga Isaya 11:3, 9; Mateo 19:28.

Shi usaka kuyukila’ko bivule, tala shapita 8 wa dino dibuku, Lelo I Bika Bine Bifundija Bible?, dilupwilwe na Batumoni ba Yehova.