Boba Basenswe Yehova “Kebadipo ne Mwakukukadila”
“Ndoe mikatakata badi nayo boba baswele mukanda-obe-wabijila; kadi kebadipo ne mwakukukadila.”—MIT. 119:165.
USA KULONDOLOLA NAMINI?
Le bene Kidishitu badi mu lubilo muswelo’ka, ne bakapalwa mpalo’ka?
Le i mabwe’ka abwanya kukukaja mwine Kidishitu?
Le boba basenswe mukanda wa bijila wa Yehova kekudipo kya kwibakukaja mu buluji’ka?
1. Le ngikadila ya munyemi umo ibwanya kwelekejibwa namani na kusuminwa kotusuminwe kubulwa kuzoza?
MARY Decker wāikele ke munyemi aye papo na myaka isenselela ku makumi-abidi. Bantu bavule bādi balanga’mba wādi wa kutambula kilukwa kya nsahabu mu makayo a Olempike a mu 1984 mu lubilo lwa mfulo lwa mametele 3000. Inoko, bilato byandi kebyātabukilepo mushiko wa mfulo. Wākukele mu kūlu kwa munyemi mukwabo, wakomenwa kunyema. Wetapa bilonda kadila, wadi unenwe kuvula bilato. Inoko, Mary kālekelepo kunyema. Kubwipi kwa mwaka umo pa kupita’po, wajokela monka mu lubilo ne kushala mu nsekununi ya ntanda ya bana-bakaji bānyemene lubilo mu 1985.
2. Le bene Kidishitu ba bine badi mu lubilo mu buluji’ka, ne tufwaninwe kuta mutyima ku bika?
2 Batwe bene Kidishitu netu tudi mu lubilo—lubilo lwa kyelekejo lwa kunyema lwa nshi. Tufwaninwe kuta mutyima ku kunyema mwanda wa kubwina. Bushindañani bwa lubilo lwetu kebwimaninepo pa kunyema bukidibukidi. Kadi ketunyemangapo mwanda’tu wa kutūkija mutyima mu bitatyi byoketudi kya kulonga. Ino, tubwanya kudingakanibwa na munyemi ulombwa kūminina pa kubwina. Mutumibwa Polo wāingidije muneneno wa kyelekejo pa kutela munyemi unyema lubilo mu mukanda waāsonekēle bene Kidishitu ba mu Kodinda, kibundi kyādi kitumbīle kunyema lubilo. Wāsonekele amba: “Lelo kemuyūkilepo’mba, ku boba banyema lubilo i bonso banyema, nanshi i umo wakutambula mpalo? Nenu monka, nyemai, amba mutambule.”—1 Kod. 9:24.
3. Le banyemi bonso babwanya kubwina mu lubilo lwa kukamona būmi bwa nyeke muswelo’ka?
3 Bible witusoñanya tunyeme mu luno lubilo lwa kyelekejo. (Tanga 1 Kodinda 9:25-27.) Mpalo i ya būmi bwa nyeke, bwa momwa mūlu ku bene Kidishitu bashingwe māni nansha bwa pano panshi ku bantu bakwabo bonso. Kwishila na banyemi ba lubilo, luno lubilo lulengejanga bantu bonso banyema’lo ne kūminina kufika ne ku mfulo batambule mpalo. (Mat. 24:13) Bakajimija ino mpalo’nka shi abakomenwa kunyema kukwatañana na bijila nansha shi abakomenwa kutabuka mushiko wa mfulo. Kadi, luno lo lubilo lumo kete lupāna mpalo ya būmi bwa nyeke.
4. Le i bika bibwanya kwitulengeja tukomenwe kunyema lubilo lwa kukamona būmi bwa nyeke?
4 Kutabuka mushiko wa mfulo kekupēlangapo. Kadi kulomba kwidingila ne kwikala na kitungo kipotoloke. I enka muntu umo kete—Yesu Kidishitu—wābwenye kutabuka mushiko wa mfulo pambulwa kukukala nansha dimo. Ino Yakoba wandi mwanā bwanga wāsonekele amba, balondi ba Kidishitu ‘bonso bakukalanga mu bintu bivule.’ (Yak. 3:2) I bine! Batwe bonso tususukanga na kubulwa kubwaninina kwetu ne kwa bakwetu. O mwanda kyaba kimo tubwanya kukukala, ebiya twalumbakana kadi twakomenwa kwendelela. Tubwanya’nka ne kupona; ino twalanguka ne kwendelela na kunyema. Bamo bāponene bibi byobādi basakilwa kukwashibwa mwanda wa balanguke ne kushilula kunyema monka kufika ne ku mushiko wa mfulo. Nanshi tubwanya kukukala nansha kupona kyaba kimo nansha ke misungu mingi.—1 Bal. 8:46.
SHI UBAKUKALA, ENDELELA NA KUNYEMA
5, 6. (a) Le mwine Kidishitu ‘kadipo ne mwa kukukela’ namani, ne i bika bikamukwasha ‘alanguke monka’? (b) Mwanda waka bamo kebalangukangapo pa kupwa kukukala?
5 Padi kodi mwingidije kishima “kukukala” ne “kupona” mu miswelo palapala mwanda wa kwisambila pa ngikadila ya ku mushipiditu. Bino bishima bya mu Bible bikokeja kwikala na buluji bumo, ino ke ponsopo. Kimfwa, tala bishima bidi mu Nkindi 24:16 bya amba: “Moloke upona misungu isamba-ibidi, ino ulanguka monka; ino babi bafulamunwa ne byamalwa.”
6 Yehova kakalekapo boba bamukulupile bakukale nansha kupona—batanwe na makambakano nansha kukōka mu butōtyi bwabo—ko kunena’mba bakomenwa kulanguka. Twi bakulupijibwe amba Yehova uketukwasha ‘tulanguke monka’ amba, twendelele kwipāna kwadi na bukomo bonso. Bine, bonso basenswe Yehova ne mutyima onso basengibwanga! Babi kebadipo na mutyima wa uno muswelo wa kulanguka monka. Kebakimbengapo bukwashi bwa mushipiditu sandu wa Leza ne bwa bantu bandi, nansha kupela buno bukwashi kitatyi kyobebapa’bo. Ino, boba ‘basenswe mukanda wa bijila wa Yehova,’ kekudipo kya kukukaja kibwanya kwibasonsolola lonso mu lubilo lwa kukamona būmi.—Tanga Mitōto 119:165.
7, 8. Le i muswelo’ka ubwanya muntu “kupona” ino waitabijibwa na Leza?
7 Bamo baponenanga mu tubilubo tutyetutye—enka ne misunsa mingi—mwanda wa bukōkekōke. Ino i boloke nyeke ku meso a Yehova shi ‘balanguke monka,’ ko kunena’mba kwisāsa bya binebine ne kwendelela na mwingilo wa dikōkeji. Tubwanya kumona kino mu muswelo wādi wikele Leza na Isalela wa kala. (Is. 41:9, 10) Nkindi 24:16 utelelwe kūlu, pa kyaba kya kutyityija kintu kibi—ko kunene’mba ‘kupona’ kwetu—ino ukomeneja kintu kiyampe, ‘kulanguka monka’ kotulanguka na bukwashi bwa Leza wetu wa lusa. (Tanga Isaya 55:7.) Ba Yehova Leza ne Yesu Kidishitu byobetukulupile, betukankamikanga na kanye ‘tulanguke monka.’—Mit. 86:5; Yoa. 5:19.
8 Nansha munyemi byakukalanga nansha kupona mu lubilo, ubwanya kwikala na kitatyi kya kubuka ne kuvuya lubilo lwandi shi alonge bukidibukidi. Ketuyukilepo ‘difuku nansha nsá’ ikafika mfulo ya lubilo lwetu lwa kumona būmi bwa nyeke. (Mat. 24:36) Ino shi ketukukalapo bininge, tukatabula nyeke biyampe, tukashala mu lubilo ne kufikija’lo ku mfulo biyampe. Penepa, i muswelo’ka otukepuka kukukala?
BIKUKAJA BIKANKAJA KWENDELELA KUMESO
9. Le i bikukaja’ka bikankaja kwendelela kumeso byotusa kubandaula?
9 Tubandaulei’ko bidi bikukaja bitano bikankajanga kwendelela kumeso—bukōkekōke bwetu, bilokoloko bya ngitu, bukondame bwa banabetu mu lwitabijo, byamalwa nansha kupangwapangwa ne kubulwa kubwaninina kwa bakwetu. Inoko shitubakukala, tuvulukei amba Yehova utūkije mutyima bya binebine. Kapelakanangapo kwitumona bu bakubulwa dikōkeji.
10, 11. Le Davida wādi ulwa na bukōkekōke’ka?
10 Bukōkekōke bwetu bubwanya kudingakanibwa na mabwe a kukukala alēle pa kifuko kinyemenwa’po lubilo. Shi tutale binkumenkume byālongekele mu būmi bwa Mulopwe Davida ne mutumibwa Petelo, tubwanya kumona buno bukōkekōke bubidi—kimfwa kubulwa kwīfula ne kityino kya bantu.
11 Mulopwe Davida wālombwele bukōkekōke bwa kubulwa kwīfula, enka mokyāmwekele mu bilongwa byandi na Bafesheba. Kadi kitatyi kyaātukilwe na Nabalu, Davida wāswile kulonga bintu na kansontomokela. Bine, wākomenwe kwīfula, ino kālekelepo nansha dimo kulonga bukomo bwa kulomba Yehova. Wābwenye kwaluja bukomo bwa ku mushipiditu kupityila ku bukwashi bwa bakwabo.—1 Sam. 25:5-13, 32, 33; 2 Sam. 12:1-13.
12. Le Petelo wāshele nyeke namani mu lubilo nansha byaādi ukukala?
12 Petelo wātyinine bantu, kyaba kimo wākukele bibi; ino wāshele nyeke na kikōkeji kudi Yesu ne kudi Yehova. Kimfwa, wātunine Mfumwandi kumeso a bantu, ke musunsa umopo, ino misunsa isatu. (Luka 22:54-62) Mwenda mafuku, Petelo wakomenwa kulonga bintu pamo bwa mwine Kidishitu, wamona Bajentaila betabije bu kebadipo pamo na Bayuda bene Kidishitu batwejibwe kwisao. Inoko, mutumibwa Polo wāmwene uno mwanda biyampe—kwisañuna mungya bitenta kekwādipo na kya kyaba mu kipwilo. Mumweno wa Petelo wādi mubi. Kumeso kwa mwiendelejo wa Petelo kona bubana na bana, Polo wādingile Petelo kiponka na ponka, mpala na mpala. (Ngat. 2:11-14) Le Petelo wātapilwe ku mutyima na mitatulo, waleka’byo kunyema lubilo lwa kumona būmi? Mhm. Wālondele na katentekeji madingi a Polo, waingidija’o ne kushala nyeke mu lubilo.
13. Le bukōkekōke bwa ngitu bubwanya kwitukukaja namani?
13 Kyaba kimo bukōkekōke bwa muntu i misongo. Buno bukōkekōke nabo bubwanya kwikala bu kikukaja. Bukokeja kwitulengeja tukomenwe kunyema ku mushipiditu ne kwitulengeja tulumbakane ne kukōka. Kimfwa, kaka umo mwine Jampani wāsusukile na misongo mikomo myaka 17 pa kupwa kubatyijibwa. Wata mutyima bininge ku bukomo bwandi bwa ngitu kufika’nka ne byaākokele ku mushipiditu. Kyaba kimo waikala musapudi kakingilanga. Bakulumpe babidi bakamupempula. Pa kukankamikwa na binenwa byabo bya kanye, washilula monka kupwila. Unena’mba, “impolo yāunsumine mwanda wa banabetu bāñimwine na kyanga.” Pano kaka wetu i mujokele mu lubilo.
14, 15. Le i bika byotufwaninwe kulonga kitatyi kyotulwa na bilokoloko bibi? Leta kimfwa.
14 Bilokoloko bya ngitu ke bikukaje bavule. Kitatyi kyotutompibwa na bino bilokoloko, tufwaninwe kulonga bukomo bwa kwikala batōka mu ñeni, mu mwikadilo ne ku mushipiditu. Tuvulukei madingi a Yesu a ‘kwela’ mu buluji bwa kyelekejo kintu kyo-kyonso kibwanya kwitukukaja, ekale diso dyetu nansha kuboko kwetu. Lelo mu bino kemubadilwapo milangwe ya busekese ne bilongwa byālengeje bantu bamo basāsuke mu lubilo?—Tanga Mateo 5:29, 30.
15 Tutu umo wātamine mu kisaka kya bwine Kidishitu wāsonekele amba, kitatyi kyonso kyaādi uvuluka, wādi ulwa na bilokoloko bya kusambakena pamo kwa bantu ba ngitu imo. Unena amba: “Nadi nyeke neivwana bibi. Bimweka’mba nākomenwe kwimona bu mufwaninwe.” Aye pa kubwanya myaka 20, waikala ke pania wa lonso ne bu mwingidi wa mingilo pa kipwilo. Kupwa wakukala bibi, wapebwa madingi a mu Bisonekwa ne kukwashibwa na bakulumpe. Wāimene ne kushilula monka lubilo lwandi lwa ku mushipiditu kupityila ku milombelo, ku kwifunda Kinenwa kya Leza ne ku kukwashibwa na bakwabo. Wāitabije myaka mivule pa kupita’po amba: “Kyaba kimo ino milangwe ingiyanga mu ñeni, ino nkiilekangapo intādile. Nēfundile’mba, Yehova kakakulekapo utompibwe na bintu byokubwanyapo kunekenya. O mwanda nkulupile amba, mbwanya kwikala na milangwe ya Leza.” Uno tutu ufudija amba: “Makambakano onso onaūminine akapwa mu ntanda mipya. Nsakanga apwe! Tamba dyalelo, nkendelela kulwa.” I musumininwe kushala nyeke mu lubilo.
16, 17. (a) Le i bika byakweshe tutu umo wāmwene bu i bamulongele bintu na bukondame? (b) Pa kwepuka kukukala, le tufwaninwe kuta mutyima ku bika?
16 Bukondame bwa banabetu mu lwitabijo bubwanya kwikala bu kikukaja. Mukulumpe wa kala wa mu Franse, wāmwene amba i bamulongele bintu na bukondame, wafitwa bininge. Mfulo mfulō, waleka’byo kupwila ne kusapula kwine. Bakulumpe babidi bakamupempula ne kumwivwana na buswe, pampikwa kumuketa pa sekununa mānga yandi mwaadi wiimwena. Bamukankamika ele kiselwa kyandi padi Yehova ne kumulombola amba, kintu kya mvubu kutabuka i kusangaja Leza. Waitabija ne kwija mpika wajokela mu lubilo ne kushilula kwingila monka mingilo ya kipwilo.
17 Bene Kidishitu bonso basakilwa kuta mutyima kudi Yesu Kidishitu, Mutwe wa kipwilo utongelwe, ke ku bantupo ba kubulwa kubwaninina. Yesu, wa meso ‘adi’nka bwa lubimbi lwa mudilo,’ umonanga biyampe kintu kyo-kyonso kutabuka motubwanya kwikimwena. (Kus. 1:13-16) Kimfwa, uyukile amba bintu bibwanya kumweka bu bukondame bobetulongela, bibwanya kwikala padi i batwe bene bebimona bibi nansha kubulwa kwibivwanika biyampe. Yesu ukavuija bisakibwa bya kipwilo mu muswelo mubwaninine kadi mu kitatyi kifwaninwe. Nanshi, ketufwaninwepo kuleka bilongwa nansha butyibi bwa mwanetu yense mwine Kidishitu bikale bu kikukaja kotudi.
18. Le i muswelo’ka otubwanya kunekenya matompo nansha ngikadilo mibi?
18 Bikukaja bibidi bikwabo i byamalwa nansha kupangwapangwa ne kubulwa kubwaninina kwa bakwetu mu kipwilo. Mu lukindi lwandi lwa mukushi, Yesu wānene amba ‘byamalwa nansha kupangwapangwa’ pa mwanda wa Leza byādi bya kukukaja bantu bamo. Ekale shi kuno kupangwapangwa kutamba—ku kisaka, balondakani, nansha ku balupusa—kubwanya kwikala na lupusa pa muntu ‘wakubulwa miji,’ wampikwa kupya ku mushipiditu. (Mat. 13:21) Inoko, shi tulame ngikadilo myoloke ya mutyima, nkunwa ya Bulopwe ikatama biyampe ne kwala miji mu lwitabijo lwetu. Kitatyi kyotutanwa na matompo, tulongei bukomo bwa kulangulukila pa bintu bya kutendelwa ne milombelo ponka. (Tanga Fidipai 4:6-9.) Na bukomo bwa Yehova, tukanekenya matompo, ne kubulwa kuleka ngikadilo mibi ikala bu kikukaja.
19. Le i muswelo’ka otubwanya kukankaja kilubo kileke kwikala bu kijika?
19 I kya bulanda, mwanda bantu bamo i baleke mu bula bwa myaka mivule kubulwa kubwaninina kwa bakwabo kwibasasukija mu lubilo. Kwikala na mumweno mwishile mu myanda itala mutyima wa mundamunda kekudi bu kikukaja kobadi. (1 Kod. 8:12, 13) Shi muntu wetulubila, le tukaleka kino kikale ke mwanda mukatampe? Bible usoñanya bene Kidishitu kuleka kutyibila bakwabo mambo, kulekela bakwabo, ne kubulwa kusaka bintu bilongeke enka musakila muntu. (Luka 6:37) Shi ubakukala mu dibwe dikukaja, wiipangule amba: ‘Le ntyibilanga bakwetu mambo na bukondame kukwatañana na byonsakanga? Byondyukile’mba banabetu i bampikwa kubwaninina, le nkaleka kubulwa kubwaninina kwa muntu nkusasukije mu lubilo lwa kumona būmi?’ Buswe botuswele Yehova bukokeja kwitukwasha tusumininwe kubulwa kuleka kintu kyo-kyonso kilonga muntu kitukankaje kutabuka mushiko wa mfulo.
NYEMA LUBILO NA KŪMININA —TYINA KUKUKALA
20, 21. Le ubasumininwa kulonga bika mu lubilo lwa kumona būmi?
20 Le wi musumininwe ‘kufika ne pa mfulo pa lubilo’? (2 Tem. 4:7, 8) Nabya ufwaninwe kulonga kifundwa kya pa kasuku. Ingidija Bible ne mabuku esambila pa Bible mwanda wa kulonga bukimbi, kulanguluka, ne kujingulula bintu bibwanya kukukukaja. Lomba mushipiditu sandu ukupe bukomo bosakilwa. Vuluka’mba, kekudipo munyemi unenwe kukankalwa kunyema lubilo lwa kukamona būmi mwanda’tu wa kukukala nansha kupona kyaba kimo. Ukokeja kulanguka kaendelela na lubilo. Ubwanya’nka ne kwingidija mabwe a kukukaja bu mabwe a kutyampa’po ne kuboila ñeni ku bikoleja byonso bya mu lwitabijo lwandi.
21 Bible ulombola kunyema lubilo lwa kumona būmi bu lubilo lunyemwa dyalelo, ke lwa pa kalapo. Kebidipo pamo bwa kukanda mu motoka uselela bantu kobenda. Tufwaninwe kunyema lubilo lwa kumona būmi batwe bene. Shi tulonge namino, “ndoe mikatakata” itamba kudi Yehova ikekala bwa luvula lwitutonona panyuma. (Mit. 119:165) Tukokeja kukulupila mu madyese andi a endaenda tamba’nka pano ne mu madyese ampikwa mfulo akapebwa bonso bafikija lubilo ne pa mfulo.—Yak. 1:12.
[Kifwatulo pa paje 3]
[Kifwatulo pa paje 4]
Shi ubapone, itabija bukwashi ne kulanguka monka!
[Kifwatulo pa paje 7]
Kokaleka kintu nansha kimo kikukankaje kuvuya lubilo lobe!