MUTWE WA MWANDA WA PA KIBALU: BIBWANIKA KWIKALA NA BŪMI BUDI NA KITUNGO
Le Bine Bibwanika Kwikala na Būmi Budi na Kitungo?
“Bungi bwa myaka ya būmi bwetu i—makumi asamba-abidi, ku boba bakomo myaka makumi mwānda, ino mudi’nka masusu ne makambakano.”—Mitōto 90:10, Dibuku Dijila.
BINE bino binenwa i bya bine! Būmi mu ino ntanda i buyule “masusu ne makambakano.” Padi kodi mwiipangule amba, ‘le bibwanika bine kwikala na būmi budi na kitungo dyalelo?’
Tala kimfwa kya Maria. Wādi nyeke nkanka, ino pano pakadi na myaka 84, kashikete kijabanda ku njibo. Ñeni yandi ikingila, ino ngitu yandi imweka bu ke mikōke. Le uno lolo ubwanya kumona’mba būmi bwa uno muswelo budi na kitungo?
Le abe nobe? Padi kodi mwipangule kyaba kimo shi būmi bobe budi na kitungo. Mwingilo obe ubwanya kwikala wa kitatyi ne kitatyi, upungija kadi usansa. Padi bukomo bobe ne mwingilo obe kebibwanyapo kumonwa. Nansha shi wanekenye mu ludingo kampanda, ubwanya kumona bu kudipo na mutyima-ntenke pa mwanda utala būmi bobe bwa kumeso. Kyaba kimo ubwanya kwimona bu udi bunka nansha kutyumukwa mutyima. Mu būmi bwa kyobe kisaka mubwanya kwikala kubulwa kumvwañana ne bulwi. Padi kodi mufwilwe muntu osenswe. Muntu umo witwa bu André wādi ulamete shandi bininge, mwine wābelele mu kitulumukila ne kufwa wafwa. Kino kyādi kyaso kikatampe kudi André, kadi kikomo kunekenya.
Nansha shi tubatanwa na masusu a muswelo’ka, kudi kintu kyotufwaninwe kukimba kuyuka ne mipepeketo: Le bine bibwanika kwikala na būmi budi na kitungo? Tubwanya kutana malondololo kupityila ku būmi bwa muntu wāikele’ko pano pa ntanda pano ke padi kintu kya myaka 2000—ke Yesu Kidishitu kadi. Nansha byaālwile na bikoleja bya miswelo yonso, Yesu wādi bine na būmi budi na kitungo. Nanshi tubwanya kwikala na buno būmi shi tulonde kimfwa kyandi.
[Kifwatulo pa paje 3]