Le Bimpengele bya Kipangila Bilombola’mba Leza I Ntapani?

BINENANGA BANTU BAMO: “Leza uludikanga ntanda, i aye ulengeja bimpengele bya kipangila; nanshi i ntapani.”

BYOBYA BINENA BIBLE: “Panopantanda ponsololo pēne palēle mudi yewa umbi.” (1 Yoano 5:19) Le “yewa umbi” i ani? Bible umutela bu Satana. (Mateo 13:19; Mako 4:15) Lelo i bubela? Langulukila pa uno mwanda: Shi ntanda idi mu lupusa lwa Satana, nanshi i aye utonona bantu bekale na kwisakila, makomwa-meso ne mumweno mwīpi pamo bwa aye. Lelo kino kekitukwashapo tushintulule mwanda waka bantu bonakanyanga kifuko kyabo kya pano panshi? Bashayuka bavule badyumunanga’mba konakanya kifuko kutuntwilanga ku bimpengele bya kipangila, enka ne kwibilengeja, kwibibipija bininge nansha kulengeja bantu baponenwe nabyo.

Penepa, mwanda waka Leza ulekele Satana ekale na lupusa luvule nenki? Pa kulondolola, tujokelei bidi mu mānga ya muzo wa muntu, tamba kitatyi kyātombokēle bambutwile betu babajinji Leza Muludiki wabo? Tamba penepa bantu bavule bālondele uno mwikadilo wa butomboki. Buno butyibi—bwa kupela buludiki bwa Leza—bwatūdile ntanda ya bantu mu lupusa lwa Satana wa lwana na Leza. Yesu wātelele Satana bu “mwine panopantanda.” (Yoano 14:30) Le Satana ukaludika nyeke? Mhm!

Yehovaa uteñwanga na masusu alengeja Satana. Bine, Leza uteñwanga bininge na masusu a bantu. Kimfwa, pa mwanda utala bitatyi bibi byātenwe’mo muzo wa Isalela, Bible unena padi Leza amba: “Ebiyampe mu disusu dyabo dyonsololo aye wasusulwa.” (Isaya 63:9) Leza wa lusa, i mukwate’ko mpangiko ya kufudija panopano ponka buludiki bwa Satana bwa butapani! Wātongele Yesu Kidishitu wandi Mwana, ekale nyeke Mulopwe moloke.

MOTADILWA NA UNO MWANDA: Buludiki bwa Yesu bukakinga bantu ku bimpengele bya kipangila nansha bikomenwe buludiki bwa Satana kwibakinga. Yesu wākingile bandi bana ba bwanga ku kivula kikatakata. Nsekununi ya mu Bible inena amba: “[Wakanda] luvula, ebiya wanena mema nao amba: Ish! Talala nya-ā! Ponkapo luvula lwalāla ke padi talala, nya-ā!” Penepo bana ba bwanga kebanena amba: “Le ani le uno nandi, udi’tu, luvula ne mema nabyo bimukōkela’tu namino?” (Mako 4:37-41) Kino kintu kitukulupija’mba, Yesu ukakinga bantu bonso ba kikōkeji kitatyi kyakaludika bu Mulopwe.—Danyele 7:13, 14.

[Kunshi kwa dyani]

[Kifwatulo pa paje 4]

Leza wāpele wandi Mwana bukomo bwa kupwa bimpengele bya kipangila