Ingidila Yehova Kumeso kwa Mafuku Mabi Kufika

1, 2. (a) Le i madingi’ka a ku bukomo bwa mushipiditu āsonekele Solomone ku bankasampe? (b) Mwanda waka madingi a Solomone atala ne bene Kidishitu badi na myaka 50 ne kupita pamo ne banunu?

MULOPWE SOLOMONE wānene bankasampe bino binenwa bya ku bukomo bwa mushipiditu amba: “Vuluka Umpangi obe mu mafuku obe pokidi nkasampe, mafuku mabi po keafikile.” Lelo “mafuku mabi” i mafuku’ka? Solomone wāingidije muneneno wa kusāsula mwanda wa kulombola mafuku mabi a mu bununu​—kutetema kwa makasa, kulemba kwa maulu, kukonkokwa meno mu kanwa, kubulwa kumona biyampe, kubulwa kwivwana biyampe, mvwi ku mutwe, ne kukonyangala kwa ngitu. I kutupu muntu nansha umo usakanga bino bintu bimufikile mu būmi kumeso kwa kushilula kwingidila Yehova.​—Tanga Musapudi 12:1-5.

² Bene Kidishitu bavule badi na myaka 50 ne kupita bakidi na bukomo. Babwanya kwikala na mvwi, inoko kwampikwa padi kwikala na būmi bwa misongosongo butelelwe na Solomone. Le bano bene Kidishitu banunu babwanya kumwena mu madingi a ku bukomo bwa mushipiditu apelwe bankasampe a amba: “Vuluka Umpangi obe”? Lelo ano madingi ashintulula bika?

3. Lelo kuvuluka Umpangi wetu Mukatampe kwitulomba kulonga bika?

³ Nansha shi ketudi padi bengidile Yehova myaka mivule, i biyampe kwimana kyaba kimo ne kulangulukila na nsangaji pa bukatampe bwa Umpangi wetu. Lelo būmi kebulengapo luzakalo? Bantu i bakomenwe kwivwanija kitungo kya būmi. Mpango ya Yehova i mishileshile, kadi itukwasha twikale na mikenga mivule ya kusangela būmi. Kitatyi kyotubandilanga bupangi bwa Yehova, tusangelanga monka buswe bwandi, tunangu ne bukomo bwandi. (Ñim. 143:5) Inoko, kuvuluka Umpangi wetu mukatampe kwitulomba ne kulangulukila pa biselwa byaetupele. Mu bino bitatyi bya kulanguluka, tusumininwanga bya binebine kulombola kufwija’ko kotufwija’ko Umpangi wetu na kumwingidila ne pa mfulo pano potukidi bōmi.​—Mus. 12:13.

MIKENGA YA PA BULA IDI NA BANUNU

4. Le i kipangujo’ka kibwanya kwiipangula bene Kidishitu ba bwino bwa ntamba kala ne mwanda waka?

⁴ Shi kodi mukulumpe wa bwino bwa tamba myaka makumi na makumi, ukokeja kwiipangula kino kipangujo kikatampe’mba, ‘le i bika byonsa kulonga mu bwami būmi pano ponakidi na bukomo ne buninge?’ Byodi mwine Kidishitu wa bwino, udi na mikenga keidipo na bantu bakwabo. Ubwanya kusambulwila bankasampe byobya byowifundile padi Yehova. Ubwanya kukankamika bakwenu na kusekununa myanda mimweke yowemwenine mu kwingidila Leza. Mulopwe Davida wālombele mikenga ya kulonga namino. Wāsonekele amba: “Abe Leza, wanombwele ñeni ne ku bwanuke bwami; . . . Eyo, i binebine, pa kununupa ne mvwi ku mutwe, abe Leza, kokandekelela; poso’mba, mpwe kusapula bidi bukomo bobe ku lukongo lukwabo lwiyako.”​—Ñim. 71:17, 18.

5. Le bene Kidishitu batame babwanya kusambulwila bakwabo byobefundile namani?

⁵ Le i muswelo’ka obwanya kuyukanya tunangu towatambwile mu myaka mivule? Ubulwe’po kwita bengidi ba Leza bankasampe ku yobe njibo mwanda wa kutamija kipwano? Ubulwe’po kwibanena mwende nabo mu mwingilo wa bwine Kidishitu ne kwibalombola nsangaji yowimwenine mu kwingidila Yehova? Edihu wa pa kala wānene amba: “Mafuku akesambanga, myaka ya ntanda ne ntanda ikalombola ñeni.” (Yoba 32:7) Mutumibwa Polo wāsoñenye bana-bakaji bene Kidishitu ba bwino bakankamike bakwabo na binenwa ne na kuleta kimfwa. Wāsonekele amba: “Bana-bakaji batame bekale . . . bafundiji ba bintu biyampe.”​—Tet. 2:3.

BANDAULA BUKOMO BOBE BWA KUKWASHA BAKWABO

6. Mwanda waka bene Kidishitu badi na bwino bwa tamba makumi a myaka, kebafwaninwepo kupēlula bukomo bwabo?

⁶ Shi wi mwine Kidishitu wa bwino, udi na bukomo bukatampe. Langulukila pa bintu byoivwana pano, ino byokwadipo uyukile myaka 30 nansha 40 kunyuma. Ubwanya kwingidija na bwino misoñanya ya mu Bible mu bobe būmi. Na bubine udi na bukomo bwa kutenga mityima ya bakwenu na bubinebine bwa mu Bible. Shi wi mukulumpe, uyukile muswelo wa kukwasha banabetu basāsuka. (Ngt. 6:1) Padi wefundile muswelo wa kutala mingilo ya pa kipwilo, mingilo ya ku kitango, nansha lūbako lwa Njibo ya Bulopwe. Ubwanya padi kuyuka muswelo wa kukwasha bañanga bengidije mundapilo mukwabo pa kyaba kya kwela mashi. Nansha shi wefundile bubinebine panopano, udi na bwino bwa kamweno mu būmi. Kimfwa, shi ulelele bana, ukekala na tunangu tuvule. Bene Kidishitu banunu i nsulo ya bukomo ne bukankamane ku bantu ba Yehova kupityila ku kufundija, kuludika, ne kukankamika batutu ne bakaka.​—Tanga Yoba 12:12.

7. Le banunu bene Kidishitu babwanya kufundija bankasampe bufundiji’ka bwa kamweno?

⁷ Le i muswelo’ka obwanya kwingidija bukomo bobe ne pa mfulo? Padi ubwanya kulombola bankasampe muswelo wa kushilula ne kwendeja bifundwa bya Bible. Shi wi kaka, ubulwe’po kulombola bainabana bankasampe muswelo obabwanya kwendeleja mingilo ya ku mushipiditu koku balelele bana batyetye? Shi wi tutu, ubulwe’po kufundija batutu bankasampe mwa kunenena mīsambo na buzanzamuke ne mwa kwikadila basapudi bayampe ba myanda miyampe? Ubulwe’po kwibalombola muswelo opempulanga batutu ne bakaka banunu mwanda wa kwibakankamika ku mushipiditu? Nansha shi kudipo na bukomo bwa ngitu na bowādi nabo, udi na mikenga miyampe ya kufundija bankasampe. Kinenwa kya Leza kinena amba: “Ntumbo ya bansogwalume i bukomo bwabo: Kabidi būya bwa banunu bana-balume i mvwi pa mutwe.”​—Nki. 20:29.

KWINGIDILA KOKWA KUSAKILWA BASAPUDI BAVULE

8. Le i bika byālongele mutumibwa Polo mu bununu bwandi?

⁸ Mutumibwa Polo wāingidije bukomo bwandi bonso mwanda wa kwingidila Leza mu bununu bwandi. Kitatyi kyaākutulwilwe mu kifungo mu Loma mu 61 K.K., wāūminine myaka mivule mu mwingilo wa bu mishonele, ne kubwanya kusapula mu Loma. (2 Ko. 11:23-27) Banabetu mu kino kibundi kikatampe kebābudilwepo kumona na mvubu kukwatakanya kwaādi ukwatakenye busapudi. Ino Polo wāmwene amba bibundi bikwabo bisakilwa basapudi bavule. Washilula mwingilo wandi wa bu mishonele na Temote ne Tetusa, baenda ku Efisesa, kupwa ke ku Kelete, ne padi ku Masedonya. (1 Tm. 1:3; Tet. 1:5) Ketuyukilepo shi wāendele ne ku Eshipanye, ino wādi usaka kwenda’ko.​—Loma 15:24, 28.

9. Le Petelo wavilukile kukengidila kokwa kusakilwa basapudi bavule kitatyi’ka? (Tala kifwatulo kidi ku ngalwilo.)

⁹ Mutumibwa Petelo wādi padi na myaka 50 ne kupita kitatyi kyaāendele kokwa kwādi kusakilwa basapudi bavule. Mwanda waka bibwanya kwikala bya bine? Shi wādi na myaka na yādi na Yesu nansha padi mumukudile, wādi ubwanya kwikala na myaka kintu kya 50 kitatyi kyaētene na batumibwa bakwabo mu Yelusalema mu mwaka wa 49 K.K. (Bil. 15:7) Kyaba kimo pa kupwa kwa kuno kwitana, Petelo wāendele kukashikata ku Babiloni, mwanda wa kukasapwila Bayuda bavule bādi’ko. (Ngt. 2:9) Wādi ushikete mu kino kibundi kitatyi kyaāsonekele mukanda wandi mubajinji wa ku bukomo bwa mushipiditu mu 62 K.K. (1 Pe. 5:13) Kwenda ku ntanda ya bweni kubwanya kwikala kukomo, ino Petelo kālekelepo bununu bwandi bumubudije nsangaji ya kwingidila Yehova ne pa mfulo.

10, 11. Sekununa mwanda mumweke wa muntu mununu wavilukile mwanda wa kwingila kokwa kusakilwa basapudi bavule.

¹⁰ Dyalelo nadyo bene Kidishitu bavule badi na myaka 50 ne kupita pamo ne banunu bamwene’mba, ngikadilo yobadi’mo idi na bikoleja ne amba babwanya kwingidila Yehova mu miswelo mikwabo. Bamo bavilukīle kokwa kusakilwa basapudi bavule. Kimfwa, Robert usoneka amba: “Ami ne wami mukaji twādi na myaka 55 potwāyukile mikenga yādi kumeso etu. Mwanda mwana umo otwādi nandi kākidipo ku njibo, ketwākidipo monka bambutwile banunu basakilwa kulelwa, kadi bētupele bupyani butyetye. Napikula’mba kupoteja yetu njibo kuketukwasha tufutyile njibo mikwabo ne kuvuija bisakibwa byetu kufika ne ponkatambula mfutwa yami ya pasho. Twaivwana’mba mu Bolivi bantu bavule betabijanga kwifunda Bible, ne amba bei ya bidibwa i mitūke. Ebiya twakwata butyibi bwa kuvilukila’ko. Byadi bikomo kwibidila ku kino kibundi kipya. Bintu byonso byadi bishile na byotwadi twibidile mu Amerika wa Kungala. Ino bukomo bwetu bwaeselwe bya binebine.”

¹¹ Robert ubweja’ko amba: “Būmi bwetu bonso bwimanine pano pa mingilo ya kipwilo. Bantu bamo botwefundile nabo Bible babatyijibwe. Kisaka kimo kyotwadi twifunda nakyo kyadi na būmi buyayate mu kibundi kidi kulampe bininge. Ino yenga ne yenga, bantu ba mu kino kisaka badi benda lwendo lwa makambakano ku kibundi kikatampe mwanda wa kukapwila. Le ubwanya kufwatakanya nsangaji yotwikalanga nayo pa kumona kino kisaka kyendelela, ne kumona banunu bana-balume bengila mwingilo wa bupania?”

BISAKIBWA BYA MU MWABA WA LUDIMI LWENI

12, 13. Sekununa mwanda mumweke wa mwine Kidishitu washilwile kwingidila Yehova mu miswelo mikwabo pa kupwa kupebwa pasho.

¹² Bipwilo ne bisumpi bya ndimi myeni bibwanya kumwena bininge mu kimfwa kya batutu ne bakaka banunu. Kadi, mwaba wa uno muswelo ukokeja kwikala wa nsangaji kwingidila’mo. Kimfwa, Brian usoneka amba: “Ami ne wami mukaji twadi talala nyā mu būmi kitatyi kyonatambwile pasho wa myaka 65 mu Belejike. Betu bana batalukile ku njibo, kadi ketwadipo tuvudile kutana bantu basangela musapu ba kwifunda nabo Bible. Penepa twetana na nsongwalume umo mwine Shine wādi ulonga bukimbi ku inivelesite ya mu kibundi. Waitabija kwiya kutanwa ku kupwila, kupwa twashilula kwifunda nandi Bible. Mayenga matyetye pa kupita’po, washilula kwiya na Shinwa mukwabo wa ku masomo. Mayenga abidi pa kupita’po, wasela wa busatu, ne wa buná.

¹³ “Kitatyi kyalombele shinwa wa butano wadi ulonga bukimbi amba twifunde nandi Bible, nalangile’mba, ‘nkibwanyapo kuleka mwingilo wa Yehova mwanda’tu wa myaka 65 yonkendi nayo.’ Ebiya naipangula wami mukaji onkudile myaka ibidi, shi ubwanya kwifunda Kishinwa. Twadi tuvudile kwifundila ku mawi makwatwe kala. Pano ke papite myaka dikumi. Kusapula mu mwaba wa ludimi lweni kwetulengeje twimone bu bankasampe monka. Mwenda mafuku, twefunda Bible na Bashinwa 112! Bavule mu bukata mwabo badi batanwa ku kupwila. Umo mobadi wingilanga netu pano bu pania.”

SANGELA KULONGA BYOBYA BYOBWANYA

14. Le banunu bene Kidishitu babwanya kusangela bika, ne Polo i kimfwa kikankamika kobadi namani?

¹⁴ Nansha bene Kidishitu bavule ba myaka 50 ne kupita byobadi na mikenga ya kulonga bintu bipya mu mwingilo wa Yehova, ino ke bonsopo babwanya kwibilonga. Bamo mu bukata mwabo badi na misongo, bakwabo nabo balelele bambutwile babo ke banunu nansha bana ba bulelwa. Ubwanya kusangala pa kuyuka’mba, Yehova usangedile kintu kyo-kyonso kyolonga mu mwingilo wandi. O mwanda pa kyaba kya kuvutakanibwa na byobya byokubwanyapo kulonga, sangela byobya byobwanya kulonga. Langulukila pa kimfwa kya mutumibwa Polo. Wādi mu kifungo mu bula bwa myaka, mukomenwe kwenda ñendo yandi ya bu mishonele. Ino kitatyi kyādi kikamupempula bantu, wādi wisambila nabo pa Bisonekwa ne kwibakomeja mu lwitabijo.​—Bil. 28:16, 30, 31.

15. Mwanda waka banunu bene Kidishitu badi na mvubu mpata?

¹⁵ Yehova nandi usangelanga bintu bikokeja kulonga banunu mu mwingilo wandi. Nansha Solomone byaālombwele patōka’mba mafuku mabi a kubelabela ke mafukupo mayampe mu būmi, Yehova umonanga na mvubu byobya bibwanya kulonga banunu bene Kidishitu mwanda wa kutumutumbija. (Luka 21:2-4) Bipwilo bisangelanga kimfwa kya bengidi ba tamba kala badi mu bukata mwabo.

16. Le i madyese’ka keābwenyepo padi kwikala na Ana, ino wālongele bika pa kutōta Leza?

¹⁶ Bible unena’mba mununu umo mwana-mukaji witwa bu Ana wādi utōta nyeke Yehova na kikōkeji mu bununu bwandi. Wādi wakishala wa myaka 84 kitatyi kyābutwilwe Yesu. Mobimwekela, kākidipo na būmi bulampe mwa kwikadila mulondi wa Yesu, kushingwa māni a mushipiditu sandu, nansha kusapula myanda miyampe ya Bulopwe. Inoko, wālongele byobya byaādi ubwanya kulonga. “Kadipo ubulwanga nansha dimo ku tempelo, wadi wingila mingilo ikola bufuku ne dyuba.” (Luka 2:36, 37) Kitatyi kyādi mupidishitu usōka ensense mu tempelo lubanga ne kyolwa kyonso, Ana wādi mu kibumbo kya bantu bādi mu kipango ulombela mundamunda padi mu kipindi kya nsá. Aye pa kumona Yesu mwana wa lukeke, washilula “kunena pa mwanda wa mwana’wa ku bonso badi batengele kunyongololwa kwa Yelusalema.”​—Luka 2:38.

17. Le tubwanya kukwasha bene Kidishitu banunu ne balemane namani bakwatakanye mutōtelo wa bine?

¹⁷ Dyalelo, tufwaninwe kuta mutyima ku kukwasha banunu nansha bene Kidishitu balemane. Bamo basenswe kwenda ku kupwila kwa pa kipwilo ne ku bitango kebabwanyapo padi kulonga namino. Mu bifuko bimo, bipwilo bitulanga’ko mpangiko na buswe amba bano banunu balondele kupwila ku telefone. Mu bifuko bikwabo namo, kebibwanikapo kulonga namino. Nansha nabya, bene Kidishitu kebabwanyapo kutanwa ku kupwila bakokeja kukwatakanya mutōtelo wa bine. Kimfwa, milombelo yabo ikwashanga mwanda wa kipwilo kya bwine Kidishitu kikale biyampe.​—Tanga Mitōto 92:13, 14.

18, 19. (a) Mwanda waka bene Kidishitu banunu kebabwanyapo kuyuka muswelo obakankamika bakwabo? (b) Le i ani ubwanya kulonda madingi a amba: “Vuluka Umpangi obe”?

¹⁸ Bene Kidishitu banunu kebabwanyapo padi kuyuka muswelo obakankamika bakwabo. Kimfwa, nansha Ana byaādi wenda nyeke ku tempelo mu ino myaka yonso, kādipo padi uyukile’mba kimfwa kyandi kikakankamika bakwabo myaka tutwa pa kupita’po. Buswe bwa Ana bwaādi usenswe Yehova bwāsonekelwe mu Bisonekwa. Na bubine, buswe boswele Leza i busonekwe mu mityima ya batōtyi-nobe. Ke kya kutulumukapo shi kinenwa kya Leza kinena amba: “Mutwe wa mvwi i kilongo kya ntumbo, ukatanwa mu dishinda dya boloke”!​—Nki. 16:31.

¹⁹ Batwe bonso tudi na mikalo mu byobya byotubwanya kulonga mu mwingilo wa Yehova. Inoko, boba bakidi na bukomo mu bukata mwetu balame mu mutyima bino binenwa bya ku bukomo bwa mushipiditu bya amba: “Vuluka Umpangi obe . . . mafuku mabi po keafikile.”​—Mus. 12:1.