Malondololo Ku Bipangujo Bimanine Pa Bible

Mwanda Waka Tufwaninwe Kulombela?

Yehova Leza usakanga tumulombole kitatyi ne kitatyi myanda yetu na bwanapabo. (Luka 18:1-7) Wivwanga mwanda witutele mutyima. Penepa shi Tata wetu wa mūlu witwita tulombele kwadi, le tubulwe’po kwitaba ku lwito lwandi?—Tanga Fidipai 4:6.

Kulombela ke muswelopo’tu wa kulomba bukwashi. Ino, kulombela kwitukwashanga tufwene kudi Leza. (Nimbo 8:3, 4) Shi tulombola Leza milangwe yetu kitatyi ne kitatyi, tukatamija kipwano kya mpwaninine kyotupwene nandi.—Tanga Yakoba 4:8.

Le Tufwaninwe Kulombela Namani?

Kitatyi kyotulombela, Leza ketusakilangapo kwingidija bishima bya kutulumuna bantu nansha kupituluka mu milombelo mikwatyile pa mutwe. Kadi ketunenwepo kwimana mu muswelo wa pa bula. Yehova witwita tulombe milombelo itamba ku mutyima. (Mateo 6:7) Kimfwa, mu Isalela wa kala, Hana wālombele pa mwanda wa makambakano a mu kisaka. Mwenda mafuku, misanshi yandi pa kwalamuka ke nsangaji, wāfwijije’ko Leza mu milombelo itamba ku mutyima.—Tanga 1 Samwele 1:10, 12, 13, 26, 27; 2:1.

Bine, dino i dyese dya kutendelwa dyotudi nadyo! Tubwanya kufwena Yehova na myanda yetu. Kadi tubwanya kumutumbija ne kumufwija pa bintu byalonga. Na bubine, ketufwaninwepo kwilwa dino dyese dilēme.—Tanga Ñimbo 145:14-16.