MALONDOLOLO KU BIPANGUJO BIMANINE PA BIBLE

Mwanda waka Tufwaninwe kulomba Bulopwe bwa Leza bwiye?

Bulopwe bwa Leza i umbikalo wa momwa mūlu. Yesu wālombwele balondi bandi bebulombe bwiye mwanda bukajokeja boloke ne ndoe pano pa ntanda. Kekudipo umbikalo wa muntu ukokeja kutalula’ko lonso bupolapola, bukondame nansha misongo, ino Bulopwe bwa Leza bukokeja kadi bukatalula’byo. Leza wātongele Yesu wandi Mwana, ekale Mulopwe wa buno Bulopwe. Kadi Yehova i mutonge kisumpi kya balondi ba Yesu bu bakubikala na Yesu mu Bulopwe.—Tanga Luka 11:2; 22:28-30.

Panopano ponka, Bulopwe bwa Leza busa kutalula’ko bonso balwa na buludiki bwa Leza. Nanshi kulomba Bulopwe bwa Leza bwiye i kulomba umbikalo wa Leza upingakene pa imbikalo yonso ya bantu.—Tanga Danyele 7:13, 14; Kusokwelwa 11:15, 18.

Mwanda waka bantu bakamwena mu Bulopwe bwa Leza?

Yesu i Mulopwe mufwaninwe mwanda i wa lusa. Byadi Mwanā Leza, udi ne na lupusa lwa kukwasha bonso babija Leza ebakwashe.—Tanga Ñimbo 72:8, 12-14.

Boba bonso balomba pampikwa budimbidimbi Bulopwe bwa Leza bwiye ne bonso beendeja kukwatañana na kiswa-mutyima kya Leza, bakamwena’mo. Kukealakanyapo nansha dimo pa kwifunda byobya binena Bible pa Bulopwe bwa Leza.—Tanga Luka 18:16, 17; Yoano 4:23.