Le Uloñanga Byobya Bisaka Leza?

“Shi kudi kintu kyo-kyonso kyosaka abe’tu i kundyukija, nami nkalongela monka.” Padi ubwanya kwikaka kunena namino ku yewa muntu okuyukilepo senene nansha mweni. Inoko, ubwanya kunena bino binenwa pakubulwa mwanda ku mulunda nobe wa pa mutyima. Balunda ba pabwipi belongelanga bintu byobelomba pakubulwa kuningilwa.

Bible ulombola’mba Yehova uloñanga nyeke bintu byayukile’mba bikasangaja batōtyi bandi. Kimfwa, Mulopwe Davida, wādi mu kipwano kya pabwipi na Leza wānene amba: “Abe Yehova Leza wami bilongibwa byobe byo walongele bitendelwa i bya ntanda ne ntanda; Kadi ne mifwatakanyo yobe nayo īdi padi bātwe. . . . I bitabukemo kebiyūkibwapo kubalwa.” (Ñimbo 40:5) Kadi, Yehova uloñanga’nka ne biyampe ku boba kebamuyukilepo, ‘uyujanga bā mityima yabo na byakudya ne tusepo.’—Bilongwa 14:17.

Yehova byasangelanga kulonga bintu biletela bantu bakwabo nsangaji, i kyendele’mo tukulupile’mba boba basaka kwikala balunda na Leza bafwaninwe kulonga bintu ‘bisangaja mutyima’ wandi. (Nkindi 27:11) Ino le i bika byobwanya kulonga mwanda wa kusangaja Leza? Bible ulondolola’mba: “Kemwakilwai kulonga biyampe ne kwiabila na bakwabo byomudi nabyo, mwanda bitapwa bidi namino bisangajanga Leza.” (Bahebelu 13:16) Le kino kishintulula’mba kulonga biyampe ne kwiabila na bakwabo bintu byo abyo kete bikasangaja Yehova?

Bible unena amba: “Pampikwa lwitabijo kebibwanikapo kusangaja Leza.” (Bahebelu 11:6) Na bubine, “Abalahama wāikele na lwitabijo mudi Yehova ebiya wāitwa bu mulunda na Yehova.” (Yakoba 2:23) Yesu Kidishitu nandi wākomeneje mvubu ya ‘kulombola lwitabijo mudi Leza’ shi tusaka kumona madyese a Leza. (Yoano 14:1) Le i muswelo’ka okokeja kwikala na lwitabijo lwine lusaka Leza ku boba basaka kumufwena? Ubwanya kushilula na kwifunda kitatyi ne kitatyi Bible Kinenwa kya Leza. Shi ulonge namino, ukekala na “buyuki bwa binebine bwa kiswa-mutyima kyandi” kadi ukefunda mwa “kumutōkejeja ku mutyima ne pa mfulo.” Kupwa, shi utamije buyuki bwa bine padi Yehova ne kwingidija byobya byowifunda pa misoñanya yandi myoloke, lwitabijo lobe kwadi lukakoma kadi nandi ukekala pabwipi bininge nobe.—Kolose 1:9, 10.