MUTWE WA MWANDA WA PA KIBALU | KULOMBELA LE KUDI NA MVUBU?
Mwanda Waka Bantu Balombelanga?
“Nadi katyi katelwa ku lūbako mu kuta futu. Nalombele milombelo mwanda wa ngikale na lupeto. Inoko nkyaikelepo nalo.”—Samuel,a Kenya.
“Mu masomo batwe bonso twadi tupituluka ku mutwe milombelo yobadi betufundija.”—Teresa, Filipine.
“Nadi nombela kitatyi kyonadi nekonda na makambakano. Nadi nombela mwanda wa ndekelwe bubi ne kwikala mwine Kidishitu muyampe.”—Magdalene, Ghana.
Myanda inenenwe na ba Samuel, Teresa ne Magdalene ilombola’mba bantu balombelanga pa mwanda wa bubinga bwishileshile, bamo i bantu ba bulēme kupita bakwabo. Bantu bamo balombelanga milombelo itamba ku mutyima; milombelo mikwabo nayo i ya kajilwijo’tu. Nansha nabya, balombelanga mwanda wa kubinga ku maekizame a ku masomo, mwanda wa kisumpi kya futubolo kya nsenswe kibwine, mwanda wa Leza aludike kisaka kyabo nansha pa bintu palapala, bine midiyo tutwa na tutwa twa bantu basenswe kulombela. Bine, myanda mimweke ilombola amba nansha ke bantu kebatōtangapo balombelanga kitatyi ne kitatyi.
Lelo ulombelanga? Shi i amo, le ulombanga bika? Nansha shi udi na kibidiji kya kulombela nansha kudipo nakyo, wiipangule amba: ‘Lelo na bubine milombelo yo-yonso idi na kamweno? Lelo kudi wiivwananga?’ Mulembi umo walombwele mwaadi wiivwanina pa milombelo amba “idi pamo bwa lundapo . . . pamo wa abe wisamba na mishipa yomunine.” Balupusa bamo batala myanda ya lundapo badi na mumweno umo onka, banenena amba milombelo nayo i “lawa.” Le bantu bakwabo balombelanga mwanda wa kibidiji’ni nansha kumwena mu lundapo kampanda lwa undapwa?
Inoko, Bible utela milombelo bu i mitabuke miswelo ya lundapo. Witulombola’mba kudi na bubine muntu wivwananga milombelo myendele’mo ne bintu biyampe. Lelo i bya bine? Nanshi tubandaulei’ko bukamoni bumobumo.
a Majina amo i mashintwe.