MUTWE WA MWANDA WA PA KIBALU | KULOMBELA LE KUDI NA MVUBU?
Lelo Kudi Wivwananga Milombelo?
Bantu bamo bamonanga’mba kulombela i kupanga luvula, i kutupu muntu nansha umo wivwananga’yo. Bakwabo nabo kebatompe kulombela ino milombelo yabo kutupu kulondololwa. Muntu utuna kwikala’ko kwa Leza wadi ufwatakanya mwikadile Leza kupwa walomba amba: “Nsongole’ko nansha bityetye ku kutwi.” Ino unena amba Leza “utenteja ubilepo’tu talala.”
Inoko, Bible witukulupija’mba Leza wivwananga milombelo. Bible usekunwine myanda ya bantu ba pa kala amba: “Binebine [Leza] ukakufwila lusa pa diwi dya kwabija kobe; pakevwana, ukakulondolola.” (Isaya 30:19) Vese mukwabo wa mu Bible unena amba: “Lulombelo lwa wabuluji i nsangaji yandi.”—Nkindi 15:8.
Yesu wālombele kudi Shandi penepa ‘waivwanikwa biyampe.’—Bahebelu 5:7
Kadi mu Bible mudi bimfwa bya bantu bāivwenwe milombelo yabo. Vese umo wa mu Bible unena padi Yesu amba, “waabije . . . Yewa mwine wadi ubwanya kumupandija” kadi “waivwanikilwe biyampe.” (Bahebelu 5:7) Bimfwa bikwabo twi bitana mu Danyele 9:21 ne 2 Bilongwa 7:1.
Mwanda waka bantu bamo bamonanga amba milombelo yabo keilondololwangapo? Pa kwivwanwa, tufwaninwe kulomba enka kudi Leza wa mu Bible, Yehova,a kekudipo leza wa bankambo mhm. Kadi Leza witusoñanya tumulombe “mwendele kiswa-mutyima kyandi”—ko kunena amba mu muswelo waitabije. Leza witukulupija amba shi tumulombe mu uno muswelo “witwivwananga.” (1 Yoano 5:14) O mwanda milombelo yetu pa kwivwanwa, tufwaninwe kuyuka Leza wa mu Bible ne kuyuka kiswa-mutyima kyandi.
Bantu bavule bakulupile’mba milombelo ke kibidijipo’tu kya bipwilo inoko Leza wi bevwananga ne kwibalondolola. Isaac, ushikatanga mu Kenya unena amba: “Nalombele mwanda wa kwivwanija Bible. ami nkala‘tu amena, muntu umo waiya ne kumpa bukwashi bonadi nsakilwa.” Hilda wa mu Filipine, wadi ukimba kuleka kutoma mfwanka. Pa kukomenwa misunsa mivule, wandi mulume wamunena amba, “Mwene lomba’tu Leza akukwashe?” Ebiya, nandi waingidija ano madingi kadi unena amba: “Natulumukile muswelo wankweshe Leza. Nashilula kwilwa bityebitye kyumwa kya kutoma mfwanka. Ponka’po naleka’byo.”
Le Leza ubwanya ku kukwasha mu myanda yobe shi ikwatañene na kiswa-mutyima kyandi?
a Yehova i dijina dya Leza monka modilombwedilwe mu Bible.