MALONDOLOLO KU BIPANGUJO BIMANINE PA BIBLE
Lelo Bafwe Bakekala Monka Bōmi?
Na bubine Umpangi wa būmi ukasangula bantu
Yehova Leza ye Nsulo ya būmi. (Ñimbo 36:9) Lelo kino i kyendele’mo enka Leza kujokejeja boba bafwile būmi? Bible witukulupija’mba Leza ukasangula bafwile mu mafuku a kumeso. (Tanga Bilongwa 24:15.) Mwanda waka ukebasangula?
Umpangi wetu wāpangile muntu ekale’ko nyeke ne nyeke pano pa ntanda. (Ngalwilo 1:31; 2:15-17) Buno bo būmi bwaādi usakila bantu. Utenekwanga ku mutyima pa kwitumona tususuka—mu būmi buyule tusuwa ne kadi usa kupwija’to panopano ponka.—Tanga Yoba 14:1, 14, 15.
Lelo boba bakasangulwa bakekala kwepi?
Lelo Leza wāpangile muntu mwanda wa kukekala mūlu? Aa. Leza wāpangile bamwikeulu mwanda wa kwikala mūlu. Ino bantu wēbapangile mwanda wa kwikala pano pa nshi. (Ngalwilo 1:28; Yoba 38:4, 7) Kino i kimweke mu bimfwa bya bantu bāsangwilwe na Yesu. Wāsangwile bantu mwanda wa kwikala pano pa nshi. Mo monka, ne bantu bavule bakasangulwa mu mafuku a kumeso bakekala pano pa ntanda.—Tanga Yoano 5:28, 29; 11:44.
Inoko, Leza i mutonge’ko bantu batyetye bakasangwilwa momwa mūlu, na imbidi ya ku mushipiditu. (Luka 12:32; 1 Kodinda 15:49, 50) Bano bakasangwilwa momwa mūlu bakaludika bu balopwe na Kidishitu pano pa ntanda.—Tanga Kusokwelwa 5:9, 10.