“Batwe Tukenda Nenu”

1, 2. (a) Lelo i bika byālaile Yehova bifikidila mu kino kyetu kitatyi? (b) Le i bipangujo’ka bisa kulondololwa mu kino kishinte? (Tala kifwatulo ku ngalwilo.)

YEHOVA wālaile amba, mu kino kyetu kitatyi “bantu dikumi ba mu ndimi yonsololo ya mizo’ya, bakakwata, eyo, bakashipila ku kisandi kya yewa udi bumwine Yudea amba: Batwe tukenda nenu, mwanda tubaivwana’mba Leza udi nenu pamo.” (Zekadia 8:23) ‘Mwine Yudea’ welekeja boba bashingilwe māni na Leza kupityila ku mushipiditu wandi ujila. Betwanga ne bu “Isalela wa Leza.” (Ngalatea 6:16) Kadi “bantu dikumi” belekeja boba badi na lukulupilo lwa kwikala na būmi bwa nyeke pano pa ntanda. Bayukile amba Yehova i mwesele kino kisumpi kya bashingwe māni kadi bamwene amba i dyese kutōta Leza nabo pamo.

² Pamo bwa mupolofeto Zekadia, Yesu wānene amba bantu ba Leza bakekala umbumo. Wātelele boba batengele kukekala mūlu bu “kaluombe katyetye,” ne boba batengele kukekala pano panshi bu “mikōko mikwabo.” Ino Yesu wānene amba bakekala bu “luombe lumo” kadi bakamulonda bu ‘mukumbi wabo umo.’ (Luka 12:32; Yoano 10:16) Tamba kwikala bibumbo bibidi, bantu bamo beipangulanga amba: (1) Le mikōko mikwabo ifwaninwe kuyuka majina a bashingwe māni bonso dyalelo? (2) Lelo bashingwe māni bafwaninwe kwimona namani? (3) Shi muntu kansangwa mu kipwilo kyenu washilula kudya mukate ne kutoma vinyu ya pa Kivulukilo, lelo mukamumona namani? (4) Lelo ufwaninwe kwikambakanya pa kibalwa kyenda kikanda kya boba badya mukate ne kutoma vinyu ya pa Kivulukilo? Kino kishinte kisa kulondolola bino bipangujo.

LE TUFWANINWE KUYUKA MAJINA A BASHINGWE MĀNI BONSO DYALELO?

3. Mwanda waka i bikomo kuyuka na bubine i ani ubadilwa mu ba 144000?

³ Le mikōko mikwabo ifwaninwe kuyuka majina a bashingwe māni bonso bakidi’ko dyalelo pano pa ntanda? Mhm. Mwanda waka? Mwanda i bikomo muntu kuyuka na bubine boba bakatambula mpalo.^[1] (Tala bilembwa bya ku mfulo.) Nansha Leza byaebetyile kwenda mūlu, bakatambulanga mpalo yabo enka shi bekale nyeke na kikōkeji. Satana uyukile kino, kadi wingidijanga “bapolofeto ba bubela” mwanda wa ‘kwibongola.’ (Mateo 24:24) Bene Kidishitu bashingwe māni bakakulupila kutambula mpalo yabo enka shi abayuka’mba Yehova webamone amba bamukōkele. Yehova ukaleta kino kiyukeno kya mfulo, kumeso kwa abo kufwa nansha kumeso kwa “kyamalwa kikatampe” kushilula.—Kusokwelwa 2:10; 7:3, 14.

4. Byobidi bikomo kuyuka majina a bashingwe māni bonso badi’ko pano pa ntanda dyalelo, penepa mikōko mikwabo ‘ikenda’ nabo namani?

⁴ Byobidi bikomo kuyuka majina a bashingwe māni bonso badi’ko pano pa ntanda dyalelo, penepa mikōko mikwabo ‘ikenda’ nabo namani? Bible unena amba, bantu dikumi “bakashipila ku kisandi kya yewa udi bumwine Yudea amba: Batwe tukenda nenu, mwanda tubaivwana’mba Leza udi nenu pamo.” Nansha uno vese wa mu Bible byatelele mwine Yudea umo, ino panena amba “nenu” ne “nenu pamo,” ufunkilanga pa bantu bavule. Kino kishintulula amba mwine Yudea ke muntupo umo ino i kibumbo kyonso kya bashingwe māni. Mikōko mikwabo nayo iyukile kino, kadi ingidilanga Yehova pamo na kino kibumbo. Kebasakilwapo kuyuka majina a bonso badi mu kino kibumbo pa kwibalonda. Yesu i Mutangidiji wetu, kadi Bible witusoñanya kumulonda’nka aye kete.—Mateo 23:10.

LELO BASHINGWE MĀNI BAFWANINWE KWIMONA NAMANI?

5. Lelo bashingwe māni bafwaninwe kulangulukila bininge pa kidyumu’ka, ne mwanda waka?

⁵ Bashingwe māni bafwaninwe kulangulukila bininge pa kidyumu kidi mu 1 Kodinda 11:27-29. (Tanga.) Le mushingwe māni ukokeja kudya mukate ne kutoma vinyu ya pa Kivulukilo “pampikwa kufwaninwa” namani? Shi kalaminepo kipwano kilumbuluke na Yehova ne kuleka kumukōkela, penepa shi uno muntu adye mukate ne kutoma vinyu nabya wabulwe bulēme. (Bahebelu 6:4-6; 10:26-29) Kino kidyumu kisumininwe kivuluja bashingwe māni amba bafwaninwe nyeke kukōkela shi basaka kutambula “mpalo ya lwito lwa mūlu [lwibetyile] Leza kupityila kudi Kidishitu Yesu.”—Fidipai 3:13-16.

6. Lelo bene Kidishitu bashingwe māni bafwaninwe kwimona namani?

⁶ Polo wāsapwidile bene Kidishitu bashingwe māni amba: “Ami mukutwa mudi Mfumwetu, nemwisāshila’mba nangilai mobifwaninwe lwito lomwaityilwe.” Le bādi ba kunangila’mo namani? Polo ushintulula amba: “Na kwityepeja ne kutalala konsololo, na kitūkijetyima, mwitūkijija mutyima na buswe banwe bene na bene.” (Efisesa 4:1-3) Mushipiditu ujila wa Yehova ukwashanga bengidi bandi bekale betyepeje ne kubulwa ditatu. (Kolose 3:12) Nanshi bashingwe māni kebemonangapo bu batabuke bakwabo. Bayukile amba Yehova kanenwepo kupa bashingwe māni mushipiditu ujila kutabuka bengidi bandi bakwabo. Kadi kebemonangapo bu abo bo batelekeje na mushike bubine bwa mu Bible kutabuka bakwabo. Kadi kebakankamikangapo muntu kudya mukate ne kutoma vinyu ya pa Kivulukilo mwanda’po bamumonanga bu mushingwe māni. Inoko, i betyepeje kadi bayukile amba enka Yehova kete ye utoñanga ba kwenda mūlu.

7, 8. Lelo bene Kidishitu bashingwe māni kebafwaninwepo kulonga bika, ne mwanda waka?

⁷ Nansha bashingwe māni byobamwene kwenda mūlu bu dyese dikatampe, kebakimbangapo bakwabo bebalēmeke mu muswelo wa pa bula. (Efisesa 1:18, 19; tanga Fidipai 2:2, 3.) Kadi bayukile amba shi Yehova webashinga māni, kalombolangapo muntu mukwabo. O mwanda mushingwe māni katulumukangapo shi bakwabo kebetabijepo ponka na ponka bu mushingwe māni bwandi. Uvulukanga amba Bible i mwitusoñanye tuleke kukulupila bukidibukidi muntu yense witela bu mupebwe na Leza kiselwa kampanda kya pa bula. (Kusokwelwa 2:2) Mushingwe māni byakasakangapo bantu bamute mutyima bininge, o mwanda kasapwilangapo kala muntu yense watana amba nashingwa māni. Na bubine, padi kakebinenapo ne kwibinena ku muntu nansha umo. Kadi kakeanyapo pa bintu bilumbuluke byakalonga mūlu.—1 Kodinda 1:28, 29; tanga 1 Kodinda 4:6-8.

⁸ Bene Kidishitu bashingwe māni kebemonangapo bu bafwaninwe enka kupityija kitatyi pa abo bene, bwa abo badi mu kisumpi kya makayo. Kebetanangapo na bashingwe māni bakwabo mwanda wa kwisambila pa mo bashingīlwe māni nansha kwitana pamo mwanda wa kwifunda Bible. (Ngalatea 1:15-17) Shi bashingwe māni badi balonga namino, longa kipwilo kekidipo mu bumo. Badi ba kulwa na mushipiditu ujila, mwine ukwasha bantu ba Leza bekale mu ndoe ne mu bumo.—Tanga Loma 16:17, 18.

LELO UFWANINWE KWIBAMONA NAMANI?

9. Mwanda waka tufwaninwe kudyumuka pa muswelo otumona boba badyanga mukate ne kutoma vinyu ya pa Kivulukilo? (Tala kapango kanena amba “Buswe ‘Kebuloñangapo Byampikwa Kwendela’mo.’”)

⁹ Lelo ufwaninwe kumona namani batutu ne bakaka bashingwe māni? Yesu wāsapwidile bana bandi ba bwanga amba: “Banwe bonso mwi bana na bana.” Ebiya wabweja’ko amba: “Yewa wizunzula ukatūkijibwa, ino yewa witūkija ukazunzulwa.” (Mateo 23:8-12) O mwanda i kibi kutendela muntu bipitepite nansha shi i mwanabo na Kidishitu mushingwe māni. Kitatyi kīsambila Bible pa bakulumpe, witukankamikanga twiule lwitabijo lwabo, inoko witulombola amba ketufwaninwepo nansha dimo kutūla muntu bu mwendeji wetu. (Bahebelu 13:7) I bine Bible unena’mba bantu bamo bafwaninwe “kupebwa bulēme misunsa ibidi.” Ke mwandapo amba i bashingwe māni, ino i mwanda ‘bendejanga senene’ kadi “bengila bikomo mu kwisamba ne kufundija.” (1 Temote 5:17) Shi tutendela bashingwe māni bipitepite ne kwibata mutyima bininge, nabya twibafwijanga bumvu. Kadi kibi kutabukidila, tukokeja kwibalengeja bekale na mitatulo. (Loma 12:3) Bine, ketufwaninwepo nansha dimo kulonga kintu kibwanya kulengeja banababo na Kidishitu bashingwe māni kuponena mu kino kilubo kikatampe!—Luka 17:2.

10. Lelo i muswelo’ka otukalombola’mba tulēmekele bene Kidishitu bashingwe māni?

¹⁰ Lelo i muswelo’ka otukalombola amba tulēmekele boba bashingilwe māni na Yehova? I na kuleka kwibepangula muswelo obashingilwe māni. Uno i mwanda oketubwanyapo kuyuka senene utala muntu aye mwine. (1 Tesalonika 4:11; 2 Tesalonika 3:11) Kadi ketubwanyapo kwipangula mulume, mukaji, bambutwile nansha muntu mukwabo wa mu kisaka shi nabo i bashingwe māni. I kutupu muntu upyananga lukulupilo lwandi mu kisaka. (1 Tesalonika 2:12) Kadi tufwaninwe kwepuka kwipangula bipangujo bisanshija bakwetu. Kimfwa, ketufwaninwepo kwipangula mukaja mushingwe māni mwawiivwanina pa kukekala na būmi bwa nyeke pano pa ntanda pampikwa wandi mulume. Bine, tukulupile na bubine amba mu ntanda mipya, Yehova ukekutyija “mityima ya bintu byonso byumi.”—Ñimbo 145:16.

11. Lelo i muswelo’ka otukekinga shi twepuka ‘kufukula bakwabo mwanda wa kumwena’mo’?

¹¹ Kadi twikiñanga potuleka kumona bashingwe māni bu badi na mvubu kutabuka bakwabo. Muswelo’ka? Mwanda Bible witulombola amba kubwanya kwikala “banabetu ba bubela” mu kipwilo bene babwanya kwitela bu bashingwe māni. (Ngalatea 2:4, 5; 1 Yoano 2:19) Kadi, bashingwe māni bamo babwanya kubulwa kikōkeji. (Mateo 25:10-12; 2 Petelo 2:20, 21) Ino shi twepuka ‘kufukula bakwabo mwanda wa kumwena’mo,’ nankyo ketukabombolwapo na bakwabo nansha shi i bashingwe māni bayukane senene nansha boba ke bengidile Yehova myaka kapwila. Ebiya, shi kebakōkelepo nansha shi abatambe mu kipwilo, ketukajimijapo lwitabijo lwetu mudi Yehova nansha kuleka’byo kumwingidila.—Yude 16.

LELO UFWANINWE KWIKAMBAKANYA PA MWANDA WA KIBALWA?

12, 13. Mwanda waka ketufwaninwepo kwikambakanya pa kibalwa kya boba badya mukate ne kutoma vinyu ya pa Kivulukilo?

¹² Pano ke padi myaka mivule, kibalwa kya boba badya mukate ne kutoma vinyu ya pa Kivulukilo kyadi kyenda kityepa. Ino ano mafuku ke kyenda kivudila’ko mwaka ne mwaka. Lelo kino kifwaninwe kwitukambakanya? Aa. Tala mwanda waka.

¹³ “Yehova uyukile bandi.” (2 Temote 2:19) Yehova i mwishile na batutu babalanga kibalwa kya boba badya mukate ne kutoma vinyu ya pa Kivulukilo, mwanda abo kebayukangapo ushingilwe māni bya bine i wepi. O mwanda mu kino kibalwa mudi ne boba balanga’mba i bashingwe māni abo papo kushingwa’o mpika. Kimfwa, bantu bamo badi badya mukate ne kutoma vinyu balekele’byo. Bakwabo badi na ñeni mijine nansha na misongo ya dityima ke balanga’mba bakabikala na Kidishitu momwa mūlu. Na bubine, ketuyukilepo biyampe buvule bwa bashingwe māni bashele’ko pano pa ntanda.

14. Lelo Bible unena bika pa kibalwa kya bashingwe māni bakashala pano pa ntanda pakashilula kyamwalwa kikatampe?

¹⁴ Pakāya Yesu kuselela mūlu bashingwe māni, bavule bakatanwa mu bifuko palapala bya pano pa ntanda. Bible unena amba Yesu “ukatuma bamwikeulu bandi na diwi dya kimpungidi dikatampe, nabo bakabungakanya batongwe bandi kutamba ku mvula iná, tamba ku mfulo imo ya madiulu kutūla ku mfulo mikwabo.” (Mateo 24:31) Kadi Bible ulombola amba mu mafuku a mfulo, kukekalanga kibalwa kityetye kya bashingwe māni pano pa ntanda. (Kusokwelwa 12:17) Inoko katelelepo bungi bwa boba bakekala’ko pakashilula kyamalwa kikatampe.

15, 16. Lelo i bika byotufwaninwe kwivwanija pa ba 144000 batongelwe na Yehova?

¹⁵ Yehova ye uyukile kitatyi kya kutonga bashingwe māni. (Loma 8:28-30) Yehova wāshilwile kutonga bashingwe māni pa kupwa kwa Yesu kusanguka. I kimweke patōka’mba mu myaka katwa kabajinji bene Kidishitu bonso ba bine bādi bashingwe māni. Myaka tutwa pa kupita’po, bantu bavule bādi betela bu bene Kidishitu bālekele kulonda Kidishitu. Nansha nankyo, mu bula bwa mine myaka’ya, Yehova wāshingile māni bene Kidishitu ba bine batyetye kete. Bādi pamo bwa ñano yesambile’po Yesu amba ikatamina pamo na biyombo bityani. (Mateo 13:24-30) Mu mafuku a mfulo, Yehova utoñanga bantu bakwabo ba kubwanya kibalwa kya 144000.^[2] (Tala bilembwa bya ku mfulo.) Nanshi shi Leza watonge bantu bamo kumeso kwa mfulo kufika, na bubine ketukokejapo kutatana kyebatongela. (Isaya 45:9; Danyele 4:35; tanga Loma 9:11, 16.)^[3] (Tala bilembwa bya ku mfulo.) Tufwaninwe kuta mutyima bininge kutyina amba twakekala pamo bwa bengidi bādi betompwela pa muswelo wāmwene mfumwabo bengidi bāingile mu nsá ya mfulo.—Tanga Mateo 20:8-15.

¹⁶ Kebonsopo badi na lukulupilo lwa kukekala mūlu babundile “umpika mukōkele ne mudyumuke.” (Mateo 24:45-47) Pamo bwa mu myaka katwa kabajinji, ba Yehova ne Yesu bengidijanga bantu batyetye mwanda wa kudisha ne kufundija bantu bavule dyalelo. I enka bene Kidishitu bashingwe māni batyetye kete mu myaka katwa kabajinji bāingidijibwe mwanda wa kulemba Bisonekwa bya Kingidiki bya Bwine Kidishitu. Dyalelo nadyo, i enka bene Kidishitu bashingwe māni batyetye kete badi na kiselwa kya kupa bantu ba Leza byakudya “pa kitatyi kifwaninwe.”

17. Lelo i bika byowefunda mu kino kishinte?

¹⁷ Lelo i bika byotwefunda mu kino kishinte? Yehova ye ukwatanga butyibi bwa kupa bantu bandi bavule būmi bwa nyeke pano pa ntanda ne būmi bwa momwa mūlu ku boba bakaludika na Yesu. Yehova upalanga mpalo bengidi bandi bonso, ‘mwine Yudea’ ne “bantu dikumi,” kadi wibasakilanga balame mbila imo yonka ne kushala bakōkele nyeke. Bonso bafwaninwe kwityepeja. Bonso bafwaninwe kwingidila pamo kadi umbumo. Kadi bonso bafwaninwe kulonga bukomo bwa kulama ndoe mu kipwilo. Pano potwenda tufwena ku mfulo, twendelelei kwingidila Yehova ne kulonda Kidishitu bu luombe lumo lonka.