Le Mwingilo Obe Udi Bwa Lumé?

MWINGILO wetu udi na mvubu kadi i wa bulēme. Inoko ke bonsopo botusapwilanga bemvwanije kino. Nansha shi bantu basangela binena Bible, ino ke ponsopo pobamonanga amba i kya kamweno twifunde nabo Kinenwa kya Leza.

Tala kimfwa kya Gavin. Wadi utanwa ku kupwila ku Njibo ya Bulopwe, inoko kadipo usaka kwifunda Bible. Gavin unena amba kadipo uyukile myanda mivule pa Bible, ne kadipo usaka bakwabo bayuke uno mwanda. Wadi utyina kukokelwa mu kipwilo kampanda, kadi kadipo usaka kongolwa. Molangila, le byadi bipela kukwasha Gavin? Langulukila pa lupusa luyampe lubwanya kwikala na bufundiji bwa Bible pa muntu. Yehova wāsapwidile bene Isalela amba: “Muneneno wami ukanoka bwa lumé, bwa mvula ya lumyamya pa lumenena.” (Kupituluka 31:19, 30; 32:2) Nanshi twifundei’ko myanda imo itala pa lumé ne kwiidingakanya na mwingilo wetu pa kukwasha senene “bantu ba miswelo yonso.”​—1 Temote 2:3, 4.

LE MWINGILO WETU UBWANYA KWIKALA BWA LUMÉ NAMANI?

Lumé i luyampe. Lumé lushilulanga bityebitye mu lwelele pamo bwa lumundu kupwa ke mano a mema. Le binenwa bya Yehova byādi ‘binoka bwa lumé’ namani? Wādi wisamba na bantu bandi na kanye, mu muswelo muyampe ne wa kabango. Tumwiulanga potulēmeka nkulupilo ya bakwetu. Twibakankamikanga balanguluke ne kukwata butyibi abo bene. Shi tuta muntu ne muntu mutyima, nabya bantu baketabija byotwibasapwila na mutyima umo, kadi mwingilo wetu ukapa bipa bivule.

Lumé lutūkijanga mutyima. Mwingilo wetu ukatūkija mityima ya bantu shi tulangulukila pa miswelo palapala ya kwibakwasha befunde bivule pa bubine. Tutu Chris, wabadikile kwifunda Bible na Gavin, kadipo umuningila kwitabija byaefunda. Inoko, wadi ukimba miswelo palapala ya kukwasha nayo Gavin asangele bininge mīsambo imanine pa Bible. Chris wasapwidile Gavin amba kudi musapu wa mvubu udi mu Bible ne amba kwifunda uno musapu kukamukwasha emvwanije senene myanda ipita ku kupwila. Kupwa, Chris wamusapwila amba bupolofeto bwa mu Bible bo bwankulupije amba Bible i wa bine. Mfulo mfulō, besambile bivule pa muswelo ufikidila bupolofeto. Ino mīsambo yatūkije Gavin mutyima, ku mfulo waitabija kwifunda Bible.

Lumé luletanga būmi. Mu kitatyi kya mulanga, pokudi kyanga mu Isalela, mvula kādipo unoka mu myeji mivule. Shi kekwādipo lumé lutamba ku lumundu, bikunanwa byādi bya kūma tē. Yehova wālaile amba mu ano etu mafuku namo kukekala mulanga, bantu bakekala na kyumwa kya “kwivwana binenwa bya Yehova.” (Amose 8:11) Wālaile amba bashingwe māni, bakwatakanibwe na “mikōko mikwabo,” bakekala pamo bwa “lumé kudi Yehova” po basapula myanda miyampe ya Bulopwe. (Yoano 10:16; Mika 5:7) Musapu otusapula ubadilwa mu mpangiko itūdile’ko Yehova ya kupāna būmi ku boba badi na kyumwa kya bubine. Le tukwete uno musapu na mvubu?

Lumé i dyese ditamba kudi Yehova. (Kupituluka 33:13) Mwingilo wetu ukokeja kwikala dyese nansha kyabuntu, ku boba beutambula. Kifundwa kya Bible dyadi dyese kudi Gavin mwanda kyamukweshe atane malondololo ku bipangujo byandi byonso. Waendelele bukidibukidi ne kubatyijibwa, pano usapulanga myanda miyampe ya Bulopwe pamo na wandi mukaji Joyce.

LĒMEKA MWINGILO OBE

Kadi kudingakanya mwingilo wetu wa busapudi na lumé kwitukwasha twimvwanije amba bukomo bulonga umo ne umo mu mwingilo budi na mvubu. Muswelo’ka? Dinoke dimo dya mema kedilongapo kintu, ino shi ke mano mavule a lumé, nshi yonso yabomba. Muswelo umo onka, byobya bilonga muntu umo mu mwingilo bimwekanga bu bityetye bininge kotudi. Ino kupityila ku bukomo bulonga bantu bonso ba Yehova mu kikonge, bukamoni busapulwanga “ku mizo yonso.” (Mateo 24:14) Lelo mwingilo wetu ukekala bu dyese ditamba kudi Yehova ku bakwetu? I amo, musapu wetu ukekala pamo’nka bwa lumé, ko kunena’mba muyampe, utūkija mutyima kadi upāna būmi!