Batwe Bonso Tusakanga Kusengibwa

Le ubavuluka mowadi uponena pa bwanuke? Padi wetyumwine kuboko nansha kutela kunwi. Lelo ubavuluka mwakusengele inobe? Padi wakukendele kilonda ne kukwela’po lawa. Wadidile, inoko binenwa byandi biyampe ne kukufumbata kwandi byalengeje wiimvwane biyampe. Mu kino kitatyi, wadi na muntu pabwipi wa kukusenga.

Inoko būmi bwendanga bukutakana potwenda tutama. Makambakano enda avudila’ko, busengi nabo bwenda busakana. Makambakano a pa butame nao, i bikole’tu, keabwanyapo kupwijibwa na kwela’po’tu lawa nansha kufumbatwa na mbutwile. Tala bino bimfwa bibala-binga.

• Le kodi muvutakanibwe ñeni pa kaji kowajimije? Julian unena’mba pobamupangile pa kaji, kyaso kyamushile ñeni mivutakane. Kaeipangula’mba, ‘Le nsa kudisha namani kisaka kyami? Ami muntu waingila nabo myaka mivule, i kika kyamwena sosiete amba nkikifwaninwepo?’

• Padi wi mukambakanibwe na busongi bwenu bupomokele. Raquel ushintulula’mba, “Paunyemene wami mulume kupwa’tu kwa myeji 18, naimvwene bibi. Byadi’tu bwa mutyima wami walalwa bibese pabidi. Naimvwene misanshi mu ngitu ne mu malango. Byanzakeje.”

• Padi udi na misongo mikatampe keilombolapo amba usa kukoma. Kitatyi kimo padi kodi mwiimvwane bwa mukulutuba Yoba, wādidile amba: “Nakwatyilwa būmi bwami mukenye, nkikekalapo ne būmi nyeke, mhm.” (Yoba 7:16) Padi wiimvwananga bwa Luis, mwana-mulume wa myaka 80 ne musubu, wanenene amba, “Neimvwananga kyaba kimo bu ntengēle’tu lufu.”

• Padi usakanga kusengibwa mwanda wafwidilwe muntu osenswe. Robert unena’mba, “Pafwile wami mwana ku akishida ya amviyo, dibajinji nkyaitabije’byopo. Kupwa naimvwana misanshi, misanshi idingakanibwe mu Bible bu kipete kilampe kinsabakenye.”​—Luka 2:35.

Robert, Luis, Raquel, ne Julian basengelwe nansha byobadi mu ino ngikadilo isansa. Batene Muntu muyampe wa kwibasenga​—ke ungipo i Leza Mwinē Bukomo Bonso. Le webasengele namani? Le nobe ukakusenga?