Le Ukalonga Namani pa Kyabuntu Kikatakata kya Leza?

KYABUNTU kikatakata kifwaninwe kwituningila tufwije’ko. Yesu wāfundije uno mwanda pa kupwa kundapa bantu dikumi misongo yādi keidi lawa mu kitatyi’kya. Umo pa bano dikumi “wajoka katumbija Leza na diwi dikatampe.” Yesu wāmwipangwile amba: “Mwene basubulwanga badi dikumi? Penepo, le bakwabo kitema badi kwepi le?” (Luka 17:12-17) Ñeni yotuboila’ko? Bine tubwanya lubilo lonka kuvulaminwa bintu biyampe bitulongela bakwabo!

Kinkūlwa i kyabuntu kipite byonso. I kyabuntu kikatakata kekyamwekele kashā! Penepa i bika byofwaninwe kulonga pa byobya byonso bikulongēle Leza?

• Yuka Mwine upēne’kyo. Kinkūlwa kekipengapo bantu bonso būmi bwa nyeke mu kitulumukila. Mwanda Yesu wānenene mu milombelo kudi Leza amba: “Buno’bu bo būmi bwa nyeke, bekale kukuyuka abe, Leza umo kete wa bine, ne yewa owatumine, Yesu Kidishitu.” (Yoano 17:3) Shi abakulombola’mba kudi muntu wakupandije powadi ukidi mwanuke, le ubulwe’po kwikala na mutyima wa kuyuka myanda mivule pa muntu’wa ne kine kyaakupandijije? Yehova Leza, mwine upēne kyabuntu kileta būmi kya kinkūlwa usakanga umuyuke kadi usakanga wikale mulunda nandi. Bible witusoñanya’mba “Fwenai kudi Leza, nandi ukemufwena.”​—Yakoba 4:8.

• 

  Lombola lwitabijo mu kinkūlwa. “Yewa ulombola lwitabijo mudi Mwana udi na būmi bwa nyeke.” (Yoano 3:36) Le kulombola lwitabijo ko kunena namani? I kulonga’po kintu; kulombola lwitabijo mu kinkūlwa kulomba kulonga’po kintu. (Yakoba 2:17) Kintu’ka? Kyabuntu kikalanga ke kyobe shi enka ubekitabija ne kwikitambula. Nanshi ufwaninwe kwitabija kinkūlwa ne kwikitambula. Muswelo’ka? Wifunde bine bikusakila Leza mu būmi ne kulonga’byo.a Lomba Leza akulekele bubi ne kwikala na mutyima wa mundamunda utōka. Fwena Leza na kikulupiji kyonso, koku uyukile amba, kupityila ku kinkūlwa, ukaleta binebine būmi bwa nyeke kadi bwa ndoe, mutyima-ntenke, ntundubuko ku bonso balombola lwitabijo mu kinkūlwa!​—Bahebelu 11:1.

• 

  Tanwa ku Kivulukilo kya lufu lwa Yesu. Yesu wātūdile’ko kinkumenkume kya pa mwaka pa mwaka kituvuluja kinkūlwa. Wānenene pa mwanda utala kuvuluka kino kinkumenkume amba: “Longai nyeke namino ke pa kumvulukila.” (Luka 22:19) Batumoni ba Yehova basa kuvuluka lufu lwa Yesu Dya Bubidi, 11 Kweji 4, 2017, kupwa kupona kwa dyuba. Ino mpangiko, ikalonga kintu kya nsá umo, mukekala mwisambo ushintulula mvubu ya lufu lwa Yesu, muswelo wa kumwena’mo dyalelo ne mafuku āya kumeso. Ku mwaka, kintu kya bantu midiyo 20 ntanda yonso batenwe ku Kivulukilo. Tukwita na nsangaji wilunge netu na kwitabija kyabuntu kikatakata kya Leza.