MUTWE WA MWANDA WA PA KIBALU | BAMWIKEULU—LELO BADI’KO BINE? KYOWIKADILE MWANDA WA MVUBU
Bubine Butala Bamwikeulu
Lelo usakanga kuyuka bubine butala bamwikeulu—mobekadile, mobāikadile’ko, ne bine byobalonga? I kutupu kuntu kukwabo kokatana malondololo, poso i enka mu Bible, Kinenwa kya Leza kya ku bukomo bwa mushipiditu. (2 Temote 3:16) Lelo Bible witufundija’po bika?
Leza byadi Mushipiditu, bamwikeulu nabo i mishipiditu yampikwa kumweka, keidipo na “ngitu nansha na mikupa.” Bamwikeulu ba kikōkeji bashikatanga mu madiulu kadi bemonanga na Leza mpala na mpala.—Luka 24:39; Mateo 18:10; Yoano 4:24.
Kitatyi kimo bamwikeulu bādi bavwala ngitu ya bumuntu shi Leza webape mingilo ya kwingila pano panshi, kupwa bavūla’yo shi abapu mingilo yabo.—Batyibi 6:11-23; 13:15-20.
Nansha bamwikeulu byobalombwelwe mu Bible bu bana-balume, ne divule byobādi bavwala ngitu ya bana-balume, inoko i kutupu mwikeulu mwana-mulume nansha mwana-mukaji. Kebesoñengapo nansha kwibutula. Kutentekela pa bino, bamwikeulu kebāikele’kopo bidi bu bantu pano pa ntanda—bu bana ba lukeke, bankasampe, nansha ke bu batame bene. Bamwikeulu bāpangilwe na Yehova; o mwanda Bible wibeta bu “bāna ba Leza.”—Yoba 1:6; Ñimbo ya Mitōto 148:2, 5.
Bible wisambilanga pa “ndimi ya bantu ne ya bamwikeulu,” pa kulombola’mba bipangwa bya ku mushipiditu nabyo bidi na ludimi ne muneneno wabyo. Nansha Leza byaāingidije bamwikeulu mwanda wa kwisamba na bantu, inoko ketupelepo kishima kya kwibatōta nansha kulombela kobadi.—1 Kodinda 13:1; Kusokwelwa 22:8, 9.
Kudi bamwikeulu tununu makumi twa tununu makumi, padi bungi bwabo i midiyala ne midiyala.a—Danyele 7:10; Kusokwelwa 5:11.
Bamwikeulu badi na “bukomo bukatakata”—i bakomo kupita bantu—kadi badi na ñeni mitabuke ya bantu. Kadi babwanya kwenda kulampe bininge’nka na mu kukopa kwa diso, kupita’nka ne kufudile ntanda.—Ñimbo ya Mitōto 103:20; Danyele 9:20-23.
Bamwikeulu nabo badi na mikalo nansha byobadi na ñeni mivule ne bukomo bwa ku mushipiditu, kadi kudi bintu byokebabwanyapo kuyuka.—Mateo 24:36; 1 Petelo 1:12.
Bamwikeulu bāpangilwe na bumuntu, ngikadila ya Leza, ne bwanapabo bwa kwitongela. Nanshi, enka pamo bwa bantu, bamwikeulu nabo babwanya kutonga kulonga biyampe nansha bibi. Ino i kya bulanda, mwanda bamwikeulu bamo bātongele kutombokela Leza.—Yude 6.
a Tununu makumi twa tununu makumi i 10 000. Tununu makumi kwituvudija na tununu makumi i midiyo 100. Inoko, Kusokwelwa utela “tununu makumi twa tununu makumi” twa bamwikeulu. Ko kunena’mba i midiyo tutwa na tutwa, padi i midiyala ne midiyala ya bipangwa bya ku mushipiditu!