Muswelo wa Kulengeja Kifundwa Kyobe kya Bible Kikale Kiyampe Kadi Kisangaja

Yoshua utanga Bijila; mumbu ya Yediko ibapone ino njibo ya Lehaba ibashala mimane; Yoshua ulombela koku utulwile makasa mūlu

YOSHUA udi na mwanda umukambakanya ku mutyima. Aye ye wa kukatweja muzo wa Isalela mu Ntanda ya Mulao na kupita mu bikoleja bikatampe. Yehova wamukulupija’mba usa kunekenya, na kumukankamika’mba: ‘Kankamana’tu kadi wikomeje bininge. Lama Bijila byami. Tanga’byo dyuba ne bufuku, mwanda wa kulama senene byonso bilembelwe’mo. nabya ukanekenya dishinda dyobe ne kadi ukalonga bintu na tunangu.’—Yoshua 1:7, 8.

Byotudi mu “bitatyi bya makambakano bikomo ne mwa kulongela,” netu tulwanga na bikoleja bikatampe. (2 Temote 3:1) Pamo bwa Yoshua, netu tubwanya kunekenya na kulonda madingi āmupele Yehova. Tufwaninwe kutanga Bible difuku ne difuku ne kwingidija senene misoñanya idi’mo kitatyi kyotulwa na bikoleja.

Inoko, bavule motudi babwanya kunena’mba kebefundengapo biyampe ne kadi kwifunda kekwibapēlelangapo. Ino, pa kusaka’mba usangele kwifunda Bible, tala kapango “Tompa Kulonga Namino” pa kutana madingi mayampe akalengeja kifundwa kyobe kikale kiyampe kadi kisangaja.

Mulembi umo wa ñimbo ya mitōto wāimbile amba, “Ñendeje mu dishinda dya mbila yobe, mwanda e monka mondoelelwe.” (Ñimbo ya Mitōto 119:35) Ubwanya kusangela bininge kwifunda Kinenwa kya Leza. Ukemwena byabulēme shi wendelele na kukola bya bupeta bya ku mushipiditu.

Nansha byokunenenwepo kwendeja muzo pamo bwa Yoshua, udi na bikoleja byolwa nabyo abe mwine. Nanshi, pamo bwa Yoshua, wifunde ne kulama byobya byālembelwe pa mwanda wa kamweno kobe. Shi ulonge uno muswelo, nabya ukanekenya ne kulonga bintu na tunangu.

TOMPA KULONGA NAMINO

Lombela kumeso kwa kwifunda. Mu Bible mudi milangwe ya Leza Mwinē Bukomo Bonso yaālembeje mwanda wa kamweno kobe. O mwanda shi kotange Bible, lomba Leza akukwashe wivwanije’ye, ulame myanda’ya, ne kwiingidija mu bobe būmi.—Ezela 7:10.
Wiipangule bino bipangujo potanga Bible nansha mabuku esambila pa myanda ya mu Bible: ‘Le kino kisonekwa kimfundija bika padi Yehova? Le kikwatañene namani na musapu mwinemwine wa mu Kinenwa kyandi? Ne i muswelo’ka onkokeja kwingidija ino milangwe pa kukwasha bantu bakwabo?’
Langulukila pa byowifunda. Potanga ufwaninwe kwimana bidi ne kulanguluka’mba: Le ino myanda ibanengeja neivwane namani? Mwanda waka neivwana uno muswelo? Le itala namani myanda yauntene pa kala, intana dyalelo, nansha padi ikantana mu mafuku a kumeso? Le nkokeja kwingidija namani ino misoñanya ya mu Bible ne ano madingi mu būmi bwami? (Yoba 23:5; Ñimbo ya Mitōto 49:3) Jingulula kine kisoñenya Yehova bantu bandi bepuke bibidiji bimobimo nansha byobya bibwanya kulupuka ku kilongwa kampanda.—Kupituluka 32:28, 29.
Ingidija malango obe potanga nsekununi ya mu Bisonekwa. Kimfwa, ubulwe’po kumona mu ñeni banababo na Yosefa mobamupotolweja ku bene Ishemele? (Ngalwilo 37:18-28) Le ubamone bika, kwivwana, ne kulula? Witūle pa kyaba kya bantu besambilwa’po. Le i bika byobalanga kadi le beivwene namani? Kulanguluka uno muswelo kukaloeja kifundwa kyobe kadi kikekala kya mvubu.
Ingidija bingidilwa bya kwifunda nabyo bilupwilwe mwanda wa kukukwasha ulonge bukimbi. Ingidija bingidilwa bidi mu lobe ludimi, bikale bitampe nansha bya pa Entelenete. Kokekaka kulomba bukwashi ku bakwabo bakulombole muswelo wa kwingidija’byo senene. Kimfwa Index des publications des Témoins de Jéhovah nansha Dibuku dya Bukimbi dya Batumoni ba Yehova, bikakukwasha usokole byobya binenenwe pa mitwe ya myanda mivule ne kutana nshintulwilo ya mavese mavule a mu Bible. Ingidija mbwejo idi mu Bisonekwa Bijila—Bwalamuni bwa Ntanda Mipya mu ludimi loyukile. Mudi myanda ya mvubu itala bwifundi bwa bifuko bya ntanda, mwilondelo wa bitatyi, bulēmi ne bipimo, ne bikwabokwabo.
Pituluka mu myanda mikatampe mwanda wa uvuluke myanda yowefunda’ya. Kadi kya mvubu nakampata, sapwila’yo ne bantu bakwabo. Lelo mudi myanda kampanda yobwanya kwingidija mu busapudi? Mu uno muswelo, kukakwatyilapo’tu bitupu ino myanda mikatampe ino ukeingidija ne pa mwanda wa bakwabo nabo bamwene’mo.