Le Dijina Dya Leza I Ani?

Shi ukimba kuyuka muntu, padi kintu kibajinji kyokalonga i kumwipangula’mba, “Le dyobe wi ani?” Shi wipangule Leza kino kipangujo, le ukalondolola namani?

“Ami ne Yehova. Dyo dyami dijina.”​—Isaya 42:8.

Le kashā kwaivwene dino dijina? Shi i amo, nankyo i byendele’mo, mwanda balamuni bavule ba Bible bengidijanga dijina dya Leza na dimodimo nansha kuleka kwidingidija. Bavudile kwidipingakanya na kitenta “MFUMWETU.” Inoko na bubine dijina dya Leza ditanwa kintu kya misunsa 7 000 mu bilembwa bya Bible bya mu ludimi lubajinjibajinji. Dino dijina didi na masomo a tumama aná a Kihebelu, adingakene na YHWH nansha na JHVH, kadi alamunwanga tamba kala bu “Yehova” mu Kiluba.

Dijina dya Leza didi mu bilembwa bya Kihebelu kadi ditanwa mu malamuni mavule

KIKADILE DIJINA DYA LEZA NA MVUBU

Dino dijina didi na mvubu kudi Leza aye mwine. I kutupu wāinikile Leza dijina; ino i aye mwine wēinikile’dyo. Yehova wānenene amba: “Dino’di dyo dyami dijina dya nyeke, kadi e mo mwa kumvulukila ku lukongo ne lukongo.” (Divilu 3:15) Dijina dya Leza ditanwa misunsa mivule mu Bible kupita kitenta kyandi kyo-kyonso, kimfwa Mwinē Bukomo Bonso, Tata, Mfumwetu, nansha Leza, kadi ditanwa’mo misunsa mivule kupita dijina dya muntu ye-yense, kimfwa Abalahama, Mosesa, Davida, nansha Yesu. Ne kadi Yehova ye usakile kuyukanya dijina dyandi. Bible unena’mba: “Bantu bayuke amba abe, wa dijina dya bu Yehova, Abe bunka bobe wi Mwine wa Peulu Mwine pa ntanda yonso.”​—Ñimbo ya Mitōto 83:18.

Dino dijina didi na mvubu kudi Yesu. Mu lulombelo lwitwa bu lwa Tata Wetu nansha lwa Mfumwetu, Yesu wāfundije balondi bandi balombele kudi Leza namino amba: “Dijina dyobe dipandulwe.” (Mateo 6:9) Yesu aye mwine wālombele kudi Leza amba: “Tata, tumbija dijina dyobe.” (Yoano 12:28) Kutumbija dijina dya Leza kwādi pa kifuko kibajinji mu būmi bwa Yesu, o mwanda wānenene mu milombelo amba: “Nayukanya dijina dyobe kobadi kadi nkediyukanya.”​—Yoano 17:26.

Dino dijina didi na mvubu ku boba bayukile Leza. Bantu ba Leza ba pa kala bādi bevwanije amba dijina dya Leza dya bunka dibwanya kwibakinga ne kwibapandija. “Dijina dya Yehova i kiteba kikomo. Moloke unyemenanga’mo wakingwa.” (Nkindi 18:10) “Ense wa kwita dijina dya Yehova ukapandanga.” (Yoela 2:32) Bible ulombola’mba dijina dya Leza dishiyañanyanga boba bamwingidila. “Mwanda bantu bonso bakananga, ense mu dijina dya leza wandi, ino batwe tukananga mu dijina dya Yehova Leza wetu nyeke ne nyekeke.”​—Mika 4:5; Bilongwa 15:14.

BYOBYA BILOMBOLA DIJINA DYA LEZA

Dijina dya bunka diyukanyanga Leza. Befundi bavule i bafule ku kunena’mba dijina Yehova dishintulula’mba “Wikadija Ke.” Yehova Leza wālombwele nshintulwilo ya dyandi dijina paēsambīle padi aye mwine kudi Mosesa amba: “Nkekalanga Kyokya Kyontonga Kwikala.” (Divilu 3:14) Nanshi dijina dya Leza dishintulula bivule kupita kitenta kyandi kya bu Mupangi mwine wikadije’ko bintu byonso. Dijina dyandi dilombola bukomo bwandi bwa kwikala monso mwasakila nansha kwikadija kipangwa kyandi monso mwasakila mwanda wa kufikidija mpango yandi. Bitenta byobibwanya kulombola bukatampe bwa Leza, lupusa lwandi, nansha bukomo, ino i enka dijina, Yehova, diyukanya monso mwaikadile ne mwabwanya kwikadila.

Dino dijina dilombolanga’mba Leza witutele mutyima. Nshintulwilo ya dijina dya Leza itala ne kulamata kwalamete bipangwa byandi, kubadila’mo ne batwe. Ne kadi kuyukanya kuyukenye Leza dijina dyandi kulombola’mba usakanga tumuyuke. Kadi, wākwete’ko mulangwe wa kwitulombola dijina dyandi batwe ketwamwipangwile’dyo. Na bubine, Leza kasakengapo tumumone bu kilezaleza kya bitupu kidi kulampe, ino i bu Muntu udi’ko bine otubwanya kufwena.​—Ñimbo ya Mitōto 73:28.

Kutela dijina dya Leza kulombolanga’mba tumusenswe. Kimfwa, ubwanya kunena muntu omwene bu mulunda nobe akwite pa dyobe dijina. Le ukeivwana namani shi muntu’wa upela’nka kupela kukwita pa dyobe dijina? Kyaba kimo ubwanya padi kwiipangula shi muntu’wa usakanga na bubine kukufwena. Ye mobikadile ne na Leza. Yehova i mulombole bantu dijina dyandi, kadi witukankamikanga twiditele. Kitatyi kyotwiditela, tulombolanga Yehova amba tusakanga kumufwena. Mwanda aye umonanga’nka ne “boba balangulukila pa [nansha, “balēmekele,” kunshi kwa dyani] dijina dyandi”!​—Malaki 3:16.

Kwifunda dijina dya Leza kyo kintu kibajinji kya mvubu pa kumuyuka. Inoko ketufwaninwepo kukadikila’nka papo. Tufwaninwe kuyuka ne Muntu mwine wityilwa pa dino dijina. Tufwaninwe kwifunda mwaikadile.