Le I Bika Bikalonga Leza?

Shi wadi’mba udi mu makambakano, wadi wa kusaka mulunda muyampe alonge’po kintu mwanda wa kukukwasha. Na kino mu ñeni, bamo banenanga’mba Leza ke mulundapo mwanda bamwene amba Leza kaloñangapo kintu nansha kimo mwanda wa kwibakwasha. Na bubine, Leza ke mulonge bintu bivule mwanda wa kamweno ketu, kadi ukalonga’po kintu mwanda wa kutalula bikoleja ne masusu onso otwikonda nao dyalelo. Le i bika bikalonga Leza?

MFULO YA BIBI BYONSO

Leza ukafudija bibi byonso na kutalula’ko bine bilengeja’byo. Bible ulombola bine bilengeja’byo panena’mba: “Ntanda yonsololo idi mu lupusa lwa yewa mubi.” (1 Yoano 5:19) “Yewa mubi” ke ungipo, i enka yewa wāityilwe na Yesu bu “mulopwe wa ino ntanda,” ke Satana Dyabola kadi. (Yoano 12:31) Lupusa lwa Satana lutādile bantu pano pa ntanda ye alo luleta makambakano pano pa ntanda. Le i bika bikalonga Leza?

Yehova Leza usa kulonga’po kintu panopano ponka kupityila kudi wandi Mwana, Yesu Kidishitu, amba “onakanye yewa ubwanya kuleta lufu, ko kunena’mba, Dyabola.” (Bahebelu 2:14; 1 Yoano 3:8) Na bubine, Bible ulombola’mba Dyabola aye mwine uyukile amba “udi na kakitatyi katyetye” kamushadila’ko. (Kusokwelwa 12:12) Kadi Leza ukatalula’ko ne bonso balengeja bibi.​—Ñimbo ya Mitōto 37:9; Nkindi 2:22.

KWALAMUNA NTANDA KE PALADISA

Pa kupwa kutalula’ko bibi byonso pano pa ntanda, Mupangi wetu ukalonga’po kintu mwanda wa kufikidija mpango yandi ya nyeke itala bantu ne ntanda. Le i bika byotubwanya kutengela?

Ndoe ya nyeke ne mutyima-ntenke. “Betyepeje bakapyananga ntanda, kadi bakaloelelwanga bininge mu bungibungi bwa ndoe.”​—Ñimbo ya Mitōto 37:11.

Byakudya bivule kadi biyampe. “Kukekalanga miseke mivule pa ntanda; ikekalanga mingimingi pangala pa ngulu.”​—Ñimbo ya Mitōto 72:16.

Mobo mayampe ne mingilo isangaja. “Bakobakanga mobo ne kwikala’mo, kadi bakadimanga madimi a mañanza ne kudya bipa byao. . . . Batongwe bami bakasangela bya binebine mingilo ya makasa abo.”​—Isaya 65:21, 22.

Lelo wabilanga kwimwena bino bintu? Panopano ponka bantu bonso basa kwimwena’byo difuku ne difuku.

KUTALULA’KO MISONGO NE LUFU

Dyalelo muntu yense ubelanga ne kufwa, ino kebikekalapo nyeke uno muswelo. Leza usa kwingidija panopano ponka byabuyabuya bya kitapwa kya Yesu kya kinkūlwa amba “ense ulombola lwitabijo mudi aye kakyonakanibwa, ino amone būmi bwa nyeke.” (Yoano 3:16) Le bikekala namani?

Misongo ikatalulwa’ko. “I kutupu mwikadi ukanena’mba: ‘Nabela.’ Bantu bakekala mu ntanda’ya bakalekelwa kilubo kyabo.”​—Isaya 33:24.

Lufu kelukasusulapo bantu monka. “Ukamina lufu nyeke, kadi Mfumu Mwinē Lupusa Lonso Yehova ukapampula impolo mu mapala onso.”​—Isaya 25:8.

Bantu bakekala’ko nyeke ne nyeke. “Kyabuntu kipāna Leza i būmi bwa nyeke mudi Kidishitu Yesu Mfumwetu.”​—Loma 6:23.

Boba bafwile bakasangulwa. “Kukekalanga lusangukilo lwa boloke ne bakondame bene kumo.” (Bilongwa 24:15) Bakamwena mu kyabuntu kya Leza kya kinkūlwa.

Lelo Leza ukalonga bino byonso’bi namani?

KUSHIMIKWA KWA UMBIKALO MUBWANININE

Leza ukafikidija mpango yandi itala bantu ne ntanda kupityila ku umbikalo wa momwa mūlu, uludikwa na Yesu Kidishitu bu Mulopwe mutongwe. (Ñimbo ya Mitōto 110:1, 2) Uno ye umbikalo nansha bulopwe bobāfundije balondi kudi Yesu kulombela’mba: “Tata wetu udi mūlu, . . . Bulopwe bobe bwiye.”​—Mateo 6:9, 10.

Bulopwe bwa Leza bukabikala ntanda yonso ne kupwa bulanda ne masusu onso adi’po. Buno Bulopwe o umbikalo muyampe kewaikele’ko kashā pa muzo wa muntu. O mwanda Yesu wādi utakamene na kusapula “myanda miyampe ya Bulopwe” mu mwingilo wandi wa pano panshi ne kulombola bandi bana ba bwanga nabo basapule’yo.​—Mateo 4:23; 24:14.

Pa mwanda wa buswe bukatampe bwaswele bantu, Yehova Leza i mulaye kwibalongela bino bintu byonso bya kutendelwa. Le kino kekikulengejepo usake kumuyuka ne kumufwena? Lelo byobya byokatonga kulonga bidi na kamweno’ka kodi? Kishinte kilonda’ko kisa kushintulula uno mwanda.