Le Kuyuka Leza Kudi Na Kamweno’ka Kodi?
Kufika ne pano, tubalonga bukomo bwa kutana malondololo ku kipangujo kinena’mba, Lelo Leza i ani? Twashilwile na kwifunda mu Bible amba dijina dyandi i Yehova ne amba ngikadila yandi mikatampe kutabuka i buswe. Kadi twabandawile byakadi mulonge ne byakalonga mwanda wa kamweno ka bantu bandi. Shako kukidi bintu bivule bya kwifunda padi Leza, ino ubwanya padi kwiipangula byobwanya kumwena’mo.
Yehova i mulaye amba, “shi umukimbe, aye ukesokwela kodi.” (1 Bilongwa 28:9) Langa’po bidi kyabuntu kilēme kikutengele shi ukimbe Leza ne kumuyuka—“bulunda bwa binebine na Yehova”! (Ñimbo ya Mitōto 25:14) Le i bika byobwanya kumwena mu buno bulunda?
Nsangaji ya bine. Yehova i mutelwe bu “Leza wa nsangaji.” (1 Temote 1:11) Kufwena kwadi ne kulonda mashinda andi kukakuletela nsangaji ya bine, mine ibwanya kukukwasha mu malango, mu ñeni ne ku ngitu. (Ñimbo ya Mitōto 33:12) Kadi ukekala na būmi bwa nsangaji shi uleke mwikadilo mubi wa mu būmi, utamije bibidiji biyampe, ne kwikala mu kipwano kiyampe na bakwenu. Bine, uketabija binenwa bya mulembi wa mitōto bya amba: “Kufwena kudi Leza i kuyampe kondi.”—Ñimbo ya Mitōto 73:28.
Kutebwa mutyima. Yehova wālaile bengidi bandi amba: “Nkakupanga madingi ne diso dyami podi.” (Ñimbo ya Mitōto 32:8) Kino kishintulula’mba Yehova utanga bengidi bandi umo ne umo mutyima, ne kuta’o ku bisakibwa byabo. (Ñimbo ya Mitōto 139:1, 2) Shi upwane kipwano kilumbuluke na Yehova, ukayuka’mba udi’ko nyeke pa mwanda obe.
Būmi buyampe bwa kumeso. Kutentekela pa kukupa muswelo wa kwikala na būmi bwa nsangaji dyalelo, Yehova Leza i mukupe ne mukenga wa kukekala na būmi bulumbuluke bwa kumeso. (Isaya 48:17, 18) Bible unena’mba: “Buno’bu bo būmi bwa nyeke, bendelele kukuyuka abe, Leza umo kete wa bine, ne yewa owatumine, Yesu Kidishitu.” (Yoano 17:3) Mu bino bitatyi bya makambakano, lukulupilo lwitupele Leza lubwanya kwikala pamo bwa ñanga, lwitukwasha twikale ‘ba binebine kadi bashimatyije.’—Bahebelu 6:19.
Buno i bubinga’tu butyetye bwa kuyukila Leza senene ne kupwana nandi. Shi usaka kuyukila’ko myanda mivule ya kamweno, tukulomba wisambe na Kamoni wa Yehova ye-yense nansha kutwela pa jw.org.