Tutendelei Yehova Na Byabuntu Byetu Bya Kwisakila

¹ “Afingwe mafingo yewa udimbañana, udi ne [nyema] mulume mu luombe lwandi, kadi upika mpiko ne kutapija kitapwa kudi Yehova kintu kibole; mwanda ne mulopwe mukatakata; i Yehova wa bibumbo unena.” (Malaki 1:14) Lelo tumwene amba i kintu kyeni pa kumona bantu bakubulwa kubwaninina bapa Umpangi kintu kampanda? Bintu byonso bidi mūlu ne pano panshi i byandi. Leza aye mwine unena mu Kinenwa Kyandi’mba: “Ndalama i yami, ne nsahabu mine i yami.” (Hakaï 2:⁠8) Leza kadipo mvubu na byetu byabuntu, mwanda i mwibwaninye kala byandi byonso aye mwine. Mulopwe Davida wājingulwile’mba byotudi bantu, ketukokejapo kupeteja Mwinebukomobonso mu muswelo nansha umo. Ino, bintu byonso byotumupanga, shi bika, shi bika, tumujokejejanga kipindi kityetye bininge kya bintu byāetupele, aye nsulo ya “byakupanwa bilumbuluke ne byabuntu bibwane.” Lelo kino kishintulula’mba byabuntu byotutūlanga mwanda wa butōtyi bwa Yehova kebidipo na mvubu ku meso andi? Lelo Leza ushikilwe byabuntu byotutūla bya kwisakila? Mulembi wa Mitōto ulondolola’mba: “Letai kyakwela, mwiye mu bipango byandi.”​—⁠Mitōto 96:⁠8.

² Mwingilo wetu wa busapudi bwa myanda miyampe ya Bulopwe lelo ukwatakanibwanga mu ino yetu ntanda na lupeto lutambanga kwepi? Lutambanga ku byabuntu bya kwisakila bitūlwanga na bengidi ba Yehova ne na bantu ba kusaka kuyampe. Bino byabuntu byo abyo bingidijanga bulongolodi bwa Yehova mwanda wa kukwasha bapania ba pabula, bamishonele ne batadi bendakana, pamo ne bana betu bengila ku Betele. Tulangulukeipo bidi pa buvule bwa lupeto lujiminanga pa kufutyila mabuku ne milami bitumwanga mu bipwilo 2200 ne kupita bya mu Burundi, bya mu Congo ne bya muno mu Zaïre. Kimfwa, lelo tuyukile buvule bwa lupeto lufwaninwe kuteakanya nalo bitango bya distrike? Le tukanena kika pamwanda utala mingilo ya kusoneka mabuku ne pa kutampa’o? Lelo nabubine luno lupeto lonso lutambanga kwepi? Nabubine, kufika enka ne pano, kubwipi kwa lupeto lonso lwingijibwanga lutambanga ku byabuntu bya kwisakila bitutuminanga batutu ne bakaka ba mu matanda a bweni, kimfwa Belgique, France, ne makwabo. Bano bana betu batūlanga bino byabuntu bavule ke bampetapo, mhm. Ino i batōtyi ba Yehova balombola mutyima wabo wa kufwijako pamwanda wa bintu bya kumushipiditu byotupebwa. Batele mutyima wabo ku mutōtelo wa Yehova, omwanda batūlanga ku mpenga kyabuntu kya kutūla ku njibo ya Yehova kitatyi ne kitatyi. (Tala 1 Kod. 16:⁠2) I bana-balume ne bana-bakaji, bana, bankasampe ne bakulumpe, pamo’nka na mobekadile muno mwetu.

³ Mu myaka katwa imbajinji ya mu kino kyetu kitatyi, mutumibwa Polo wāninye kipwilo kya mu Fidipai namino amba: “Nanshi mwalongele biyampe papo po mwapwanine nāmi ne kyamalwa kyami. . . . Mwanda banwe mwantumine kyo nabudilwe, dimo ne dikwabo, mu Tesalonika.” (Fid. 4:​14, 16) Lelo tukokeja kunena’mba netu motulongelanga mu uno wetu mwaba? Lelo netu tukokeja kulombola mushipiditu mulumbuluke pamo bwa uno? Lelo umo ne umo umbukata mwetu ukokeja ne wabilanga kulombola mutyima wa kufwijako kupityila ku kutūla byabuntu pamwanda wa bintu bya kumushipiditu byotupebwanga? Mu myeji yapityile kunyuma’i, byabuntu byotwatambwile byatūdilwe na bana betu ba muno mu Zaïre byafikile pa mwayene wa nuvo Zaïre 180 ku musapudi ne musapudi. Pa kufuta lupeto lonso lwa kuvuija nalo mwingilo wa kusapula myanda miyampe mu ino yetu ntanda, byabuntu bya kwisakila bifwaninwe kutūlwa ku kweji ne kweji bifwaninwe kufikila pa kibalwa kya madollar 4,45 ku musapudi ne musapudi.

⁴ Kukwatañana na kuno kubandaula kwalongwa kungala’ku, i kimweke patōka’mba tufwaninwe kwibandaula mwanda wa kuyuka misokwe mine idi mu uno wetu mwaba i misokwe’ka yotukokeja kwingidija tubwanye lupeto lonso lwa kwendeja nalo mwingilo wa Bulopwe. Tufwaninwe kuta mutyima bininge ku musoñanya wāletele Polo mu mukanda wandi wabubidi, mu shapita 8, wātumine kudi bene Kodinda. Shi binebine tutendelanga madyese otudi nao a kwingidila Yehova, nankyo tukatūla ne byabuntu ‘mungya yetu misokwe’ (vese 3). Kifwaninwe muntu ne muntu ebandaule aye mwine, ‘ino wivwane kudi dibajinji kiswamutyima kiyampe, nankyo i kya kwanwa, mungya mwendele kyokya kidi na muntu, ke mungya kyokya kyakadipo nakyo, enhe.’

⁵ Lelo ketukokejapo kuyata pa “tutyetye totudi nato” mwanda wa kutūla byabuntu ku mutōtelo ujila? Padi umo ukokeja kunena’mba: “Ami, nsenswe kutūla binebine, ino nkidipo na pa kwela kuboko.” Padi kikokeja kwikala kikomo ku bamo-bamo kutabuka ku bakwabo. Bansongwanzele ne banunu, bana-balume ne bana-bakaji, bankasampe ne bakulumpe, batwe bonso tukokeja kwībandaula senene mwanda wa kuyuka mu buluji bulumbuluke kyabuntu kyotukokeja kutūla kitatyi ne kitatyi. Ketufwaninwepo kufwa bumvu amba mwanda nakatūla katyetye kupita, mhm. (Tala Luka 21:​2-4) Shi muntu ne muntu utūla ne mutyima umo na nsangaji, ne shi boba badi na muswelo nabo batūla byabuntu bivule, nankyo kukekala kwinzankana ku bamo babudilwe’ba.​—⁠2 Kod. 8:​13, 14; 9:⁠7.

⁶ Kitango kya bakulumpe pa kipwilo kifwaninwe kulonga bukomo mwanda wa kuno kufwijako kwikale kutamijibwa mu kipwilo. [Tala ne milangwe idi mu Kiteba kya Mulami kya mu kweji 12, 1992, paje 2 ne 3 musāngo 8-10, ne paje 10 musāngo 16 ne 17, isambila pa kya kujikija.] Bakulumpe mukokeja kupityija musapu mu kipwilo ulombola mbila ityibilwe pa kibalwa kya lupeto kifwaninwe kutuma ku musambo ku kweji ne kweji. (Ta mutyima ku kubandaula Mwingilo Wetu wa Bulopwe wa mu kweji 8, 1994 ulombola muswelo ufwaninwe kupityija musapu uyukija mbila ityibilwe pa mwanda utala kipwilo kyonso.) Kino kibalwa kikokeja kwenda kutunduluka ku kweji ne kweji kulonda mungya mwenda mutamina kipwilo kumushipiditu ne mungya madyese otukeselwa na Yehova.​—⁠Nkindi 10:⁠22.

⁷ Wivwane tupāne na nsangaji ne na mutyima wabuntu mwanda wa kukwatakanya mutōtelo wabine, nankyo tuyukei’mba bine ne bine ponka, tukatundubuka. Tutei matwi ku bino binenwa bya kwitukankamika bidi mu Nkindi 3:​9, 10, binena’mba: “Lēmeka Yehova ne [na] bintu byobe [byabulēme] bine, ne byamulakisho bya ntundubuko yobe yonso, nabya ko kuyula bitala byobe bikayula bā.” Shi tulonge uno muswelo, nankyo i kufwija kotwafwijako Yehova pamwanda wa madyese aetwesela a kumwingidila mwingilo ukola. Wivwane muntu ne muntu atūle byabuntu bya kwisakila, nabya tukakwatakanya mwingilo wa kwendeja mutōtelo ujila kumeso mu uno wetu mwaba. Nakampata tuvulukei’mba: shi tulonge namino, nankyo tubalemeka Yehova na bintu byetu bya bulēme.