Lelo I Mpangiko Ya Muswelo’ka Yotuteakenye mu Kitatyi Kya Konje Wa Masomo?
Kitatyi kyotulanguluka ku kweji 7, wamwanda ne wakitema, tulangulukei ne ku mpangiko yotufwaninwe kukwata mwanda wa tukatanwe ku kitango kya distrike, ne ku bitatyi bikwabo bya kwipwija mukose, lunango nansha bupempudi bulumbuluke bwa kukapempula bambutwile nansha balunda netu. Ivwanai myanda ikokeja kwitukwasha tukatūle kamweno ka Bulopwe pa kifuko kibajinji, kitatyi kyotwiteakanya mwanda wa kino kitatyi:
◼ Tukwatei mpangiko mipotoloke mwanda wa kukatanwa ku kitango kya distrike. Tuteakanyei pa kukalala ne lupeto lwa dishinda mwanda wa kutyina kukafikilwa na makambakano.
◼ Shi tuwaenda mu konje, twilongololei mwanda wa kukatanwa ku kupwila pa kipwilo kyotukafikila’mo ne kutambila nabo mu busapudi. Tutei mutyima wa kutuma lapolo wetu wa busapudi kudi mulembi wa pa kyetu kipwilo; shi kibwanika, twiitume mu dishinda dipela ne dyotukulupila’mba ikokeja kufika senene.
◼ Kitatyi kyotupempula bambutwile betu bakubulwa kwitabija bubinebine, kikokeja kwitupa muswelo wa kwibapa musapu wa kiponka na ponka wa kamweno. Tutei mutyima wa kusela Bible wetu ne mabuku makwabo.
◼ Pano tukesamba kika pamwanda utala bukwashi bwetu ku kipwilo kidi pabwipi na kotudi ne kikimba bukwashi mwanda wa kuvuija mwingilo mu mwaba wakyo? Bakulumpe nansha ke batadi ba bipindi bakokeja kwitupa bulombodi bwa bisakibwa bya mu kipindi kyotwendamo’kya.
◼ Mu kitatyi kya makonje a ku masomo i kitatyi kilumbuluke kipāna mukenga ku bankasampe wa kuvudija mwingilo wabo wa busapudi. Bankasampe, lelo kemukokejapo kwikala bapania bakwashi?
◼ Shi tukasapule bininge mu kyolwa, kitatyi kidi bantu bavule ku mobo abo, ketukabulwepo kukatana bipa biyampe ne kupityija bitatyi bilumbuluke.
◼ Bakulumpe bafwaninwe kuteakanya mingilo ya pa kipwilo senene, na kukwata mpangiko ya kupingakenya bakwabo pa mingilo ya boba bakenda mu konje.
Tuvulukei amba ‘mpangiko ya muntu mupyasakane itwalanga enka ku bungibungi.’ (Nk. 21:5) Tuteakanyei kitatyi kyetu mwanda wa tuputumine nakampata mu mingilo ya kiteokratike.