Tuteakanyei Muswelo Wetu Wa Kupāna Mapepala
1 Tutendelanga Kiteba kya Mulami ne Amkeni! pamwanda wa bishinte byabyo bifike’po kadi byūbaka, bisambila pa myanda yonso, tamba ku ilongekele umbantu pano-pano kutūla ne ku ya “bintu bikomo bīne bya Leza.” (1 Kod. 2:10) Batwe bonso tukivuluka bintu bivule bipya kadi byūbaka byotwatangile mu ano mapepala engidija Yehova mwanda wa kwitusokwela bityebitye bubinebine. (Nk. 4:18) Kadi twabilanga byabine kwiapāna bininge na bukomo.
2 Tubandaulei Mwaba Wetu: Mu kipindi kyetu, lelo mushikete bantu ba muswelo’ka? Shi mudi bantu basenswe kwielaela, nankyo tutei mutyima wa kupāna musapu patōkelela, na kulombola bukidi-bukidi kyotuidile. Inoko, shi bekadi ba mu mwaba wetu bashikete talala, tukokeja papo shapo kutandabula mīsambo yetu. Mu bifuko mudi bantu bavule bengila mu dyuba, kikekala kilumbuluke kukebapempula kwabo shi dyuba dibapūluka nansha ku kyolwa. Dyuba dyonso, tukokeja kutana bamo-bamo mu busapudi bwa mu bipito nansha bwa ku mangajini ne mangajini. Basapudi bamo-bamo batananga bipa bilumbuluke kitatyi kyobobololanga bantu mu bifuko bishikwanga’mo byendwa nabyo, nansha mu biwanza mukeololanga bantu.
3 Tuyukei Biyampe Mapepala Etu: Tutangei nimero ne nimero yonso enka kitatyi kyotwiitambula. Tutongei bishinte byotumona’mba bikokeja kusangaja bekadi ba mu mwaba wetu. I myanda’ka ibakambakanya? Mu kishinte kyotumona’mba ye kyotukengidija, tukimbei’mo kisonekwa kifike’po kyotukeja kukatela. Tusokolei’mo kipangujo kyotukepangula mwanda wa kusamuna milangwe ya mwisambi netu. Tutongei’mo vese mufwaninwe otukamutangila shi tubakamone kitatyi. Kumfulo, tulangulukei pa muswelo otukokeja kumulombola buluji botwamulombela lupeto ne kuteakanya kujokelamo kupya.
4 Tuteakanyei Binenwa Byetu bya Kitwelelo: Tutongei senene bishima bibajinji byotukanena pa kwitēla ne bya kushilula nabyo mīsambo. Bamo batananga bipa bilumbuluke na kunena’mba: “Natangile kishinte kimo kiyampe mu dino dipepala, ne nsepelele kuyukija’kyo bakwetu.” Bavule bashilulanga na kipangujo kitonwena ku mīsambo mungya mulangwe obadi bateakenye kwisambila’po. Kimfwa:
5 Shi tupāna dipepala disambila pa kwilundila’ko kwa bupolapola, tukokeja kwipangula’mba:
◼ “I kika kifwaninwe kulongibwa mwanda wa kusaka tushikate ku matwi talala, pampikwa moyo wa kwibwa nansha wa kutambwa?” Shintulula’mba tupotolwele myanda itala pa muswelo ukapwa ano makambakano mu kitatyi kyafwena kikatukidila tuvutakanya tonso tudi umbantu. Tela myanda idi mu dipepala ileta bubinga bwa kukulupila mu kuno kwalamuka. Pokajoka dikwabo, ukakokela milangwe ya uno muntu pa shapita 1 wa dibuku Buyuki.
6 Kitatyi kyotupāna dipepala disambila pa būmi bwa kisaka, tukokeja kunena’mba:
◼ “Bambutwile bavule bayukile’mba kulela kisaka mu ano etu mafuku ke mwandapo upēla. Bitabo bingibingi i bisonekelwe uno mwanda, ino nansha ke bañeni bene bapotolwele uno mwanda bepatanyanga umbukata mwabo. Lelo kudi muntu ubwanya kwitupa madingi malulame?” Tela myanda idi mu dipepala ilombola madingi a tunangu atanwa mu Bible. Pojokela kutala uno muntu, wisambile nandi pa milangwe ya mu Bible itala pa kufundija bana, itanwa pa paje 145-148 mu dibuku Buyuki.
7 Pa kupāna dipepala disambila pa mwanda kampanda ulongekele umbantu, tukokeja kunena’mba:
◼ “Bantu bavule badi na mityima kūlu pamwanda wa kino kitatyi kilenga nzuba kyotudi’mo. Le ulanga’mba Leza wētutungile kwikala mu uno muswelo?” Lombola kishinte kisambila pa muswelo ukafula makambakano adiko dyalelo nansha kileta bubinga bwa kutengela mafuku akāya kumeso, otukakulwa ku moyo onsololo. Mu kujokelamo kulonda’po, wisambile pa kifwatulo ne myanda idi pa paje 4-5, mu dibuku Buyuki, kupwa ushilwididile ne kifundwa kya Bible.
8 Tukwatañanyei Musapwilo Wetu na Mwisambi Netu: Bantu botutananga batambanga mu bifuko bishileshile, kadi muntu ne muntu ne byandi byasakanga. Tuteakanyei musapwilo umo wakyalwilo uketukwasha tukwatañanye myanda na mwisambi netu. Tulangei dibajinji byotukanena shi tubatana mwana-mulume nansha mwana-mukaji, mununu nansha nkasampe. Kekudipo mbila itūlwa pa uno mwanda. Twingidijei misapwilo yotuyukile senene, yotumwenanga’mo bipa bilumbuluke. Mu bino byonso, twikalei na kyanga, tunenei myanda ishiluka ku mutyima ne twikalei kuteja senene. Boba badi mu ‘ngikadilo mifwaninwe’ bakajingulula kusumininwa kwetu ne bakatengwa pa mityima.—Bil. 13:48.
9 Twikwashei Batwe Bonso: Shi twishinta milangwe na bantu bakwabo, muswelo wetu wa kwisamba ukalumbuluka. Tukamwena’mo bwino ne kikulupiji shi tupituluka mu misapwilo yetu pamo na bengidi netu. (Nk. 27:17) Namino tukapēlelwa kusapula ku mobo a bantu. Kadi, bambutwile bafwaninwe kwitūdila’ko kitatyi kya kukwasha babo bana bekale kwiteakanya, kya kwibateja pobapituluka mu misapwilo yabo ne kwibapa madingi belemunune. Ku bapya nako, kusapula pamo na basapudi babwino kukebakwasha bininge.
10 Kuteakanya muswelo wetu wa kupāna mapepala kekufwaninwepo kwikala bu kitundu kilēma. Kilomba’tu kuta mutyima ku kintu kifwāninwe kukanena ne mwa kukekinenena mu muswelo ukoka. Tukokeja kusokola musapwilo muyampe mpata ukatenga bemwvaniki bilumbuluke, shi twikankila ku kunena na bwino ne ku kwingidija bimfwa bya bintu biyukane.
11 Kupāna mapepala i muswelo umo wakamweno witukwasha mu kusambakanya musapu wa Bulopwe pano pantanda ponso. Shi tukokeja kwabanya Kiteba kya Mulami ne Amkeni! mu makasa a bantu bampikwa budimbidimbi, bine ano mapepala akanena ao mene. Tuvulukei nyeke mvubu yao, ne amba adi na misapu ikokeja kupandija būmi. “Kulonga biyampe ne kupana bya kupana” ku bakwabo mu uno muswelo kusangajanga Yehova pa mutyima.—Bah. 13:16.