Tukankamanei Mu Kulonga Kujokelamo Kupya

¹ Lelo usenswe kulonga kujokelamo kupya? Ye mokikadile ne ku basapudi bavule. Padi ku ñanjilo wakidi bidi wishisa, nakampata pa kujokela bantu balombwele kusepelela kutyetye mu kupita kobe kubajinji. Ino byowadi wenda ‘ukankamana ne kukankamana mudi Leza wetu mu kwisamba myanda miyampe’ na kulonga kujokelamo kupya, padi watulumukile pa kumona mupēlela uno mwingilo ne mowikadile usangaja mpata. (1 Tes. 2:⁠2) Tukokeja kwiubwanya namani?

² Bine, kujokelamo kupya i kwishile na kufikila muntu dibajinji. Mu kujokelamo kupya ukesamba na muntu muyukane, ke na mwenipo, kadi kikalanga nyeke kipēla kwisamba na muntu okodi kala mumone. Twisokwelanga madyese makatampe pa kwipāna mu uno mwingilo: kujokelamo kupya kukokeja kutwala ku bifundwa byendelela kumeso.

³ Potwendanga tusapula ku njibo ne njibo, tutananga nyeke bantu kebasepelele musapu potwesambile nabo mafuku a kunyuma. Mwanda waka kadi twendelelanga na kwibapempula? Mwanda tuyukile’mba ngikadilo ya bantu yalamukanga, muntu wadi umweka bu upumpunya nansha upela musapu, ukokeja kusepelela’o mu musunsa mukwabo. Byotwayuka namino, twiteakanyei senene ne kulomba Yehova etupe buludiki bwandi mwanda wa bantu bekale kuta kutwi ku myanda yotukanena.

⁴ Shi potusapula ku njibo ne njibo, tusangela kusapwila bantu kebalombwele kusepelela dibajinji, mwene nankyo i kyendelemo kutabuka tusangele ne kwenda kukamona boba bonso batele mutyima ku musapu wa Bulopwe?​—⁠Bilongwa 10:​34, 35.

⁵ Bavule umbukata mwetu badi mu bubinebine dyalelo mwanda musapudi kampanda wāikele kwendelela na kwibajokela na mutyima umo misunsa mivule. Shi kidi uno muswelo, twiipangulei bidi amba: ‘Lelo i milangwe’ka yonālombwele kudi uno musapudi musunsa umbajinji? Le nāitabije musapu wa Bulopwe ponka ponewivwene’ni? Nansha naikele kwiupumpunya bidi?’ Tufwaninwe kusangala, mwanda musapudi wāile kwitutala, wētumwene bu bantu bafwaninwe kujokelwa dikwabo, ‘wakankamene ne kukankamana mudi Leza,’ wāiya kwetu ne kushilula kwitufundija bubinebine. Lelo i kika kyotukokeja kunena pa boba balombola dibajinji kusepelela, ino kumfulo bashilula kukimba pa kwitwepukila? Tufwaninwe kwikala nyeke na kikulupiji amba bikapita enka biyampe, pamo na mwikilombwela uno mwanda ulonda’ko.

⁶ Difuku dimo lubanga, basapudi babidi bana-bakaji badi bapāna bukamoni mu kipito, ebiya batana mwana-mukaji umo wenda utonona pushipushi. Waitabija dipepala, kadi waita bano bakaka bende kwandi mu dyayenga dilonda’ko. Nabo baenda enka pa nsaa mitungwe, batana’ko mwingidi wa njibo mwana-mukaji, webalombola amba mwine lolo’wa kadipo na kitatyi kya kwisamba nabo. Ino, wēbalaya bakaye yenga wiya’ko. Bakaka kebakulupīlepo amba ukalēmeka kilayeno, ino pa kujokela’ko dikwabo, bamutana wibakunga. Kifundwa kyashilula, ne kadi kwendelela kwa uno mwana-mukaji kwadi kutulumukwa. Kaijijepo, washilula kala kutanwa ku kupwila kitatyi ne kitatyi, kupwa katambila ne mu mwingilo wa busapudi. Pano kemubatyijibwe kala.

⁷ Twalei Byalwilo Tamba’nka mu Mīsambo Imbajinji: Divule, kyalwilo kya kujokelamo kupya kwendekanga, kyalwanga mu mīsambo imbajinji. Tutejei mwisambi netu na katentekeji. Wanena kika? Utele mutyima ku mutōtelo’ni? Usepelela myanda ya mushikatyilo wa bantu’ni? ya sianse’ni? ya mānga’ni? nansha ya bifuko bishiketwe’mo? Kumfulo kwa mīsambo yetu, tukokeja kulupula kipangujo kilanguluja mwisambi netu ne kumulaya’mba, tukāya kumupa malondololo aleta’po Bible.

⁸ Kimfwa shi mwisambi netu wasangela mulao udi mu Bible utala pa paladisa pano patanda, nankyo i kipite buya kuteakanya mīsambo mikwabo itala’nka pa uno mwanda. Kumeso’tu kwa kutaluka kwenda, tubwanya kumwipangula’mba: “Lelo tukokeja kukulupila namani amba Leza ukafikidija uno mulao wandi?” Kupwa twabweja’ko amba: “Nsaka kukāya dikwabo, nkemutane kisaka kyonso pamo, mwanda wa kwimulombola malondololo aleta’po Bible.”

⁹ Shi muntu’wa kalombwelepo kusepelela pa mwanda nansha umo, tukokeja kulupula kipangujo kimo mu byobya bitanwa mu bimfwa bya kulondela’po bidi pa paje wamfulo mu Mwingilo Wetu wa Bulopwe, ne kwibingidija bu kyalwilo kya mīsambo yetu ikalonda’ko.

¹⁰ Tusonekei Myanda Yabine: Tukanda twetu twa ku njibo ne njibo tufwaninwe kusonekwa’po myanda yabine, kadi mipotoloke. Twandikei dijina ne adrese ya mwisambi netu enka potukitaluka pādi. Ketukisonekai nimelo ya njibo ne dijina dya kipito mungya mifwatakanyo yetu: tujingululei shi myanda yotwasoneka i yabine. Tusonekei ne myanda mikwabo itala pa muntu’wa, kimfwa kishinte kyotwesambila’po nandi, mavese otwatanga nandi, mabuku otwamushila ne bipangujo byotukāya kulondolola potukajoka musunsa mukwabo. Twandikei difuku, ne nsaa ya mīsambo yetu kadi ne kitatyi kyotwatunga kwiya kumupempula. Pano potwadinga senene uno fishi, ketwakijimijai’ye! Tumutūlei pantu potukulupile amba tukokeja kumusokola. Tulangulukei pa muntu’wa ne pa muswelo otukokeja kukashilula nandi mīsambo musunsa mukwabo.

¹¹ Ketwakilwai’ko Kitungo Kyetu i Kitungo’ka: Dibajinji, tufwaninwe kulonga bukomo bwetu bonso bwa kwikadija mwisambi netu mutyima mutūke, ino batwe basangamuke, bantu ba kipwano kya bulunda. Twilombolei amba tumutele mutyima bininge bu muntu netu, ino pampikwa kutūla’po kisense kibi. Ebiya tumuvulujei bipangujo byotwaipangwile musunsa wapityile. Tutejei na katentekeji milangwe yandi ne kumufwijako na mutyima umo pamwanda wa nshintulwilo yandi. Kupwa tumulombolei kikadile milangwe ya mu Bible yakamweno. Shi kibwanika, twalamukilei nandi ku mulangwe mukwabo wiifwene nao utanwa mu dibuku Buyuki Butwala ku Būmi Bwanyeke. Tuvulukei biyampe amba kitungo kyetu kikatampe kyotulongela kujokelamo kupya i kushilula kifundwa kya Bible.

¹² Muneneno wampikwa bitonto wa dibuku Buyuki ke mukwashe bavule bene umbukata mwetu, ‘abakankamana’ mu bifundwa bya Bible mwanda wa kukankamika befundi batanwe ku kupwila ne belunge ku bulongolodi bwa Yehova. Mafuku a kunyuma, twadi na kibidiji kya kwilaija bantu, amba poso bekale bidi kwifunda umbula bwa kitatyi kampanda kumeso kwa kwibeta belunge netu. Pano, befundi bavule bapwilanga abo bakishilula’tu kwifunda, kadi bendelela kumeso bukidibukidi.

¹³ Ba mulume ne mukaji bamo bapēne bukamoni bwa kiponka na ponka kudi mulunda nabo wa ku kaji. Uno mukelenge pa kusepelela bubinebine, tutu ne wandi mukaji bamulomba kwifunda nandi Bible kupityila mu dibuku Buyuki. Ponkapo bamukankamika atanwe ku kupwila kwakokeja kutana malondololo mavule a ku bipangujo byandi. Uno muntu kaitabijepo enka kifundwa kete, ehe, ino washilwile ne kwifunda’kyo misunsa ibidi ku yenga, kadi waanza ne kutanwa ku kupwila ku Njibo ya Bulopwe kitatyi ne kitatyi.

¹⁴ Twingidijei Mukanda I Kika Kisaka Leza Kotudi?: Ku kitango kya distrike “Mikendi ya ndoe ya Leza,” twatambwile’ko mukanda I Kika Kisaka Leza Kotudi? Uno mukanda ukwasha ku kushilula bifundwa bya Bible na bantu bakaminwe Leza, pakubulwa kusañuna ludingo lwa masomo obafundile. Udi na bufundiji bukumbane bupituluka mu bufundiji bonso bwa kyalwilo bwa mu Bible. Uno mukanda i kingidilwa kifike’po byabinebine mu myanda itala kupa bakwabo buyuki bwa Leza. Ushintululanga bubinebine mu muswelo upēla ne wivwanikwa, otubwanya batwe bonso kwingidija monka mokifwaninwe pa kufundija kyokya kisaka Leza kotudi. Bine basapudi bavule bakekala na madyese a kwendeja bifundwa kya Bible mu uno mukanda.

¹⁵ Bantu bamobamo bemona bu kebadipo na kitatyi kya kwifunda dibuku Buyuki, baketabija padi kwitūdila’ko kitatyi kya mīsambo mīpi kupityila ku kifundwa kya mukanda Kisaka Leza. Bine bakabezemuka myanda yobakafunda’mo. Mu mapaje abidi nansha asatu onka, bakatana malondololo ku bipangujo biipangulanga bantu tamba tutwa ne tutwa twa myaka. Kimfwa: Lelo Leza i ani? Dyabola, lelo i ani? Kiswamutyima kya Leza pa mwanda utala ino ntanda i kya kulonga bika? Bulopwe bwa Leza i kika? I muswelo’ka wa kusokola mutōtelo wabine? Eyo, uno mukanda ulombola bubinebine mu bishima bipēla, inoko musapu udi’mo i wa bukomo bukatampe. Udi na myanda mikatampe ikabandaula bakulumpe na boba bakabatyijibwa ne udi bu mutyi wa kusambukila nao ku kifundwa kya mushike mu dibuku Buyuki.

¹⁶ Shi usaka mwifunde na muntu mu kujokelamo kupya, ukokeja’tu kunena’mba: “Lelo uyukile’mba shi witūdile’ko minite mityetye yonka, ukokeja kusokola malondololo ku kipangujo kikatampe kya mu Bible?” Kupwa ipangula kipangujo kimo mu byobya bidi kungalwilo kwa kifundwa kimo kya mu uno mukanda. Kimfwa, shi twisambanga na muntu mununu, tukokeja kunena’mba: “Tuyukile amba pakala Yesu wābelwile bantu. Ino, mu mafuku akāya kumeso, le i kika kyakalongela babela? banunu? ne bafwe?” Malondololo a bino bipangujo atanwa mu kifundwa 5. Yewa utele mutyima ku myanda ya mitōtelo, ukokeja kumuloba tudi mukanwa na kino kipangujo: “Lelo Leza wivwananga milombelo yonso?” Kifundwa 7 kyo kilondolola’po. Bantu ba mu kisaka kimo padi bakasaka kuyuka: “Leza usakanga kika kudi bambutwile ne kudi bana?” Bakekiyuka pa kwifunda kifundwa kya 8. Kudi bipangujo bikwabo, kimfwa: “Lelo bafu bakokeja kususula bōmi?” (kifundwa 11); “Mwanda’ka kudi mitōtelo mivule ītēla bu ya bwine-kristu?” (kifundwa 13); ne “I kika kyofwaninwe kulonga mwanda wa wikale mulunda na Leza?” (kifundwa 16).

¹⁷ Ketwakipityijai Kitatyi kya Kulonga Kujokelamo Kupya: I kitatyi kinga kifwaninwe kupityija, penepa ke kukalonga kujokelamo kupya? Basapudi bamobamo bajokanga difuku dimo nansha abidi kupwa kwa kwiya musunsa umbajinji. Bakwabo bajokelanga’ko kitatyi kikwabo enka mu dine difuku’dya! Lelo kuno i kwiyumba? Mhm, mwanda pavule, kimweka bu bantu kebebitulumukangapo. Kikatampe kine kidi’po i musapudi’wa ekale kukulupila’tu amba bikapita enka biyampe, ne kwikala’ye na bukankamane. Tutalei myanda imoimo.

¹⁸ Musapudi umo wa myaka 13 wadi usapula ku njibo ne njibo, penepa wamona bana-bakaji babidi benda bananga. Pa kuvuluka amba twi bakankamikwe kusapwila bantu ponso pobatanwa, wafwena bano bana-bakaji mu kipito. Nabo batambula biyampe shē musapu wa Bulopwe, kadi abo bonso bubidi baitabija dibuku Buyuki, wa dyandi wa dyandi. Kupwa bapa mwanetu nkasampe maadrese abo, mafuku abidi pa kupita’po wakebatala, washilula bifundwa bya Bible na bonso babidi, wa kyandi wa kyandi.

¹⁹ Kaka umo nandi, wakwete mpangiko ya kujoka kukesamba na mwisambi nandi kupwa kwa yenga umo. Ino difuku dimo nansha abidi kupwa kwa kwitana kwabo kubajinji, waendele kukamumona mwanda wa kumupa dipepala disambila pa mwanda obesambile’po dibajinji. Wasapwila mukelenge’wa amba: “Kino kishinte kyaunsangeje bininge, nalanga’mba nobe ukasangela kwikitanga. Nkisakilepo twisambile’po kala panopano, ehe, ino nkajoka dyabusatu ku kyolwa monka motwelaile. Mwene i amo?”

²⁰ Shi muntu wasepelela bubinebine, tufwaninwe kuyuka amba ukatana kukankajibwa mu muswelo kampanda nansha mu muswelo kabidye. Potujokela kwadi bukidibukidi kupwa kwa kwitana kwetu kubajinji, i kumukankamika kubwanya kumukwasha ekale kukomena bukomo bonso bukalongwa na ba mu kisaka kyabo, na balunda nandi ba pa mutyima, nansha na bantu bakwabo.

²¹ Bukankamane i ngikadilo ifwaninwe kwikala nayo yewa yense usaka kulupula bipa bilumbuluke mu mwingilo wa kulonga kujokelamo kupya. I muswelo’ka wa kwikala nabo? Mutumibwa Polo ulondolola na kunena’mba ‘tukankamanei ne kukankamana’ tusapwile bakwetu myanda miyampe “mudi Leza wetu.” Shi tusaka kwendelela kumeso mu uno mwanda, tulombei bukwashi kudi Yehova. Kupwa, kukwatañana na milombelo yetu, tulondei kusepelela konso. Yehova uketwesela mu bukomo bwetu botulonga!

[Binenwa bya Kifwatulo pa paje 3]

[Kapango pa paje 3]

Muswelo wa Kulupula Bipa Bilumbuluke mu Kujokelamo Kupya

■ Tulombolei bu tutele mutyima byabinebine ku umo ne umo.

■ Tutongei kishinte kya mu Bible kisangaja kya kukesambila’po.

■ Twalei nyeke kyalwilo kya kujokelamo kulonda’ko.

■ Twendelelei na kulanga muntu’wa, nansha shi ketudi beshiye nandi.

■ Tujokei kupwa kwa difuku dimo nansha abidi mwanda wa kulonda kusepelela.

■ Tuvulukei amba kitungo kyetu i kushilula kifundwa kya Bible.

■ Tulombelei mwanda wa tupebwe bukwashi bwa kwitupa bakankamane mu uno mwingilo.