Twendejei Bifundwa bya Bible Byendelela Kumeso
1 I mwanda’ka umo udi na muñanga mwana-mukaji mwine Tanzania, wiifwene na udi na nsongwakaji mwine Alajantine ne na inabana mwine Lettoni? Annuaire 1997 (p. 8, 46 et 56, Falanse) ulondolola’mba bonso bano basatu baikele kwendelela bukidibukidi mu kwifunda kwabo kwa Bible, mwanda basakile kubandaula dibuku Buyuki misunsa mivule ku yenga. Basapudi baikele kukankamikwa balonge buninge bwa kupwa shapita umo ku difuku, shi kibwanika. Ino bavule i bamone’mba uno ke mwandapo upēla. Nansha kwifunda shapita mutuntulu ku difuku byokulonda nakampata mungya kupēlelwa ne mungya tunangu twa mwifundi ne mwifundi, ino basapudi babwino batene bipa bilumbuluke pobaingidije ino milangwe ilonda’ko.
2 Kifwaninwe kufundija befundi muswelo wa kuteakanya kifundwa, monka mwadi mwikishintulwila dyani dyantentekelo dya Mwingilo Wetu wa Bulopwe wa kweji 7, 1996. Ku ngalwilo, i kiyampe kushintulula ne kulombola mwa kwikilongela. Mulombole abe mwine mwikadile dibuku dyobe Buyuki. Teakanyai nandi pamo kifundwa kibajinji. Kwasha befundi ku kutana bishima bikatampe ne myanda ilondolwedidila ku kipangujo kisonekelwe kunshi kwa dyani, kupwa shinkai mushinko munshi mwabyo. Basapudi bamobamo baikele kupa befundi kya kushinka nakyo. Wibakankamike bekale kukimba mavese onso mu kwiteakanya kwabo. Na kulonga namino, ukebafundija mwa kwiteakenya mwanda wa kukatanwa ku kifundwa kya kitabo kya pa kipwilo ne ku kwifunda kwa Kiteba kya Mulami.—Luka 6:40.
3 Mufundiji mulumbuluke kanenangapo bivule, ino unenejanga mwifundi. Wepukanga kwimanina pa myanda yampikwa kamweno. Ubwejanga’ko myanda yantentekelo enka na dimodimo, ino ufwaninwe kukokela milangwe pa mvubu ya myanda mikatampe idi mu kifundwa. Bamobamo bekalanga bapa bantu bobefunda nabo mabuku alondolola ku bipangujo byabo. Kadi, bantu basepelela musapu bakendelela kubwanya ku buyuki bwabo na kutanwa ku kupwila kwa pa kipwilo.
4 Kekifwaninwepo kutanga mavese onso atelelwe. Tukokeja kushintulula myanda imoimo mikatampe na bisonekwa bitentwilwe kala mu musāngo. Pa kupituluka, kokela bininge milangwe pa mavese makatampe omufundile, kadi mukankamike ekale kwiakwata ku mutwe.
5 Kifundwa ne Kifundwa Kifwaninwe Kwija Umbula bwa Bitatyi Binga?: Kokemika kifundwa enka’tu pa nsaa umo kete. Bamobamo bekalanga na kyaba ne padi babilanga kwifunda umbula bwa kitatyi kilampe, nansha misunsa mivule ku yenga. Mwifundi ukabwanya kino ukamwena’mo kamweno.
6 Dyalelo, kudi bapya tutwa twa tununu batendela Yehova kadi, enka na munenena Isaya 60:8, “balelemba bwa dikumbi, ne bwa bankutyi ku bipombo byabo,” mu bipwilo bya bantu bandi. Tuvuijei’mo nanshi kyetu kipindi ne twingidilei pamo na Yehova, mu kino kitatyi kyapelakenye kubungakanya bantu badi pamo bwa mikōko.—Is. 60:22.