“Lelo Bantu Bonso Bakesanswanga umo Ne Mukwabo?”
1 Uno o musapu mulumbuluke, usangaja, ne ukunka ku mutyima ukasapulwa ntanda yonso mu ndimi 169. Le uselele myanda’ka? Ne ukasapulwa namani?
2 I musapu utala pa buswe bwa kusanswa mukwetu. Utanwa mu Musapu wa Bulopwe No. 35 udi na mutwe wa mwanda unena amba: “Lelo Bantu Bonso Bakesanswanga Umo ne Mukwabo?” Uno Musapu wa Bulopwe ubandaula mu kīpi myanda ilongeka kujokoloka ntanda yonso, kadi ushintulula amba kubulwa kwa buswe mu bukata bwa bantu kyo kishina kine kileta kujingwa mutyima ne masusu makatampe. Kadi ushintulula mwanda waka buswe ku mukwetu bwendanga butalala nakampata mu ano etu mafuku, ne kino kidi na buluji’ka mu mafuku āya kumeso.
3 Pakwabo kadi, Musapu wa Bulopwe No. 35 ulombola amba buswe bwabine ku mukwetu budi’ko umbukata mwa midiyo ya bantu badi’ko dyalelo pa ino ntanda. Uyukanya kadi i bāni bajokeje bwine Kidishitu bubajinji—butōtyi bwa mu myaka katwa imbajinji, bwādi buyukilwa ku buswe bwa kusanswa mukwetu pamo na mwāfundijije’bo Yesu Kidishitu.—Luka 10:25-37.
4 Musapu wa Bulopwe No. 35 ufudija na kushintulula muswelo ukesanswa, panopano ponka, bantu bonso umo ne mukwabo munshi mwa buludiki bwa Bulopwe bwa Leza bupelwe Kidishitu. Batangi bonso ba uno musapu i bakankamikwe kwikala na mukanda I Kika Kisaka Leza Kotudi? ne kufunda muswelo wa kumwena mu ino mpangiko ya buswe ilombwelwe kamo ne kamo mu Kinenwa kya Leza.
5 Lelo i Bāni Bakabanya Uno Musapu? I Batumoni ba Yehova kujokoloka ntanda yonso bakapāna uno musapu wa buswe ku mukwetu ku bantu bonso bobeyukile nabo, bekalwa nabo, ne balongo bene mu bula bwa kweji 11 ne kweji 12. Bonso babwenye bisakibwa i bakankamikwe kwabanya Musapu wa Bulopwe No. 35 ku bantu bonso.
6 Kitungo kikatampe kya kano kampanye i kusamuna kusepelela kwa bantu bekale kwifunda Bible mu mukanda Kisaka Leza nansha mu dibuku Buyuki. Kadi bukomo bukalonga mwingidi yense wa Yehova na mutyima umo bukapāna bukamoni bukatampe bwa padi Yehova, Leza wa buswe, ne padi wandi Mwana, Yesu Kidishitu.