Lelo Udi Na “Mwiba Mu Ngitu”?
1 Twabilanga na mutyima umo kuvuija, mungya bukomo bwetu, mwingilo witupelwe wa kusapula myanda miyampe. Ino, banabetu bavule, batutu ne bakaka, bakomenwanga kutambila divule mu uno mwingilo pa mwanda wa kukambijibwa kobakambijibwa na misongo nansha na bulema kampanda bwibabudija kulonga bivule mobasakila. Kekubulwe padi i bakomenwe kunekenya mpungiji ya mutyima, nakampata pobamonanga bakwabo bapyasakena mu mwingilo.—1 Kod. 9:16.
2 Kifwa kya Kwiula: Mutumibwa Polo wādi ulwa na “mwiba mu ngitu.” Wālombēle misunsa isatu mituntulu kudi Yehova amba amutalule kino kijika kyādi kimunyoñamija pa mutyima, kyaātelele bu “mukendi wa Satana” wādi umukupila bukile bukya. Mu bino byonso, Polo wāuminine ne kwendelela kumeso mu mwingilo wandi. Kādipo widilakena nansha kwiuningauninga. Wāingile mungya bukomo bwandi. Kintu kyāmukweshe anekenye i kikulupiji kyāmupele Leza, amba: “Buntu bwami i bukubwanine; ke-buntu bukomo bwami bufikile ponka pa bubwanine monka umbukōkekōke.” Bukōkekōke bwa Polo bwāikele ke bukomo kitatyi kyaāfundile kutyumwina mu manwi ngikadilo yandi ne kwiubija mudi Yehova ne mu mushipiditu sandu mwanda wa kūminina.—2 Kod. 12:7-10.
3 Muswelo Okokeja Kūminina: Lelo bukōkekōke bwa bu muntu bukukadile mikalo mu mwingilo oingidila Leza? Shi i amo, nankyo iula mumweno wa Polo. Ekale shi misongo yobela nansha bulema kampanda bodi nabo kebipwijibwapo mu ino ngikadilo ya bintu, ukokeja kutūla kikulupiji kyobe kyonso mudi Yehova, aye ye uyukile bisakibwa byobe wa kukupa ‘bukomo butabukile pa boikalanga nabo nyeke.’ (2 Kod. 4:7) Mwena kamweno mu bukwashi bupānwa mu kipwilo, na kwepuka kwitolwela pa kasuku. (Nk. 18:1) Shi kikukomene kutambila mu mwingilo wa ku njibo ne njibo, kimba nanshi miswelo mifwaninwe ya kupāna bukamoni bwa kiponka na ponka nansha bwa ku telefone.
4 Nansha shi mwiba wa mu ngitu ukubudijanga kulonga bivule mu mwingilo, kokikala na milangwe ya kwiivwana bu kudipo ne kyoloñanga kine. Ukokeja nobe “kusapula myanda-miyampe ya buntu bwa Leza” mwendele bukomo bobe ne ngikadilo yodi’mo pamo na mwēkilongele Polo. (Bil. 20:24) Tuyukei’mba Yehova usangalanga kitatyi kyonso kyotulonga bukomo bwa kuvuija wetu mwingilo.—Bah. 6:10.