“Kinenwa kya Leza kya Bupolofeto”—Kitango kya Distrike kya Batumoni ba Yehova kya mu 1999
1 Pākidi bene Isalela mu ntanda mutuputupu, Yehova wāsoñenye Mosesa apunge bimpungidi bibidi bya ndalama. Shi baila’ko kimpungidi kimo kete, bamfumu ba bisaka bo bādi bebunga ku kibelo kya kipema kya kitango. Ino shi abapūkija byonso bibidi, kitango kyonso kya Isalela kyādi kīya kwibungila pamo. (Umb. 10:1-4) Mwene dyalelo netu tusangalanga pa kwivwana misapu, ipūkija bwa bimpungidi, itwita tukongakene pamo ku bitango bya distrike? Ku bitango ko kwitupanga Yehova bufundiji ne madingi kupityila ku Kinenwa kyandi ne ku bantunguluji bandi batongele. Kino kitupanga muswelo wa kushala nyeke bemanije nshinkidingi mu mwingilo wa Leza. Lelo ketuloelelwangapo pa kumona tununu—pakwabo makumi a tununu—twa batōtyi netu bakikōkeji bebungile pamo mu buswe ne mu ndoe? Bine, tuloelelwanga!—Mit. 122:1, 7, 8.
2 Tamba mu Kweji 8 kufika ne mu Kweji 9, 1998, kwadi kutūlwe mpangiko ya bitango 58 “Dishinda dya Leza dya Būmi” mu bibundi 56 bya mu mwaba wetu. Ino muno mu République démocratique du Congo kemwalongelwepo bitango bisamba-bibidi mu mafuku obyadi bitungilwe pa mwanda wa ngikadilo imbi yotudi’mo mu ino ntanda. Tukulupile amba Yehova usa kwitukwasha twibilonge panopano ponka. Tubemufwija’ko mpata pangala pa bukomo bomwalongele bwa kwibunga nansha byokwadi mitabakano ne bimyanda bya ambaamba bya mu kino kitatyi. Malapolo alombwele amba kudi bavule, bisaka bituntulu ne babulema, baendele lwendo lulampe lwa panshi mwanda wa kutanwa ku kitango. Bamo baendele lwendo lwa mafuku, bakwabo lwa mayenga. Tutu umo mpofu waendele kilometele 260 lwanshi mwanda’tu wa kutanwa ku kitango kya distrike ku Mbuji-Mayi. Muno mo mwalongelanga mwaka ne mwaka. Lelo kulonga bukomo bwa uno muswelo kudi na kamweno? Mpata! Bonso batenwe’ko basepelele bininge mwanda ‘bekankamikile abo bene na bene, ne byobamona difuku dibafwena po pene.’ (Bah. 10:24, 25) Tutu umo wanene amba: “Bonso bakankamikilwe na ino mpangiko ya kumushipiditu.” Ne ku kitango kya distrike kya mu 1999 nako monka, tukamona’ko mikenga mikwabo mivule ya kuloelelwa bubutule bwetu bulēme ne ya kufwija’ko Yehova pangala pa bumo bwaetupele.
3 Alwila’ko kwiteakanya mwa kukataninwa ku masobo a kumushipiditu mu mafuku onso asatu, tamba ku lwimbo lubajinji kutūla ne ku milombelo ya mfulo. Divule, kitango kyomwityilwe’ko kyo kidi kubwipi na kwenu. Sosiete i mulonge bukomo mwanda wa kwimupēleleja’ko kiselwa. Kudi bifuko bikwabo biná bikalongelwa’ko bitango byabwejibwa ku bya ku mwaka wadi’mo mwanda wa kupa umo ne umo muswelo wa kudya kumushipiditu pamo ne kipango kyandi. (Kup. 31:12) Bifuko bine i bino, Nyabihanga mu Burundi, Luiza ku Kasai occidental, Basankusu ne Bosondjo ku Équateur. Pano po pa kulanga kamwingilo ka kwingila mwa kuleela kalupeto ka lwendo lwa banwe bonso. I biyampe muntu ne muntu akatanwe ku kitango kityilwe’ko kipindi kyabo nabya tukalombola amba tubatendela bukomo bulongele Sosiete. Ino shi kudi kyendelo kampanda kiluji kyomusakila kukataninwa ku kitango kikwabo, mudi na bwanapabo.
4 Pomukwata mpangiko ya kukatanwa ku kitango kya distrike, lombolai ne buswe na kulangila’ko boba basakilwa bukwashi, kifwa boba basepelele bubinebine panopano, mwanda wa nabo bakatanwe ku bipimpo byonso. I biyampe kubandaula myanda inenwe pa dino dyani na bantu bomwifunda nabo Bible batengele kukatanwa ku kitango. (Ngat. 6:6, 10) Dya Butano ne dya Mposo, kitango kikashilula na minjiki na 9:30 LU, ino kikafula na 5:00 KY. Kipimpo kya dya Yenga lubanga kikashilula na 9:30 LU, kitango kikafula na 4:00 KY. Ino myanda ilonda’ko isa kwimukwasha mu kwiteakanya kwenu.
5 Mobo a kifikilo ekalanga nyeke mobo a banabetu. Tufwaninwe kulangila batutu ne bakaka betutundaila ku mobo abo. Nanshi ke biyampepo batwe bantu bobatambwile na kizaji senene shē twikale kona kino kizaji na kukimba kulelwa mafuku mavule ku mobo kumeso nansha kupwa kwa kitango. Mobo a kifikilo akapānwa’nka mu bula bwa kitango kete. Boba bapebwa mobo bafwaninwe kulēmeka bintu bya mufikilwa, kuleka konakanya kintu nansha kimo, ne kuleka kutwela mu bifuko mokebapelwepo lupusa, ne kuta mutyima ku babo bana nabo balongele monka. Shi bafikilwa abatanwa na kikoleja pa uno mwanda, bafwaninwe kupelakana bukidi, kuyukija banabetu bemanīne mwingilo wa kutundaila bāya, bakasangela kwibakwasha’po biyampe byonka. Banabetu batundaila bāya bakengila biyampe ne kupēlelwa kaji ekale umo ne umo wingidila nabo pamo. (Bah. 13:17) Malapolo alombola’mba kudi banabetu bamobamo balekanga ku kusaka kwabo kushikata kobebatūdile baenda kukwabo, pakwabo i kufikile balunda nansha bantu bobeyukile nabo. Kino kikambakanyanga banabetu batundaila bāya. Tubemulombe kwingidila nabo pamo.
6 Dimodimo banunu ne babulema, bengidi ba kitatyi kyonso ne bantu bakwabo basakilwanga bukwashi mwa kutaninwa ku kitango. Balongo babo, bakulumpe nansha bonso ba pa kipwilo bayukile ngikadilo yabo ya pa bula bakokeja kwibakwasha na buswe, pampikwa kutentwila kino kisela pa banabetu bateakanya kitango.—Tala 1 Temote 5:4.
7 Ketudipo kyotwalakana, Yehova i mwesele byonso bilongwa mwanda wa kupityija bino bitango ku mwaka ne mwaka. Eyo, banabetu bavule benda ku bitango bakimbanga kumona kwa kufikila, ino tukulupile na mutyima umo amba Yehova ukebatūkija mityima na kwibapa byobasaka. Ino myanda yonso italanga pa mutōtelo wabine, o mwanda tufwaninwe kulonda na nsangaji misoñanya yonso itupebwa. Twilombolei bu bantu bakikōkeji mu tubintu tutyetutye; nabya tukatambula byabuyabuya bivule bitengele bantu bonso bakuswibwa na Yehova.—Luka 16:10.
8 Tubemukankamika mwalwile’ko kwikumbula mwa kukataninwa ku mafuku asatu akalongwa kitango kya distrike “Kinenwa kya Leza kya Bupolofeto” kya mu 1999. I bine, batwe bonso pamo tutengele na kipyupyu kwivwana “diwi dya tusepo ne lutendelo” dikapūkija bengidi ba Yehova badi umbumo. (Mit. 42:4) Tulomba Yehova esele byonso biteakanibwa mwanda wa kuketupeteja kumushipiditu!
1. Shi kikulomba kwenda lwendo lulampe pa kukatanwa ku kitango, nankyo alwila’ko kuleya kalupeto ka kufutyila lwendo lobe ne lwa kyobe kisaka, ne kalupeto ka bidibwa.
2. Langa ne kukwatakanya bulongolodi bwa Yehova na byabuntu byobe. ‘Kokamweka ku meso a Yehova makasa bitupu, mhm,’ ino ‘mulēmeke na bintu byobe byabulēme.’—Kup. 16:16; Nk. 3:9.
3. Kadi tutumbijanga dijina dya Yehova na mwiendelejo wetu mulumbuluke otwikalanga nao ku bitango ne muvwadilo muyampe bya dyangi.—1 Kod. 10:31.
4. Ikala na mutyima wa kwingidila pamo na batutu batundaila bāya. Kokakwatyila muntu kyaba, poso enka wa mu kisaka kyobe nansha muntu oile nandi pamo.
5. Pa kukōkolokwa, i biyampe kudya bidibwa bipēla mwa kulondela biyampe shē bipimpo bya kyolwa. Bidibwa bīkutyijana bininge kebyo kuleta mukunukunu.—Luka 8:18.
6. Bukundwe bupejanga Yehova bulēme. O mwanda ku mfulo kwa kipimpo ne kipimpo, umo ne umo ukakwasha ku mwingilo wa kutōkeja kifuko kilongelwa’po kitango na kuboya mapapye ne bintu bikwabo bya busala mwanda wa kwibyela mu kyala kilongolwelwe kala.—1 Pet. 1:15, 16.
[Binenwa bya Kifwatulo pa paje 3]
[Binenwa bya Kifwatulo pa paje 3]
Mpangiko ya Kitatyi
Dya Butano ne dya Mposo: 9:30 LU – 5:00 KY
Dya Yenga: 9:30 LU – 4:00 KY
[Binenwa bya Kifwatulo pa paje 5]
[Bifwatulo pa paje 5]
Mpangiko imoimo ya kukwata mwa kukataninwa ku kitango “Kinenwa kya Leza kya Bupolofeto”