‘Tuvwalei Bumuntu Bupya’
1 Batwe bene Kidishitu tudi mu nsangaji mwanda twi bayuke bubinebine. Twifundanga kwikala na būmi bwishidile na bwa bantu ba ino ntanda. Abo i ‘basasuke ku būmi bwa kwa Leza,’ mwanda “badi ne ñeni yabo mibafītyijibwe.” (Ef. 4:18) Twifundanga kutalula milangwe ya ino ntanda na kuvūla bumuntu bwa kala ne kuvwala bumuntu bupya.—Ef. 4:22-24.
2 Bumuntu bwa kala butwalanga bukidibukidi ku mwikadilo moneke, ku kwisubija ne ku lufu. O mwanda tukankamika boba bonso bateja musapu wa Bulopwe bafundule kufuna bulobo, ne bukalabale, ne kīji, ne butukani, ne mīsambo ya bumvubumvu. Nanshi bonso basaka kwitabijibwa na Leza bafwaninwe kuvūla bumuntu bwabo bwa kala lonso, pampikwa kwikaka, pamo’nka na muvūdilwanga mbwija ya biko.—Kol. 3:8, 9.
3 Bukomo Bupya Buludika Ñeni: Shi tusaka kuvwala bumuntu bupya, tunenwe bidi kwikala bapya mu bukomo buludika ñeni yetu. (Ef. 4:23) Lelo muntu ubwanya namani kulongolola dipya buno bukomo, nansha ngikadilo ya mu ñeni, mwa kuludikila milangwe yandi mu dishinda diyampe? I na kwifunda Kinenwa kya Leza kitatyi ne kitatyi ne na kininga, ne kulanguluka pa bufundiji budi’mo. Penepo milangwe yandi ikatandabuka mu muswelo mupya mu mutyima wandi, washilula kumona bintu na mwibimwena Yehova ne Kidishitu. Pa kwalamuna būmi, i biyampe kuvwala ngikadilo mivule ya Kidishitu, kifwa mutyima wa lusalusa, buyampe, kwityepeja, kutalala, kitūkijetyima ne buswe.—Kol. 3:10, 12-14.
4 Kuvwala kotuvwala bumuntu bupya ko kwitupandula mu ino ntanda. Mwikadilo wetu wa umbūmi nao witushiañanya nayo. O mwanda twisamba bubinebine ne kūbaka bakwetu na muneneno mufwaninwe. Tutūkija bukalabale bwetu, tutalula bululu, kufuna bulobo, mutonko ne nshikani, tupingakenya’po ngikadilo milumbuluke, ya bwine Leza. Twielela’ko kulonga bivule bipityile ne pa lulekelo pene. Tulonga bino byonso na mutyima umo.—Ef. 4:25-32.
5 Ketwakivūlai nansha dimo bumuntu bwetu bupya. Shi twibuvule nabya Yehova kaketabijapo mwingilo otumwingidila. Nanshi tusaka bumuntu bwetu bupya bulumbuluke bobolwele bantu ku bubinebine, nabo batumbije Yehova, Umpangi wa buno bumuntu!—Ef. 4:24.